မြန်မာနိုင်ငံက စစ်ကြောရေးအတွေ့အကြုံတွေကို ပြန်ပြောပြတဲ့တိုရူကူဘိုတာ

News

မြန်မာနိုင်ငံက စစ်ကြောရေးအတွေ့အကြုံတွေကို ပြန်ပြောပြတဲ့တိုရူကူဘိုတာ

မင်္ဂလာပါ ပရိသတ်ကြီးရေ.. မိုးနတ်မင်း သတင်းစုံမှ ကြိုဆိုလိုက်ပါတယ်။ အခုတင်ဆက်ပေးမယ့် သတင်းလေးကတော့ မြန်မာနိုင်ငံက စစ်ကြောရေးအတွေ့အကြုံတွေကို ပြန်ပြောပြတဲ့တိုရူကူဘိုတာ ဆိုတဲ့သတင်းလေးပဲ ဖြစ်ပါတယ်။

ဂျပန်နိုင်ငံသား မှတ်တမ်းရုပ်ရှင်ရိုက်ကူးသူ တိုရူကူဘိုတာဟာစစ်ကောင်စီရဲ့လွတ်ငြိမ်းချမ်းသာခွင့်နဲ့ အင်းစိန်ထောင်ကနေ နိုဝင်ဘာ ၁၇ ရက်နေ့က ပြန်လည်လွတ်မြောက်လာခဲ့ပြီး ဂျပန်နိုင်ငံကို ချက်ချင်းပြန်လည်ပို့ဆောင်ခံခဲ့ရပါတယ်။

Toru Kubota

သူဟာ ပြီးခဲ့တဲ့ ဇူလိုင်လကုန်ပိုင်းက ရန်ကုန်မြို့၊ တောင်ဒဂုံမြို့နယ်မှာ ပြုလုပ်တဲ့ စစ်အာဏာသိမ်းမှုဆန့်ကျင်ဆန္ဒပြပွဲကို မှတ်တမ်းရိုက်ကူးနေစဥ်မှာ ဖမ်းဆီးခံခဲ့ရပြီး သူ့ကို စစ်ကောင်စီက ပုဒ်မ သုံးခုတပ်ကာ စုစုပေါင်း ထောင် ၁၀ နှစ်ချမှတ်ခဲ့ပါတယ်။အခုတော့ လွတ်ငြိမ်းချမ်းသာခွင့်နဲ့ ပြန်လည်လွတ်မြောက်ခဲ့တဲ့နောက် ဂျပန်နိုင်ငံကို နိုဝင်ဘာ ၁၈ ရက်မှာ ပြန်လည်ရောက်ရှိခဲ့ပါတယ်။

သူက ဆန္ဒပြပွဲအတွင်း သူအဖမ်းဆီးခံခဲ့ရတဲ့အခြေအနေနဲ့ပတ်သက်လို့ သူ့ကို ဖမ်းဆီးဖို့အတွက် စီစဥ် တယ်လို့မထင်ကြောင်း၊ အဲဒီဖြစ်စဥ်မှာ သူရှိနေတဲ့အချိန် ဖမ်းဆီးသွားတဲ့ပုံစံသာဖြစ်ကြောင်း၊ ဒါပေမဲ့ သူရောက်ရှိနေတဲ့အကြောင်း သတင်းပေါက်ကြားမှုရှိနိုင်တာကိုလည်း မငြင်းနိုင်ကြောင်း The Newsmakers သတင်းဌာနနဲ့ ပြုလုပ်တဲ့ မေးမြန်းခန်းမှာ ပြောကြားသွားခဲ့ပါတယ်။

Toru Kubota, Japan Film Maker

“အဲဒီနေရာမှာ ဆန္ဒပြပွဲရှိတယ်ဆိုတာကို ကျွန်တော့်ကို အမည်မသိလူတစ်ဦးက ဖြစ်စဥ် မတိုင်ခင်တစ်ရက်မှာ သတင်းပေးလာပါတယ်။ ကျွန်တော် အဲဒီနေရာကို သွားခဲ့တယ်။ အဲဒီမှာ အမည်းရောင် တီရှပ်ဝတ်ဆင်ထားတဲ့ လူငယ်တစ်စု ရှိနေတာကိုတွေ့ရတယ်။ ကျွန်တော်က သူတို့ရဲ့နောက်မှာ မီတာ ၃၀ လောက်အကွာကနေ အခြေအနေကို လေ့လာစောင့်ကြည့်နေတာပါ။ လူငယ်တွေက စက္ကန့် ၃၀ လောက် ဗီနိုင်းတွေကိုင်ပြီး ဆန္ဒထုတ်ဖော်မှုစတင်ကြပါတယ်။ အဲဒီနောက် သူတို့ လူစုကွဲပြီး လမ်းတွေထဲ ပြေးဝင်သွားကြပါတယ်။ အဲဒါနဲ့ကျွန်တော်လည်း သူတို့နဲ့ ဆန့်ကျင်ဘက်ကို လှည့်ထွက်ပြီး လမ်းသွားလမ်းလာလို ဟန်ဆောင်လိုက်ပါတယ်။ သိပ်မကြာခင်မှာပဲ ကားတစ်စီးနဲ့ လူတစ်စု ကျွန်တော့်ဆီရောက်လာပြီး ကားပေါ်က စစ်သားနှစ်ယောက်ဆင်းလာပြီး တစ်ခုခုအော်ဟစ်ပြောဆိုနေတယ်။ သူတို့ ကျွန်တော့်ခေါင်းကို သေနတ်နဲ့ချိန်တယ်။ ပြီးတော့ ကျွန်တော် လက်မြှောက်ပြီး ဒူးထောက်ထားရတယ်။ ကျွန်တော့်ကို လက်ထိတ်ခတ်ပြီး ရဲစခန်းကို ရဲကားနဲ့ခေါ်သွားပြီး ကျွန်တော့်ကို နှစ်ရက် စစ်ဆေးတယ်”လို့ သူကပြောပါတယ်။

အဲဒီလို စစ်ဆေးခံရစဥ်မှာ ညှဥ်းပန်းနှိပ်စက်တာတွေ၊ ရုပ်ပိုင်းဆိုင်ရာနာကျင်ထိခိုက်အောင် ပြုလုပ်ခံရတာမျိုးမရှိခဲ့ပေမဲ့ သူ့နာမည်နဲ့ သူရိုက်ကူးခဲ့တဲ့ ရိုဟင်ဂျာ အကြောင်း မှတ်တမ်းရုပ်ရှင်ကို ရှာတွေ့သွားတဲ့အခါမှာတော့ သူတို့ရဲ့ပြုမူဆက်ဆံပုံက ပြောင်းလဲသွားခဲ့တယ်လို့ ကူဘိုတာက ဆက်ပြောပါတယ်။ ​
“ကျွန်တော့်ကို ညှဥ်းပန်းနှိပ်စက်တာတွေတော့မရှိပါဘူး။ ရုပ်ပိုင်းဆိုင်ရာနာကျင်မှုပြုလုပ်တာလည်း မရှိပါဘူး။ သူတို့က နိုင်ငံခြားသားဆိုရင် သတိထားတာကို ကျွန်တော်သိထားပါတယ်။ ဒါပေမဲ့ သူတို့ ကျွန်တော့်နာမည်ကို ရှာတွေ့သွားပြီး ကျွန်တော်ရိုက်ကူးထားတဲ့ ရိုဟင်ဂျာ ရုပ်ရှင်ကို ရှာတွေ့သွားချိန်မှာတော့ သူတို့ရဲ့တုံ့ပြန်မှုက အနည်းငယ်ပြောင်းလဲသွားပါတယ်။ သူတို့က အဲဒီရုပ်ရှင်ကိုမုန်းတယ်လို့ ပြောတယ်။ ဒါတွေက ရွံ့မုန်းစရာကောင်းတယ်လို့လည်းပြောတယ်။။ အဲဒီနောက် ကျွန်တော်ကို ရဲစခန်းထဲက အချုပ်ခန်းထဲကို ပို့လိုက်တယ်။ အဲဒီမှာလေးရက် နေလိုက်ရတယ်။ အဲဒီနေရာက အမှန်တကယ် ဆိုးရွားတဲ့နေရာပါ။ သူတို့က မင်းကို ငရဲလို နေရာမျိုးကို ပို့မယ်လို့တောင်ပြောတာပါ။ တကယ်လည်း အဲဒီနေရာက အလွန်ညစ်ပတ်ပါတယ်။ ပူလောင်အိုက်စပ်ပြီး ၂ မီတာနဲ့ ၅ မီတာပတ်လည်လောက်ပဲရှိတဲ့ အခန်းထဲမှာ လူ ၂၀ လောက် ပြွတ်သိပ်ပြီးနေရတယ်။ တကယ့်ကို ကျန်းမာရေးနဲ့ မညီညွတ်တဲ့နေရာပါ။ နေရောင်လည်း မမြင်ရဘူး။ လူတိုင်းအတွက်လည်း ရေပုံးတစ်ပုံးပဲပေးထားတယ်။ အဲဒီရေနဲ့ပဲ မျက်နှာသစ်ရသလို အိမ်သာလည်းသုံးရပါတယ်။ အနံ့အသက်ကလည်း အရမ်းကိုဆိုးရွားပါတယ်”လို့ သူက အချုပ်ခန်းအတွင်းနေထိုင်ရတဲ့အခြေအနေကို ပြောပြခဲ့ပါတယ်။

Toru Kubota, Japan Filmmaker

မြန်မာနိုင်ငံမှာ တက်ကြွလှုပ်ရှားသူ အမြောက်အမြားဟာလည်း မြန်မာနိုင်ငံကနေ တိမ်းရှောင် ထွက်ခွာသွားကြသလို နိုင်ငံတွင်းမှာပဲ​ဆက်လက်နေထိုင်ဖို့ ရွေးချယ်ပြီး နေထိုင်နေဆဲ ပြည်သူတွေလည်းရှိနေဆဲပဲလို့ ကူဘိုတာက ဆက်ပြောပါတယ်။

ဒါပေမဲ့ အခုတော့ ယူကရိန်းနဲ့ ရုရှားအရေးကြောင့် မြန်မာ့အရေးမှာ ကမ္ဘာမှာ မှေးမှိန်နေသလို ဖြစ်နေပါတယ်လို့လည်း သူက ပြောပါတယ်။

“ရန်ကုန်လို မြို့ကြီးမှာ စစ်ဖြစ်နေတာ၊ အကြမ်းဖက်ခံနေရတာတွေကို အလွယ်တကူမြင်နိုင်မှာမဟုတ်ပါဘူး။ ရန်ကုန်က တိတ်ဆိတ်ငြိမ်သက်နေတာတွေ့မြင်ရပါတယ်။ ဒါက မြန်မာမှာ အာဏာသိမ်းပြီးတဲ့နောက် ပထမဆုံးကျွန်တော် ပြန်‌ရောက်လာတာပါ။ မြို့က ငြိမ်သက်တိတ်ဆိတ်နေတာကိုတွေ့ရတဲ့အခါမှာ ကျွန်တော့်ကိုအံ့အားသင့်စေခဲ့ပါတယ်။ ဒါပေမဲ့ သူတို့ရဲ့ နှလုံးသားတွေကတော့ တိတ်ဆိတ်မနေပါဘူး။ သူတို့ရဲ့အသံကိုကျွန်တော်တို့နားထောင်ဖို့လိုပါမယ်”

ရေးသားသူ – BBC Burmese

မိုးနတ်မင်း ပရိသတ်ကြီးလည်း အခုသတင်းလေးကိုဖတ်ပြီး ထင်မြင်ချက်တွေကို ကွန်မန့်မှာရေးခဲ့ရင်း မိတ်ဆွေများသိအောင် သတင်းကို မျှဝေပေးခဲ့ပါဦး။