ဆရာတော် ကျိကုန်း
မင်္ဂလာပါ ပရိသတ်ကြီးရေ.. မိုးနတ်မင်း သတင်းစုံမှ ကြိုဆိုလိုက်ပါတယ်။ အခုတင်ဆက်ပေးမယ့် သတင်းလေးကတော့ဆရာတော် ကျိကုန်း ဆိုတဲ့အကြောင်းလေးပဲ ဖြစ်ပါတယ်။
သူများတွေ ဘယ်လောက်ပဲ စစ၊ ဘယ်လောက်ပဲ ရိုင်းရိုင်းစိုင်းစိုင်း ပြောပြော၊ ဘယ်လောက်ပဲ နှိမ်ပါစေ…. ဘယ်တော့မှ စိတ်မဆိုးတတ်ပဲ အမြဲပြုံးနေတတ်တဲ့ ဆရာတော် ကျိကုန်း…..
ဘယ်တော့မှ ဆံပင်မရိတ်၊ ကတုံးမတုံး ပဲနေတဲ့ ဆရာတော် ကျိကုန်း…….
ပေါ့ပေါ့ပါးပါး ပျော်ပျော်ရွှင်ရွှင် နဲ့ သေရည်တစ်ချိန်လုံးသောက်ပြီး ရေမချိုးပဲ နေတတ်တဲ့ ဆရာတော် ကျိကုန်း…..
ဆရာတော် ကျိကုန်း ရဲ့ လူ့ဘဝ ငယ်နာမည် က လီရှိုးယွမ်…
လွန်ခဲ့တဲ့ အနှစ်ကိုးရာနီးပါး….AD 1130 ခုနှစ်၊ ဒီဇင်ဘာလ မှာ ထိုင်ကျိုးမြို့မှာ လီရှိုးယွမ် ကို မွေးဖွားခဲ့တယ်။သူတို့ခေတ်က နာမည်ကြီး စစ်မက်ရေးရာ အရာရှိ လီမောင်ချွန်း ရဲ့ သား…လီရှိုးယွမ် အသက် ဆယ့်ရှစ်နှစ် အရွယ်မှာပဲ မိဘနှစ်ပါးအthetခံလိုက်ရတယ် လို့ ဆိုကြတယ်…ဒါပေမယ့် မိဘနှစ်ပါး ဘာကြောင့် ကံကုန်သွားကြတယ်ဆိုတာတော့ ဘယ်သူမှ မပြောနိုင်ကြဘူး။
အဲ့ဒါနဲ့ အရွယ်ကောင်း လူငယ်လေး လီရှိုးယွမ် ကို ဒေသခံမြို့သူ မြို့သားတွေက သူတို့ မြို့အနီးအနား မှာ ရှိတဲ့ ဟန်ကျိုးမြို့ က လင်းယင် ဘုန်းကြီးကျောင်း ကို ခေါ်သွားပြီး သင်္ကန်းစီးပေးလိုက်ကြတယ်။သင်္ကန်းစီးပြီးတော့ ဘွဲ့တော်ပေးတော့ ကျိကုန်း ဆိုတဲ့ ဘွဲ့တော် မဟုတ်ဘူး…..သူ့ ဘွဲ့တော်က သောက်ကျိ တဲ့….။
ဘွဲ့တော် အဓိပ္ပါယ်က “ကူညီစောင်မပေးသူ” လို့ အဓိပ္ပါယ်ပြန်လို့ရတယ်….။
ကျိကုန်း ရဲ့ အဓိပ္ပါယ်ကျတော့ “စောင်မပေးသူ အရှင်” တဲ့။ကျိကုန်း မဖြစ်သေးခင် ဦးဇင်းသောက်ကျိ ပေါ့
ဦးဇင်းက ဝိနည်းတွေ နဲ့ အညီ နေထိုင်ရတာ ငြီးငွေ့လာတယ်….ဝိနည်းတွေ၊ ဆယ်ပါးသီလတွေ မပြောနဲ့…သူ့ကိုယ်သူ ငါးပါးသီလတောင် အနိုင်နိုင် ထိန်းနေရတယ်လေ။
ဘာလို့လဲဆိုတာ စာဖတ်သူများ သိတယ်မလား….ဘုန်းကြီးဘဝ က မလွတ်လပ်ဘူး တဲ့…။အဲ့တော့ သူလည်း လွတ်လွတ်လပ်လပ်နေချင်တော့ ….. ဝိနည်းတွေ ဖျက်၊ သီလတွေ ဖောက်ပါလေရော။ဦးဇင်းသောက်ကျိ သီတင်းသုံးနေထိုင်နေတာက သက်သတ်လွတ် ကျောင်း….ဒါပေမယ့် ဦးဇင်းက အသားဟင်းတွေချည်းပဲ ဘုဥ်းပေးသတဲ့။ပြီးတော့ သေရည်တွေချည်းပဲ လှိမ့်သောက်နေတာ….။
လူတွေရော ကျောင်းနေဘုန်းကြီးတွေရော ကြာတော့ ချဥ်လာတာပေါ့…။
“ဒီဘုန်းကြီး ဝိနည်းသိက္ခာပုဒ်နဲ့လည်း မညီ၊ မချိုးဖောက်သင့်ဆုံး ကံငါးပါးထဲက နောက်ဆုံးကံကိုမှ ချိုးဖောက်နေတာ၊ ငါတို့ရပ်ရွာထဲ ငါတို့ကျောင်းထဲမှာ မထားသင့်ပေဘူး” ဆိုပြီး သူတို့ကျောင်း၊ ရပ်ရွာကနေ နှင်ထုတ်ကြတယ်။
.
.
ဒါပေမယ့် ဦးဇင်းသောက်ကျိက နှင်ထုတ်ခံရတာ၊ အပြောခံရတောင် ခပ်ပြုံးပြုံးပဲ….။ ဘာကိုမှ စိတ်ထဲမထားတဲ့ အပြုံးမျိုးလေး….။ အဲ့အပြုံးလေး ပန်ဆင်ပြီး သူ့လက်စွဲတော် သေရည်ဘူး၊ ယပ်တောင်လေးတစ်ချောင်းနဲ့ ကျောင်းပေါ်ကဆင်းသွားတော်မူပါလေရော။
ကျောင်းပေါ်က ဆင်းပြီး ခြေဦးတည့်ရာ လျှောက်သွားနေတာ။တစ်ချိန်လုံးမူးနေပေမယ့် စိတ်က မှန်သေးတယ်…။ဘုရားစာတွေ ဖတ်တယ်၊ ရွတ်တယ်။ကလေးတွေကို တွေ့ရင် ဗုဒ္ဓလမ်းစဥ်တွေ သင်ပေးတယ်…၊ ဗုဒ္ဓဝင်ပုံပြင်တွေ ပြောပြတယ်။
အချို့သောသူတွေကိုလည်း အခွင့်ကြုံရင်တရားဟောပြတယ်။
ဦးဇင်းသောက်ကျိ ကို ချစ်တဲ့သူတွေလည်း ရှိသလို မုန်းတဲ့သူတွေလည်း ရှိခဲ့ကြတာပေါ့….။
နယ်လှည့် လျှောက်သွား တရားဟောနေတော့ ဦးဇင်းသောက်ကျိခမျာ သင်္ကန်းတွေလည်း စုတ်ပဲ့၊ ဆံပင်မရိတ်တော့ တစ်ခေါင်းလုံးလည်းစုတ်ဖွာ၊ ရေမချိုးတော့လည်း ညစ်ပတ်နေ၊ သေရည်အရက်ကြောင့် ရုပ်က ရင့်နေတော့ ရုတ်တရက်ကြည့်ရင် အရူးကြီးလားပါပဲ….
သူ့ရဲ့ ခေါင်းဆောင်းလေးကြောင့်သာ ဘုန်းကြီးမှန်းသိသာတာ…
ခေါင်းဆောင်းမှာ 佛 “ဗုဒ္ဓ” ဆိုတဲ့ စာလုံးလေးရေးထားသေးတော့ ဘုန်းကြီးလို့ သိရတာလွယ်တယ်လေ… (တရုတ်လူမျိုးတွေအတွက်ပြောပါတယ်)
ဒီလို နေနေရင်းနဲ့ ဦးဇင်းသောက်ကျိ တစ်ပါး အစွမ်းတွေရလာတော့တာ…. အောက်လမ်းနည်းလား၊ ဝိဇ္ဇာနည်းလား၊ စျာန်ပွင့်တာလား ပဲတော့ မသိဘူး….၊
အနာဂတ်ကို ကြိုမြင်နိုင်သတဲ့လေ။
ခင်ဗျားတို့ စာဖတ်သူတွေကသာ အနာဂတ်ကို ကြိုမြင်နိုင်ခဲ့မယ်ဆိုရင် ဗေဒင်ဟောစားမယ့်သူနဲ့၊ ကိုယ့် crush နဲ့ ကိုယ်နဲ့ ညားမလား ဆိုပြီး ကြည့်မယ့်သူနဲ့၊ ငါထီပေါက်အောင် ဘာဂဏန်းထိုးရမလဲ ကြည့်မယ့်သူနဲ့….
ဟုတ်တယ်မလား….
ဦးဇင်းကြီးကတော့ အနာဂတ်ကိုမြင်နိုင်ပြီဆိုရင်ပဲ လူတွေကို တတ်စွမ်းသမျှကူညီပြီလေ။
တစ်ရက် ရွာတစ်ရွာမှာ မင်္ဂလာဆောင် ကျင်းပတယ်…
အဲ့မင်္ဂလာပွဲကို တစ်ရွာလုံးက ဧည့်ပရိသတ်တွေ တက်ကြတာ ရွာလုံးကျွတ်ပဲ။
ဖြစ်ချင်တော့ အဲ့မင်္ဂလာပွဲ ကျင်းပမယ့်နေရာ အနောက်မှာ တောင်တန်းကြီးရှိတယ်…. အဲ့တောင်တန်းရဲ့ တောင်ခြေလိုနေရာမှာမှ ကျင်းပတာ။
ဦးဇင်းသောက်ကျိက အဲ့တောင်ကနေ မြေပြိုရင် တစ်ရွာလုံးအရှင်လတ်လတ်မြေပိ မယ်ဆိုတာကို သွားမြင်တယ်….
ဒါနဲ့ တစ်ရွာလုံးကို သတိပေးဖို့ ကြိုးစားပေမယ့် မအောင်မြင်ခဲ့ဘူး…
ဘယ်အောင်မြင်မလဲ၊ မူးရူးနေတဲ့ ဘုန်းကြီးလို့ ရွာသားတွေက သတ်မှတ်ထားတာကိုး။
ဒါနဲ့ ဦးဇင်းကလည်း ကြံစည်တွေးတောတယ်… ဘယ်လိုကယ်ရမလဲပေါ့၊
အဲ့ဒါနဲ့ သတို့သမီးကို ဦးဇင်း ဆန်အိတ်ထမ်းသလို ကျောပေါ်မှာ ထမ်းပြီး မင်္ဂလာပွဲကနေ ဦးဇင်း သတို့သမီး ခိုးပြေးရော
ခိုးပြေးတော့ တစ်ရွာလုံး ဦးဇင်းရော သတို့သမီးနောက်ရော လိုက်ပြီး တောင်းပန်သူက တောင်းပန်၊ ငိုတဲ့သူကငို၊ ဦးဇင်းကို ခဲနဲ့ပေါက်တဲ့သူကပေါက် နဲ့….
ရွာနဲ့ အတန်လှမ်းတဲ့နေရာရောက်တော့ ချွက်ချွက်ချွက် နဲ့ ရွာဖက်ကနေ အသံကြားရလို့ အကုန်လှည့်ကြည့်တော့မှအားယိုးယိုး တောင်ပေါ်က မြေပြိုတာ တစ်ရွာလုံး မြေပိပါရောလား….ရွာသားတွေတော့ ဘယ်သူမှ မထိခိုက်ခဲ့ဘူး… ရွာလုံးကျွတ် ဦးဇင်းသောက်ကျိ နဲ့ သတို့သမီး ကို လိုက်ဖမ်းနေရတာကိုး…..
အဲ့တော့မှ သတို့သမီးကို ပြန်ချပေးပြီး တရားဟောကြားတော်မူပါတယ်….
အဲ့မှာပဲ ဘွဲ့တော် သောက်ကျိ ကိုမှ အတိုချုံးပြီး ကျိကုန်း ဆိုပြီး ခေါ်လိုက်တာ အခုအထိ လူအပေါင်းကို ကယ်တင်စောင်မ တဲ့ ကျိကုန်း ဆိုပြီးလူတွေပါးစပ်စွဲသွားပါတော့တယ် ခင်ဗျာ။
အရှင်ကျိကုန်းကတော့ AD 1209 ခုနှစ်၊ မေလ ၁၆ ရက်နေ့သက်တော် ၇၈ နှစ် မှာပဲ ကျင့်ချီဘုန်းကြီးကျောင်းမှာ ဘဝနတ်ထံပျံလွန်တော်မူသွားခဲ့ပါတယ်….
အရှင်ကျိကုန်းက ရဟန္တာများလား၊ ဘုရားလောင်းများလား ဆိုပြီး ယုံကြည်နေကြသလို….တာအိုဘာသာကလည်း သူတို့ရဲ့ နတ်မင်း ဆိုပြီး ကောက်ချက်ချ နေကြပါတယ်….
မည်သို့ပင်ဆိုစေကာမူ ဆရာတော် ကျိကုန်း နဲ့ ပတ်သက်တဲ့ ပါးစပ်ပြောပုံပြင်တွေရော၊ ရုပ်ရှင်ဇာတ်လမ်းတွေရောကြောင့် ကျွန်တော်တို့ရဲ့ ကလေးဘဝဟာ ကြည်နူးဖွယ်ရာ ဖြစ်ခဲ့တာပဲ မဟုတ်ပါလားခင်ဗျ
ရေးသားသူ – Mythical Being in Myanmar
မိုးနတ်မင်း ပရိသတ်ကြီးလည်း အခုသတင်းလေးကိုဖတ်ပြီး ထင်မြင်ချက်တွေကို ကွန်မန့်မှာရေးခဲ့ရင်း မိတ်ဆွေများသိအောင် သတင်းကို မျှဝေပေးခဲ့ပါဦး။