ကမ္ဘာ့စံချိန်တင်ဖို့ ရှိနေတဲ့ ဧရာမဖားပြုတ်ကြီး
မင်္ဂလာပါ ပရိသတ်ကြီးရေ.. မိုးနတ်မင်း သတင်းစုံမှ ကြိုဆိုလိုက်ပါတယ်။ အခုတင်ဆက်ပေးမယ့် သတင်းလေးကတော့ ကမ္ဘာ့စံချိန်တင်ဖို့ ရှိနေတဲ့ ဧရာမဖားပြုတ်ကြီးဆိုတဲ့သတင်းလေးပဲ ဖြစ်ပါတယ်။
သြစတြေးလျနိုင်ငံမြောက်ပိုင်း မိုးသစ်တောထဲမှာ တွေ့ရတဲ့ ဖားပြုတ်ကြီးက ကြီးလွန်းလို့ သားရဲတိရစ္ဆာန် ထိန်းသိမ်းစောင့်ရှောက်ရေး အရာရှိတွေတောင် အရုပ်ကြီးလို့ အထင်မှားခဲ့ကြပါသေးတယ်။ သာမန်ဖားပြုတ်တွေထက် ၆ ဆကျော် ပိုကြီးထွားပြီး ခန္ဓာကိုယ်အလေးချိန် ၂.၇ ကီလိုဂရမ်ရှိလို့ ကမ္ဘာ့စံချိန်သစ် တင်နိုင်ဖို့ ရှိနေပါတယ်။(ယခင်စံချိန်ဟောင်းမှာ ၂.၆၅ ကီလိုဂရမ်ရှိ)
တုတ်ဇီလာလို့ နာမည်ပြောင်ပေးထားတဲ့ ဖားပြုတ်ကြီးဟာ အင်းဆက်ပိုးမွှားတွေ၊ တွားသွားသတ္တဝါတွေနဲ့ နို့တိုက်သတ္တဝါငယ်တချို့ကို ဖမ်းယူစားသောက်ရင်း အကောင်ကြီးထွားလာတာ ဖြစ်မယ်လို့ ယူဆထားပါတယ်။ ဖားပြုတ်တွေဟာ တောထဲမှာ သက်တမ်း ၁၅ နှစ်အထိ ရှင်သန်နိုင်ပြီး ဒီဖားပြုတ်ကြီးရဲ့ သက်တမ်းကိုတော့ ခန့်မှန်းနိုင်ခြင်း မရှိသေးပါဘူး။
ဖားပြုတ်ကြီးကို ခန္ဓာကိုယ်အလေးချိန် ချိန်တွယ်ပြီးနောက်မှာတော့ သြစတြေးလျနိုင်ငံရဲ့ သီးနှံပင်ဖျက်ပိုးကောင်များအပေါ် ချမှတ်ထားတဲ့ မူဝါဒအတိုင်း ဆေးထိုးပြီး ဇီဝိန်ချုပ်စေခဲ့တာပါ။ ဖားပြုတ်ကြီးရဲ့ ရုပ်ကြွင်းကိုတော့ ကွင်းစ်လန်းပြတိုက်ထံ လှူဒါန်းသွားမှာ ဖြစ်ပါတယ်။
၁၉၃၅ ခုနှစ်ကျမှ သြစတြေးလျနိုင်ငံမှာ ဖားပြုတ်တွေ စတင်ရောက်ရှိလာခဲ့တာဖြစ်ပြီး သီးနှံပင်တွေကို အဖျက်ဆီးဆုံးပိုးမွှားတစ်မျိုးအဖြစ် သတ်မှတ်ထားပါတယ်။ လက်ရှိအချိန်မှာတော့ သြစတြေးလျနိုင်ငံမှာ ဖားပြုတ် ၂ ဘီလျံအထိ ရှိနေပါတယ်။
ရေးသားသူ – Yoyarlay
မိုးနတ်မင်း ပရိသတ်ကြီးလည်း အခုသတင်းလေးကိုဖတ်ပြီး ထင်မြင်ချက်တွေကို ကွန်မန့်မှာရေးခဲ့ရင်း မိတ်ဆွေများသိအောင် သတင်းကို မျှဝေပေးခဲ့ပါဦး။
