ကိုရိုနာ ကပ်ဘေးကာလအတွင်း ပိတ်ဆို့ကန့်သက်မှုများကြောင့် အွန်လိုင်းကူးသန်းရောင်းဝယ်မှုနှင့် ဂိမ်းလုပ်ငန်းများ ဖွံံံဖြိုးတိုးတက်လာခဲ့ပြီး တရုတ်သန်းကြွယ်သူဌေးများသည် ၂၀၂၀ တွင် ဒေါ်လာ ၁.၅ ထရီလီယန်အထိ စံချိန်တင်ချမ်းသာလာကြောင်း အောက်တိုဘာ ၂၀ တွင်ထုတ်ပြန်သည့် ချမ်းသာမှု အစီအရင်ခံသာတွင် ဖော်ပြခဲ့သည်။
ကမ္ဘာ့ဒုတိယအကြီးဆုံး စီးပွားရေးနိုင်ငဲံဖြစ်သော တရုတ်တွင် ဩဂုတ်လအတွင်းက ဘီလျံနာစာရင်းသို့ အသစ်ပါလာသူ ၂၅၇ ဦးရှိခဲ့ပြီး ၂ နှစ်ဆက်တိုက် ဘီလျံနာ အရေအတွက်များ ကျဆင်းနေခဲ့ရာမှ ယခုနှစ်တွင် တရုတ်နိုင်ငံ၌ ဘီလျံနာဦးရေ တိုးလာခဲ့ခြင်းဖြစ်ကြောင်း သိရသည်။
တရုတ်တွင် ယခုအခါ ဘီလျံနာ ၈၇၈ ဦးထိရှိလာပြီး အမေရိကတွင် ဘီလျံနာ ၆၂၆ ဦးရှိခဲ့ကြောင်း Hurun ၏ စာရင်းများက ဆိုသည်။ ဩဂုတ်လက ဒေါ်လာသန်း ၃၀၀ (ယွမ် ၂ ဘီလျံ) အထက်ချမ်းသာသူ ၂,၀၀၀ ခန့်ရှိကြောင်း ၎င်းသူဌေးများ၏ ပိုင်ဆိုင်မှာသည် ဒေါ်လာ ၄ ထရီလီယံ ရှိသည်ဟု Hurun က ပြောကြားခဲ့သည်။
Alibaba တည်ထောင်သူ တရုတ်သူဌေးကြီး ဂျက်မားသည် ၂၀၂၀ အတွင်း ပိုင်ဆိုင်မှု ၄၅% တိုးတက်လာပြီး ဒေါ်လာ ၅၈.၈ ဘီလျံအထိ ချမ်းသာလာခဲ့သည်။ Tencent တရုတ်ဂိမ်းလုပ်ငန်းကို ပိုင်ဆိုင်သူ ပိုနီးမားသည် ပိုင်ဆိုင်မှု ၅၀% တိုးတက်လာပြီး ၅၇.၄ ဘီလျံအထိ ချမ်းသာလာခဲ့သည်။ Nongfu ရေသန့်လုပ်ငန်းနှင့် ထင်ရှားသော အသက်၆၆ နှစ်အရံယ် ကျောင်ရှန်ရှန်သည် တရုတ်ဘီလျံနာ စာရင်းတွင် ပထမဦးဆုံးပါဝင်လာပြီး ၅၃.၇ ဘီလျံနှင့် တရုတ်တွင် တတိယ အချမ်းသာဆုံးပုဂ္ဂိုလ် ဖြစ်လာခဲ့သည်။
တစ်နှစ်အတွင်း ဒီလောက်ချမ်းသာလာကြတာမျိုး ကမ္ဘာပေါ်မှာ ဘယ်သူမှ မကြုံဘူးပါဘူးဟု Hurun Report ၏ သုတေသန ပညာရှင် ခေါင်းဆောင်ရူးပတ်ဟူးဂဲဝက်က ပြောကြားသည်။ ယခုနှစ်စာရင်းအရ တရုတ်သည် ကုန်ထုတ်လုပ်မှုနှင့် အိမ်ခြံမြေကဲ့သို့သော အစဉ်အလာကဏ္ဍများမှ ဖယ်ခွာပြီး digital စီးပွားရေးသစ်ကို ကူးပြောင်းလာကြောင်း ဖော်ပြခဲ့သည်ဟု ၎င်းကပြောကြားသည်။