တရုတ်အစိုးရက ပထမဆုံးအကြိမ် တရားဝင်သုံးစွဲခွင့်ပြုခဲ့တဲ့ ကိုဗစ်ကာကွယ်ဆေးကို တရုတ်ပြည်သူအားလုံးကို အခမဲ့ ထိုးပေးသွားမှာဖြစ်တယ်လို့ တာဝန်ရှိသူတွေက ဒီနေ့ပြောကြားလိုက်ပါတယ်။
ဘေဂျင်း ဇီဝဆေးပစ္စည်းထုတ်လုပ်ရေးကုမ္ပဏီက စမ်းသပ်ထုတ်လုပ်တဲ့ Sinopharm ကိုဗစ်ကာကွယ်ဆေးကို တရုတ်အစိုးရက ကန့်သတ်ချက်နဲ့ အသုံးပြုဖို့ ခွင့်ပြုခဲ့ပြီးတဲ့နောက် တရုတ်ကျန်းမာရေးကော်မရှင် ညွှန်ကြားရေးမှူးက ခုလိုပြောကြားလိုက်တာဖြစ်ပါတယ်။
“ပြီးခဲ့တဲ့ သီတင်း နှစ်ပတ်အတွင်း တရုတ်နိုင်ငံတဝန်းက အဓိကလိုအပ်တဲ့ ပြည်သူတွေအတွက် ဆေး ၃,၀၀၀,၀၀၀ နဲ့ နောက်ထပ် ၁.၅ သန်း ထိုးပေးခဲ့ပြီး ကိုဗစ်ကာကွယ်ဆေးဟာ လုံခြုံစိတ်ချရတယ်ဆိုတဲ့ အထောက်အထားအပြည့်အဝရှိကြောင်းနဲ့ တရုတ်နိုင်ငံသားအားလုံးကို ကိုဗစ်ကာကွယ်ဆေး အခမဲ့ ထိုးပေးသွားမှာဖြစ်ကြောင်း” တရုတ်ကျန်းမာရေးကော်မရှင် ညွှန်ကြားရေးမှူး Zeng Yixin က ဒီကနေ့သတင်းစာရှင်းပွဲမှာ ပြောကြားသွားခဲ့ပါတယ်။ Sinopharm ကိုဗစ်ကာကွယ်ဆေးကို ကျယ်ကျယ်ပြန့်ပြန့် စမ်းသပ်ခဲ့မှုတွေအတွင်း ထိရောက်မှု ၇၉% ကျော်ရှိတာတွေ့ရတယ်လို့ ကုမ္ပဏီက ပြောပါတယ်။
ဗြိတိန်နိုင်ငံမှာလည်း Oxford တက္ကသိုလ်နဲ့ AstraZeneca ဆေးကုမ္ပဏီတို့ ပူးပေါင်းထုတ်တဲ့ ကိုဗစ်ကာကွယ်ဆေးကို အစိုးရက အရေးပေါ်သုံးစွဲခွင့် ဗုဒ္ဓဟူးနေ့က ခွင်ပြုခဲ့ပါတယ်။
ဗြိတိန်နိုင်ငံမှာ စတင်တွေ့ခဲ့တဲ့ ပိုပြီးကူးစက်လွယ်တဲ့ ဗီဇပြောင်း ကိုဗစ်ရောဂါပိုးအမျိုးအစားသစ်တွေကို ကမ္ဘာ့နိုင်ငံတော်တော်များများမှာ စမ်းသပ်တွေ့ရှိနေချိန်မှာ ခုလို ကိုဗစ်ကာကွယ်ဆေးတွေကို အစိုးရတွေက တရားဝင်သုံးစွဲခွင့်ပြုနေတာဖြစ်ပါတယ်။ အမေရိကန်ပြည်ထောင်စု San Diego မြို့မှာ ကိုဗစ်ရောဂါပိုးသစ်ကိုတွေ့ရှိတယ်လို့ California ပြည်နယ်တာဝန်ရှိသူတွေက ဗုဒ္ဓဟူးနေ့က ပြောကြားခဲ့ပါတယ်။ Colorado ပြည်နယ်မှာလည်း ဗီဇပြောင်းကိုဗစ်ပိုးသစ်ကူးစက်သူ ရှိတယ်လို့ ပြည်နယ်ကျန်းမာရေးတာဝန်ရှိသူတွေက ပြောကြားထားပါတယ်