ဟောလိဝုဒ်လောကထဲ မဝင်ရောက်တော့ဘဲ လက်လျှော့ခဲ့တဲ့အကြောင်းအရင်းကို ထုတ်ပြောခဲ့တဲ့ ဂျက်ကီချမ်း
မင်္ဂလာပါ ပရိသတ်ကြီးရေ.. မိုးနတ်မင်း သတင်းစုံမှ ကြိုဆိုလိုက်ပါတယ်။ အခုတင်ဆက်ပေးမယ့် သတင်းလေးကတော့ ဟောလိဝုဒ်လောကထဲ မဝင်ရောက်တော့ဘဲ လက်လျှော့ခဲ့တဲ့အကြောင်းအရင်းကို ထုတ်ပြောခဲ့တဲ့ ဂျက်ကီချမ်း ဆိုတဲ့သတင်းလေးပဲ ဖြစ်ပါတယ်။
ဝါရင့်အက်ရှင်မင်းသားကြီး ဂျက်ကီချမ်းဟာ ဟောလိဝုဒ်လောကမှာ နေရာတစ်နေရာစာယူနိုင်ပေမဲ့ အဲဒီလောကမှာ မကျင်လည်ခဲ့ပါဘူး။ ဘာလို့ အဲဒီလိုမလုပ်ခဲ့တာလဲဆိုတာကို Reality TV Show “Memories Beyond Horizon” မှာ သူ ထုတ်ပြောပြခဲ့ပါတယ်။ သူ လိုချင်တဲ့ ပုံစံမျိုးနဲ့ တန်ဖိုးထားအသိအမှတ်ပြုမခံရဘူးဆိုတာ သူသိလာတဲ့အချိန်မှာ အမေရိကန်အနုပညာလောကကထဲ မဝင်ရောက်တော့တာဖြစ်တယ်လို့ အမေရိကန်မှာ ရုပ်ရှင်ရိုက်ကူးတဲ့အတွေ့အကြုံတွေကို မျှဝေရင်းနဲ့ အခုလို ပြောခဲ့ပါတယ်။
“ကျွန်တော် ရုပ်ရှင်ရိုက်ဖို့ အမေရိကန်သွားခဲ့တဲ့အချိန် ကျွန်တော့်ရဲ့အင်္ဂလိပ်စာက တော်တော်ဆိုးတယ်။ ဇာတ်ညွှန်းစာသားတစ်ကြောင်းကို မှတ်မိဖို့ တစ်လလောက် အချိန်ယူခဲ့ရတယ်။ အိပ်နေတဲ့အချိန်မှာတောင် အိပ်မက်ထဲမှာ ဇာတ်ညွှန်းစာသားတွေ ဖတ်နေခဲ့တယ်။ ကျွန်တော် ပြောချင်တဲ့စကားတွေက အများကြီး၊ ကျွန်တော် ပြောမထွက်ဘူး။ အရမ်းစိတ်ပျက်စရာကောင်းခဲ့တယ်”တဲ့။
သူ အသံထွက်ကို မှန်ကန်စွာ မထွက်နိုင်ရင် မှန်ကန်ပြီး သဘာဝကျကျ အသံထွက်နိုင်တဲ့အထိ ဇာတ်ညွှန်းစာသားကို ထပ်ထပ်ခါခါ ပြောခဲ့ရတယ်။ သူ အသံထွက်မှန်သွားတဲ့အခါမှာ ဒါရိုက်တာဆီက ချီးကျူးမှုကို ခံရပေမဲ့ အဲဒါက သူ လိုချင်တဲ့အရာမဟုတ်ခဲ့ဘူးလို့ သူက ပြောပါတယ်။
“ကျွန်တော့်ရဲ့အက်ရှင်တွေနဲ့ သရုပ်ဆောင်တာတွေက ကောင်းလားဆိုတာကို ဘယ်သူမှ ဂရုမစိုက်ကြဘူး။ သူတို့က ကျွန်တော် ဇာတ်ညွှန်းစာသားမှန်မှန်ကန်ကန်ထွက်နိုင်တဲ့အခါမှပဲ ချီးကျူးခဲ့တယ်။ ရုပ်ရှင်ရိုက်ပြီးရင် ကျွန်တော့်ရဲ့အင်္ဂလိပ်စာဆရာနဲ့ လေ့ကျင့်ဖို့အတွက် ကျွန်တော့်ကားနဲ့ အမြန်ပြန်သွားခဲ့ရတယ်။ ကျွန်တော် အင်္ဂလိပ်စာကို လေ့ကျင့်နေတုန်း “ငါ ဒီလို ဆက်မလုပ်နိုင်တော့ဘူး”လို့ ကိုယ့်ကိုယ်ကို ပြောနေခဲ့တယ်။ အဲဒါကြောင့်ပဲ ကျွန်တော် အမေရိကန်အနုပညာလောကကို စွန့်လွှတ်ခဲ့တာပါ”လို့ ဂျက်ကီချမ်းက ဆိုပါတယ်။
ရေးသားသူ – Yoyarlay
မိုးနတ်မင်း ပရိသတ်ကြီးလည်း အခုသတင်းလေးကိုဖတ်ပြီး ထင်မြင်ချက်တွေကို ကွန်မန့်မှာရေးခဲ့ရင်း မိတ်ဆွေများသိအောင် သတင်းကို မျှဝေပေးခဲ့ပါဦး။