မသောက်ဘဲမူးတတ်တဲ့ Auto-brewery syndrome (ABS) ရောဂါလက္ခဏာစု
,ရေး လူးဝစ်စ်ကို သူ့ရဲ့ ABS ရောဂါလက္ခဏာစုကနေ ခံနိုင်ရည်ရှိအောင် ခွေးလေး မီယာက ကူညီ
မကြာသေးခင်က ဘယ်လ်ဂျီယမ် အမျိုးသားတစ်ဦး ဥပဒေအရ ခွင့်ပြုထားတဲ့ သွေးတွင်းအရက်ပမာဏ ရေချိန်ထက် ၃ ဆကျော်နေတာတောင် အရေးယူမခံခဲ့ရတဲ့အတွက် ဟိုးလေးတစ်ကျော် ဖြစ်သွားခဲ့ပါတယ်။
ရေး လူးဝစ်စ် ဆိုသူ အသက် ၄၀ အရွယ် အမျိုးသားက သူ့ခန္ဓာကိုယ်မှာ အလိုအလျောက် အရက်တွေ ထုတ်ပေးတဲ့ auto-brewery syndrome (ABS) လို့ခေါ်တဲ့ ရှားပါးရောဂါလက္ခဏာစု တစ်မျိုး ရှိနေတယ်ဆိုတာကို ဆေးဘက်ဆိုင်ရာကျွမ်းကျင်သူတွေရဲ့ အကူအညီနဲ့ သက်သေပြခဲ့တာ ဖြစ်ပါတယ်။
ဒီတော့ ABS ဆိုတာ ဘယ်လို ရောဂါမျိုးပါလဲ။ ဒီရောဂါကို ခံနိုင်ရည်ရှိအောင် အိမ်မွေးခွေး တစ်ကောင်က ဘယ်လိုကူညီပေးနိုင်ပါလဲ။
အမေရိကန်နိုင်ငံ အော်ရီဂွန်ပြည်နယ်က ဆေးရုံပေါ်မှာ သူနိုးလာချိန် ရေး လူးဝစ်စ် သိလိုက်တာ နှစ်ခု ရှိပါတယ်။ ပထမတစ်ခုက ဇီဝနည်းပညာရှင်အဖြစ် သူအလုပ်လုပ်နေတဲ့ ငါးနဲ့ တောရိုင်းတိရစ္ဆာန်ဌာနက ငါးအရှင် ၁၁၀၀၀ သယ်လာတဲ့ ထရပ်ကား တိုက်မိခဲ့တဲ့အတွက် သူ ပြဿနာတက်နေပြီ ဆိုတာပါ။
ဒုတိယအချက်ကတော့ ကားတိုက်မှုဖြစ်ခဲ့တဲ့ ၂၀၁၄ ခုနှစ် ဒီဇင်ဘာလ ညတုန်းက ရေးရဲ့ သွေးထဲမှာ အရက်ပမာဏ အများကြီး ရှိနေတယ်လို့ ရဲက စမ်းသပ်တွေ့ခဲ့ပေမဲ့ သူအရက် တစ်ခွက်မှ မသောက်ခဲ့ဘူး ဆိုတဲ့အချက်ပါ။
“ရေတွေခဲနေတဲ့ လမ်းပေါ်မှာ နှစ်နာရီကြာ ကားမောင်းရမှာမို့ အရက် တစ်စက်မှတောင် ကျွန်တော် မတို့ခဲ့ဖူးဆိုတာ သေချာပါတယ်” လို့ အသက် ၅၄ နှစ်အရွယ် ရေး က ပြန်ပြောပြပါတယ်။
အဲဒီ ကားတိုက်မှု ဖြစ်ခဲ့အပြီး ၈ လအကြာမှာ သူ့မှာ ABS ရောဂါ ရှိနေတယ် ဆိုတာကို စမ်းသပ်တွေ့ခဲ့ပြီး သူ့ခန္ဓာကိုယ်က သူ့ကို အရက်မူးအောင် လုပ်စေခဲ့တယ်ဆိုတာကို ရေး သိခဲ့ရပါတယ်။
ယခုဆောင်းပါးတွင် Twitter မှ အကြာင်းအရာများပါဝင်ပါသည်။ ယင်းဆိုက်မှ ကွတ်ကီးနှင့်အခြားနည်းပညာများသုံးနိုင်သဖြင့် စာမျက်နှာကို မဖွင့်ခင် သင့်ခွင့်ပြုချက်ကိုတောင်းခံပါသည်။ သင်မဆုံးဖြတ်ခင် Twitter ကွတ်ကီးမူဝါဒ နှင့် ကိုယ်ရေးအချက်အလက်လုံခြုံမှု မူဝါဒ တို့ကို ဖတ်ရှုနိုင်ပါသည်။ သဘောတူလျင် ‘လက်ခံပြီးဆက်သွားပါမည်’ ဆိုသည်ကို ရွေးချယ်ပေးပါ။
ABS ဆိုတာ ဘယ်လို ရောဂါလက္ခဏာစုလဲ
ABS ဒါမှမဟုတ် အူအချဉ်ပေါက်တဲ့ ရောဂါလက္ခဏာစု (GFS) ဟာ သွေးထဲမှာ အရက်ပမာဏ မြင့်တက်စေပြီး အရက်မဆိုစလောက် ဒါမှမဟုတ် လုံးဝမသောက်ခဲ့ရင်တောင် အရက်မူးတတ်စေတဲ့ ထူးဆန်းတဲ့ ရောဂါလက္ခဏာစုတစ်ခု ဖြစ်ပါတယ်။
အူ၊ ဆီးလမ်းကြောင်း ဒါမှမဟုတ် ပါးစပ်ထဲမှာရှိတဲ့ ဘက်တီးရီးယားက ကာဘွန်ဟိုက်ဒြိတ်နဲ့ သကြားဓာတ်ကို အရက်အဖြစ် ချေဖျက် ပြောင်းလဲပေးလိုက်တဲ့အခါ အဲဒီလို ဖြစ်လာစေတတ်ပါတယ်။
အဲဒီကနေ အာလေးလျှာလေး၊ ဒယိမ်းဒယိုင် ဖြစ်လာတတ်ပြီး အရက်နံ့တထောင်းထောင်းနဲ့ အရက်နာကျတတ်ပါတယ်။
ဒီရောဂါလက္ခဏာစုကို အစောဆုံးတွေ့ခဲ့တာကတော့ ၁၉၄၀ ပြည့်လွန်နှစ်တွေတုန်းက ဖြစ်ပြီး ယူဂန်ဒါဆေးရုံတစ်ခုက ဆရာဝန်တွေက လူသေအလောင်းတစ်ခု ခွဲစိတ်ခဲ့အပြီး ရလဒ်တွေကို ဗြိတိန်နိုင်ငံထုတ် ဆေးပညာဂျာနယ်မှာ ဖော်ပြခဲ့တာ ဖြစ်ပါတယ်။ အစာအိမ်ပေါက်ပြီး ဆုံးပါးသွားတဲ့ အသက် ၅ နှစ်အရွယ် ကလေးငယ်တစ်ဦးကို ခွဲစိတ်နေတုန်း သူ့ရဲ့ အစာချေစနစ်ကနေ “အရက်နံ့ဆိုးကြီး ” ရခဲ့ကြတယ်လို့ ဆိုပါတယ်။
ခန္ဓာကိုယ်ထဲမှာ အရက်ထုတ်နိုင်တဲ့ Saccharomyces cerevisiae မှို ကို မိုက်ခရိုစကုပ် မှန်ပြောင်းနဲ့ တွေ့ရပုံ
ဘယ်လိုလူတွေမှာ ဖြစ်လေ့ရှိသလဲ
ABS ရောဂါလက္ခဏာစု ဖြစ်ဖို့က အရမ်းကို ရှားပါတယ်။ အစာအိမ်ရောဂါဆိုင်ရာ အမေရိကန်ဆေးပညာ ဂျာနယ်တစ်ခုမှာ ဖော်ပြခဲ့တဲ့ ၂၀၂၁ ခုနှစ် လေ့လာချက်တစ်ခုအရ ဒီရောဂါဖြစ်နေတာကို ဆရာဝန်ပြတာ သိပ်မရှိဘူးလို့ ကျွမ်းကျင်သူ တချို့က ယူဆထားကြသလို အမေရိကန်မှာ ဒီရောဂါစု ဖြစ်ပွားမှုက ၁၀၀ လောက်တောင် မရှိဘူးလို့ သိရပါတယ်။
လူတချို့မှာ ဘာ့ကြောင့် ဒီရောဂါ ဖြစ်ရသလဲဆိုတာကို ဆရာဝန်တွေက ခုထိ အသေအချာ မသိကြသေးပါဘူး။
လူ့ခန္ဓာကိုယ်မှာ အစာချေစနစ်ရဲ့ တစ်စိတ်ပိုင်းအဖြစ် အူထဲမှာ အရက်ပမာဏ အနည်းအပါး ထုတ်လုပ်လေ့ရှိတယ်ဆိုတာကို သိထားကြပြီး ဖြစ်ပါတယ်။ ဒါပေမဲ့ လူပုဂ္ဂိုလ်တစ်ဦးတစ်ယောက်ချင်းကို ကြည့်မယ်ဆိုရင် အများစုက ပထမအဆင့် ဇီဝ ဖြစ်စဉ်မှာပဲ အဲဒီအရက်က သူတို့ရဲ့သွေးထဲမရောက်ခင် ပျောက်ပြယ်သွားတတ်ကြပါတယ်။
“ကျွန်တော်တို့အားလုံး ခန္ဓာကိုယ်ထဲမှာ သဘာဝအလျောက် အရက်အနည်းအပါး ထုတ်တတ်ကြပါတယ်။ ဒါပေမဲ့ ABS ရောဂါရှိသူ တချို့ကတော့ ပိုများများ ထုတ်တတ်ကြပြီး သွေးကြောထဲကို စီးသွားပါတယ်။” လို့ ပေါ်တူဂီနိုင်ငံ အခြေစိုက် ဇီဝဆေးပညာ အထူးကုနဲ့ မှုခင်းကျွမ်းကျင်သူ တစ်ဦးလည်းဖြစ်၊ ဒီရောဂါစုအကြောင်း စာတမ်းအများအပြား ထုတ်ပြန်ခဲ့သူလည်း ဖြစ်တဲ့ ဒေါက်တာ ရီကာဒို ယော့ဂ် ဒီနစ်စ်-အိုလီဗေရာ က ရှင်းပြပါတယ်။
တချို့က အရက်သောက်ထား မထား အစစ်ခံရမှု မအောင်တဲ့အခါကျမှ သူတို့မှာ ABS ရောဂါ ရှိနေမှန်းသိကြ
၀မ်းနည်းစရာကောင်းတာက ဒီလို ရောဂါမျိုး ခံစားနေရတဲ့သူတွေကို သိသိကြီးနဲ့ ရာဇဝတ်မှု စွဲချက်တင်တာမျိုးတွေ ရှိနေတာပါ။
အရာပေါင်းစုံ ချက်ချင်းထဖြစ်ရာကနေ ပေါ်လာတတတ်တာမို့ ဒီ ABS ရောဂါစုကို ဇီဝဖြစ်ပျက်မှု မုန်တိုင်းတစ်ခုအဖြစ် သူက ရည်ညွှန်းပြောခဲ့ပါတယ်။ ပထမပိုင်းမှာ ဆီးချို၊ အဝလွန်၊ ခရုန်းရောဂါ စတဲ့ ရောဂါတွေ ရှိနေရာကနေ ဒီရောဂါ စလေ့ရှိတယ်လို့ ဆိုပါတယ်။
ဒုတိယပိုင်းကတော့ အဲဒီလူနာတွေက မကြာခဏ သောက်နေရတဲ့ ပဋိဇီဝဆေးနဲ့ ကိုယ်ခံအား ထိန်းညှိဆေးတွေလို ဆေးဝါးတွေနဲ့ ဆက်နွှယ်နေပါတယ်။ အဲဒီဆေးတွေက အူအတွင်းပိုင်းမှာ ရှင်သန်ပေါက်ဖွားနေတဲ့ ဘက်တီးရီးယားတွေနဲ့ တခြား သက်ရှိဇီဝတွေကို ထိခိုက်စေတာ ဖြစ်ပါတယ်။
ABS ရောဂါစုနဲ့ အသက်ဆက်နေရသူ
အမေရိကန် သူနာပြု ဂျိုး ကော်ဒဲလ် ရဲ့ ဖြစ်ရပ်ကိုကြည့်မယ်ဆိုရင် မိသားစု ကျေးဇူးတော်ချီးမွမ်း ညစာပွဲတစ်ခုအတွင်း အာလေးလျှာလေး ဖြစ်ပြီး သတိမေ့သွားခဲ့တာပါ။ သူက ကြက်ဆင်သား အစားများသွားလို့ ဖြစ်တာလို့ ထင်ခဲ့မိပါတယ်။
ဒါပေမဲ့ အဲဒီနောက်မှာ သူအလုပ်ခွင်မှာ အရက်မူးနေတယ် ဆိုပြီး တက္ကဆက်စ်ဆေးရုံက သူနဲ့အလုပ်အတူလုပ်တဲ့ သူနာပြုတစ်ဦးက စွပ်စွဲခဲ့ပါတယ်။ ဒါက အလုပ်ပြုတ်နိုင်လောက်တဲ့ ပြစ်မှုမျိုးပါ။
“ကျွန်တော့်ဆီက အရက်နံ့ရတယ် ဆိုပြီး သူတို့က ပြောတယ်။ ကျွန်တော့်ကို အရက်စွဲနေသူလို့ လူတွေက ထင်ခဲ့ကြတယ်။” လို့ အသက် ၇၂ နှစ်အရွယ် မစ္စတာ ကော်ဒဲလ် က ပြန်ပြောပြပါတယ်။
“ကျွန်တော်က အလုပ်လုပ်ရတာ ပျော်တဲ့သူ ဖြစ်ပြီး တစ်ရက်ကလေးမှ အလုပ်မပျက်ခဲ့တဲ့သူမို့ ဒီလို စွပ်စွဲခံရတာ သိက္ခာလည်းကျ၊ ရှက်လည်း ရှက်မိပါတယ်”
ဂျိုးမှာ ABS ရောဂါ ရှိနေတာကို စစ်ဆေးတွေ့ခဲ့အပြီး ဇနီးသည် ဘာဘရာက ABS ရောဂါအကြောင်း လိုက်လံပညာပေးသူတစ်ဦး ဖြစ်လာခဲ့
အချိန်အတော်ကြာတဲ့အထိ သူ့ဇနီး ဘာဘရာတောင် သူအရက်စွဲနေတယ်လို့ သံသယဖြစ်ခဲ့ပါတယ်။
လုပ်ဖော်ကိုင်ဖက် သူနာပြုတစ်ဦးလည်း ဖြစ်တဲ့ ဘာဘရာဟာ ခင်ပွန်းသည်ကို ယုံဖို့ အတော်လေး ကြိုးစားခဲ့ရပါတယ်။ သူတို့အိမ်ထဲမှာ အရက်ပုလင်းတွေ ဖွက်ထားတာများ ရှိမလားဆိုပြီးတောင် လိုက်ရှာခဲ့ပါသေးတယ်။ အိမ်မှာရှိတဲ့ အရက်တွေ လျော့မလျော့ ဆိုတာကိုလည်း အမြဲ စောင့်ကြည့်ခဲ့ပါတယ်။
“ပထမတော့ ဂျိုးကို သံသယ ဖြစ်မိခဲ့တယ် လို့ ဘာဘရာက ဝန်ခံခဲ့ပါတယ်။ ကျွန်မတို့အိမ်မှာရှိတဲ့ အရက်ပုလင်းတွေကို ခိုးသောက်မသောက် ဆိုတာသိဖို့ အမှတ်အသား လုပ်ထားပြီး ရေပြန်ရောထားသလား ဆိုတာကိုလည်း စစ်ကြည့်လေ့ ရှိပါတယ်။”
စွပ်စွဲမှုတွေ၊ ပြစ်တင်မှုတွေခံနေရတဲ့ကြားမှာပဲ ဗြုန်းကနဲ ဒိုင်းကနဲ အရက်မူးတဲ့ ဝေဒနာ ဖြစ်လာမှာကို အကြောက်ကြီး ကြောက်နေမိတယ် လို့ ဂျိုးက ပြောပါတယ်။
“အရမ်းကို စိတ်အနှောင့်အယှက် ဖြစ်စရာ ကောင်းလှပါတယ်။ ဒီလို ဝေဒနာ ဖြစ်လာတဲ့အချိန်ဆိုရင် စိတ်ပိုင်းရော ခန္ဓာကိုယ်ပိုင်းပါ အခံရဆိုးလှပါတယ်။” လို့ သူကပြောပါတယ်။
,ကာဘိုဟိုက်ဒြိတ်ပါတဲ့ အစာတွေလျှော့စားတာက ABS ရောဂါစုကို ထိန်းရာမှာ အထောက်အကူဖြစ်
ရောဂါလက္ခဏာ ပထမဆုံး စခံစားခဲ့ရအပြီး ၄ နှစ်အကြာ ၂၀၁၀ ခုနှစ်မှာ ဂျိုးမှာ ABS ရောဂါ ရှိနေတယ်ဆိုတာကို စစ်ဆေးတွေ့ခဲ့ပါတယ်။ သူ အလုပ်ဆက်လုပ်ခွင့် ရခဲ့ပေမဲ့ သွေးထဲမှာ အရက်ရှိနေ မနေ ဆိုတာကိုတော့ နေ့စဉ် စစ်ခဲ့ရပါတယ်။
ဒီအတွေ့အကြုံကြောင့် သူ့ဇနီး ဘာဘရာက Auto-Brewery Syndrome Advocacy and Research ဆိုတဲ့ ABS ရောဂါသည်တွေကို အားပေးကူညီတဲ့ အဖွဲ့တစ်ဖွဲ့ကို ထောင်ဖြစ်ခဲ့ပါတယ်။ အခုဆိုရင် အဲဒီအဖွဲ့မှာ အဖွဲ့ဝင် ၈၅၀ နီးပါး ရှိနေပါပြီ။
“ဆရာဝန်တွေက မကြည့်ဘဲ ပြန်လွှတ်တာ ခံရတယ်ဆိုပြီး လူနာတွေ ပြောတာကို နေ့စဉ်ရက်ဆက် ကြားနေရပါတယ်” လို့ ဘာဘရာက ပြောပြပါတယ်။
“အဆိုးဆုံးက ရောဂါရှိချင် ယောင်ဆောင်နေတာလို့ စွပ်စွဲပြီး သူတို့ကို ဆူပူကြိမ်းမောင်း အရှက်ခွဲတာမျိုး လူလိမ်တွေလို့ ခေါ်တာမျိုး ဒါမှမဟုတ်ရင်တော့ ပြီးစလွယ် ကုပေးလိုက်တာမျိုးတွေ ခံနေရပါတယ်။”
ဒါ့အပြင် သူနဲ့အတူ ပူးပေါင်းလုပ်နေတဲ့ အဖွဲ့ဝင် အတော်များများက ဆေးကုသမှု စလိုက်ပြီဆိုတာနဲ့ အရက်ဖြတ်တဲ့ ရောဂါလက္ခဏာတွေကို စခံစားလာရတော့တယ်လို့ ပြောပြကြပါတယ်။
“အချိန်ကြာလာတာနဲ့အမျှ အဲဒီလူတွေဟာ အရက်နဲ့ ကျင့်သားရလာပြီး အရက်ဖြတ်လို့ ခံစားရတဲ့ ရောဂါလက္ခဏာတွေကို ရှောင်ချင်တဲ့အတွက် အရက်ကို စွဲသောက်လာတတ်ကြပါတယ်။”
သူဆိုရင် အရက် သောက်ချင်တဲ့ အာသီသစိတ်က တစ်နေ့တခြား တိုးလာခဲ့တယ်လို့ ဂျိုးက ပြောပြပါတယ်။ “အရက်ဖြတ်နိုင်ဖို့ အကူအညီတောင်းခဲ့ရပါတယ်။ အခုတော့ အရက်ပြတ်သွားတာ ၁၀ နှစ်ရှိနေပါပြီ။”
ABS ရှိမရှိ ဘယ်လိုစမ်းသပ်မလဲ၊ ဘယ်လိုကုသမလဲ
ဒီရောဂါလက္ခဏာတွေက တခြားရောဂါတွေကြောင့် ဖြစ်တာလား ဆိုတာကို ဆရာဝန်တွေက ပထမဆုံး စမ်းသပ်ကြည့်ပါလိမ့်မယ်။ မဟုတ်ဘူးဆိုရင် အရက်ထုတ်ပေးတဲ့ ဘက်တီးရီးယားပိုးတွေ ပုံမှန်မဟုတ်ဘဲ ရှိနေသလားဆိုတာကို ခွဲခြမ်းစိတ်ဖြာနိုင်ဖို့အတွက် လူနာရဲ့ အစာချေစနစ်တစ်ခုထဲမှာရှိတဲ့ ဘက်တီးရီးယားတွေရဲ့ အကြောင်းကို သိရဖို့ ဓာတ်ခွဲခန်း စမ်းသပ်မှုတွေ လုပ်ကောင်းလုပ်ပါလိမ့်မယ်။
လူနာကို ကာဘိုဟိုက်ဒြိတ် အများကြီးပါတဲ့ အစာ စားခိုင်းတာမျိုး ဒါမှမဟုတ် အစာမရှိတဲ့ ဗိုက်ထဲမှာ ဂလူးကို့စ် သကြား စားခိုင်းတာမျိုး တွေလုပ်ပြီး ဂလူးကို့စ် သကြားဓာတ် စစ်ဆေးမှုတစ်ခု ဆရာဝန်တွေက လုပ်လေ့ ရှိပါတယ်။ နာရီအနည်းငယ် ကြာတဲ့အခါ ABS မရှိတဲ့ သူတွေက သွေးထဲမှာ အရက်တွေ့ရမှာ မဟုတ်ဘဲ ABS ရှိသူတွေကတော့ သွေးထဲမှာ အရက်တွေ အများကြီးရှိနေတာကို စစ်ဆေးတွေ့ရမှာ ဖြစ်ပါတယ်။
ရေးရဲ့ ခန္ဓာကိုယ်မှာ ဓာတုဒြပ်အပြောင်းအလဲရှိလာရင် အနံ့ခံ သတိပေးနိုင်တဲ့ ခွေးလေး မီယာကို ရေးက သွားလေရာ ခေါ်သွား
ဒေါက်တာ ဒီနစ်စ် အိုလီဗေရာ က ပုံမှန်အားဖြင့် ABS ရောဂါလက္ခဏာစုကို ထိန်းနိုင်ဖို့အတွက် ဆေးလည်းသောက်၊ ကာဘိုဟိုက်ဒြိတ် နည်းတဲ့အစာတွေ စားတာမျိုးအပြင် အူအတွင်းပိုင်းမှာ ရှင်သန်ပေါက်ဖွားနေတဲ့ ဘက်တီးရီးယားတွေနဲ့ တခြား သက်ရှိဇီဝတွေကို ပုံမှန်ဖြစ်စေဖို့ ဖြည့်စွက်စာတွေလည်း စားပေးခြင်းအားဖြင့် ထိန်းထားနိုင်တယ်လို့ ပြောပါတယ်။
ဂျိုးအတွက်ကတော့ ဒီလိုနည်းတွေနဲ့ ABS ရောဂါကို ဆယ်စုနှစ်တစ်ခု နီးပါး ထိန်းထားနိုင်ခဲ့ပါတယ်။
၂၀၂၀ ခုနှစ်ကတည်းက ဝေဒနာအပြည့်အဝ တစ်ခါမှ ပြန်မဖြစ်ခဲ့ပေမဲ့လည်း ကာဘိုဟိုက်ဒြိတ်နည်းတဲ့ အစာတွေ စား၊ အရက်သေစာ ရှောင်ခဲ့တဲ့ကြားက ဘေးထွက်ဆိုးကျိုးတချို့ကို ရေး ကြုံခဲ့ရပါတယ်။
ဒါပေမဲ့ ဒီရောဂါကို ခံနိုင်ရည် ရှိအောင် လုပ်ဖို့ နောက်တနည်း တွေ့ထားခဲ့ပါတယ်။ အဲဒါကတော့ မီယာ လို့ခေါ်တဲ့ ခွေးလေးရဲ့ အကူအညီပါ။
လက်ဘရာဒေါနဲ့ ပူဒဲလ် အမျိုးနှစ်မျိုး စပ်ထားတဲ့ ခွေးလေး မီယာ ကို ရေးရဲ့ ခန္ဓာကိုယ်ထဲမှာ အရက်စချက်ချက်ချင်း ကနဦးအဆင့်အပါအဝင် ဓာတုဒြပ်အပြောင်းအလဲ ရှိလာတာမျိုးကို အနံ့ခံ သတိပေးဖို့ လေ့ကျင့်ထားပါတယ်။ ဒီလိုအပြောင်းအလဲ ဖြစ်လာတာကို အနံ့ခံမိပြီဆိုရင် မီယာက ရေးရဲ့ ရှေ့မှာ ရပ်ပြီး စိုက်ကြည့်နေမှာ ဖြစ်ပါတယ်။
“မီယာ မရှိခင်တုန်းကဆိုရင် ကျွန်တော် အိမ်ကနေ ဘယ်မှ မသွားသလောက်ပါပဲ။ ဘာ့ကြောင့်လဲ ဆိုတော့ ကိုယ့်ကိုယ်ကို ဖြစ်ဖြစ် တခြားသူတွေကိုဖြစ်ဖြစ် တစ်ခုခု ဖြစ်သွားမှာကို ကျွန်တော် တချိန်လုံး စိုးရိမ်နေလို့ ဖြစ်ပါတယ်။” လို့ ရေးက ပြောပြပါတယ်။
“ကားတိုက်မှု ဖြစ်ခဲ့တုန်းက ကံကောင်းခဲ့တာတစ်ခုက ဘယ်သူ့ကိုမှ မတိုက်ခဲ့ဘဲ ကျွန်တော်ပဲ ထိခိုက်ဒဏ်ရာရခဲ့တာပါ”
ABS ရောဂါ ရှိသူတွေက အရက်မူးသူတွေမှာ ဖြစ်လေ့ရှိတဲ့ ခေါင်းမူး၊ အာလေးလျှာလေး၊ အရက်နာကျ စတဲ့ အလားတူ လက္ခဏာမျိုးတွေ ခံစားရတယ်လို့ ဆို
တခြားသူတွေက သူတို့မှာ ရောဂါတစ်ခုခု ရှိတာကို သက်သေပြနိုင်တာနဲ့ တစ်ပြိုင်နက် အရက်မူးပြီး ကားမောင်းတဲ့ ပြစ်မှုကနေ ကင်းလွတ်ခံရတတ်ပေမဲ့ ရေးကတော့ ဒီလောက် ကံမကောင်းခဲ့ပါဘူး။
“ကျွန်တော့် ခန္ဓာကိုယ်ထဲ အရက်ဘယ်လိုပဲ ရောက်ရောက်၊ ကျွန်တော့်မှာပဲ တာဝန်ရှိတယ်လို့ တရားသူကြီးက ယူဆထားခဲ့တာပါ” လို့ သူက ပြောပြပါတယ်။
“တရားရုံးက ဘယ်လိုပဲ ဆုံးဖြတ်ဆုံးဖြတ်၊ ကျွန်တော့်မှာက ဒီရောဂါကြီး ရှိနေတာပါ။ ကျွန်တော့်ဘက်ကတော့ အမှန်တရားအတိုင်း တိုက်ပွဲဝင်သွားဖို့ပဲ ရှိပါတယ်။”
ပြစ်မှုထင်ရှားကြောင်း တရားရုံးရဲ့ ဆုံးဖြတ်ချက်ကို ရေးနဲ့ သူ့ဇနီး ဆီယာရာ က အယူခံဝင်ဖို့ စီစဉ်နေပါတယ်။ တရားရုံး အမှုရှုံးခဲ့တာရယ်၊ ABS ရောဂါ ရှိနေတာရယ်ကြောင့် ရေးတစ်ယောက် အလုပ်ပြုတ်ခဲ့ရပါတယ်။
ဒါပေမဲ့ သူက မျှော်လင့်ချက် လက်မလွှတ်သေးဘဲ အရွှန်းဖောက် ပြောသွားခဲ့ပါသေးတယ်။
“ABS ရောဂါရှိသူတွေဟာ အရက်ဖိုး မကုန်ဘဲ မူးလို့ရတယ်လို့ လူအတော်များများက ထင်တတ်ကြပါတယ်။ ဒါပေမဲ့ အရက်နာကျလို့ ကျွန်တော် ဘယ်လောက်တောင် အခံရဆိုးရသလဲ ဆိုတာကိုတော့ လူတွေက မသိကြပါဘူး”
ရေးသားသူ –BBC Burmese
မိုးနတ်မင်း သတင်းစုံ – Telegram Channel မှလည်း ပြည်တွင်းသတင်း၊ နိုင်ငံတကာသတင်း၊ ဆယ်လီသတင်းများအပြင် ကျန်းမာရေး၊ ဗေဒင်၊ ဗဟုသုတများကိုပါ နေ့စဉ်တင်ဆက်ပေးနေပါပြီ။ အသစ်အသစ်သော သတင်းတွေမလွတ်သွားရအောင် အောက်ပါ Link လေးကိုနှိပ်ပြီး အခုပဲ join ထားလိုက်ပါ။
မိုးနတ်မင်း ပရိသတ်ကြီးလည်း အခုသတင်းလေးကိုဖတ်ပြီး ထင်မြင်ချက်တွေကို ကွန်မန့်မှာရေးခဲ့ရင်း မိတ်ဆွေများသိအောင် သတင်းကို မျှဝေပေးခဲ့ပါဦး။
