မသန်စွမ်းသူများအတွက် ရန်ပုံငွေရှာဖို့ နိုင်ငံအနှံ့ စက်ဘီးစီးနှင်သွားမယ့် အသက် ၆ နှစ် ကလေးလေး
အသက် ၆ နှစ်အရွယ် စင်ကာပူနိုင်ငံသားလေးက တစ်ရက်အတွင်း စင်ကာပူအနှံ့ ကီလိုမီတာ ၁၂၀ စက်ဘီးစီးနှင်နိုင်တဲ့ အသက်ငယ်ဆုံးပုဂ္ဂိုလ်ဖြစ်လာဖို့ စိန်ခေါ်မှုတစ်ခုကို လက်ခံဖြစ်ခဲ့ပါတယ်။ ဖခင်ဖြစ်သူပါ လိုက်ပါအဖော်ပြုပေးမယ့် အာရမ်ဆိုတဲ့ အဲ့ဒီကလေးလေးက အခုလို စက်ဘီးစီးနှင်ပြီးတော့ မသန်စွမ်းသူများအဖွဲ့အစည်းတစ်ခုဖြစ်တဲ့ SUN-DAC အတွက် ရန်ပုံငွေရှာပေးသွားမှာလည်းဖြစ်ပါတယ်။
သူဟာ သူ စက်ဘီးစီးနှင်တဲ့ ကီလိုမီတာတိုင်းအတွက် စင်ကာပူဒေါ်လာ ၁၀၀ ရရှိဖို့ မျှော်လင့်ထားတာပါ။ ကီလိုမီတာ ၁၂၀ ဝန်းကျင်လောက် စက်ဘီးစီးနှင်သွားမှာဖြစ်ပါတယ်။ အာရမ်ဟာ အသက် ၄ နှစ်ကတည်းက စက်ဘီးစီးတာကို စိတ်ပါဝင်စားခဲ့ပြီး စက်ဘီးမြန်မြန်စီးရတာကို ကြိုက်ခဲ့တာလို့ ဖခင်ဖြစ်သူ ဘဂျမင် ဆွန်းက ပြောပါတယ်။
အာရမ်က အသက် ၄ နှစ်မှာ Jurong East ကနေ သူ့အဘွားအိမ်ရှိတဲ့ Bukit Panjang အထိ ၁၀ ကီလိုမီတာ စက်ဘီးစီးခဲ့ပါတယ်။ ၂၀၂၄ ခုနှစ်အစောပိုင်းက East Coast Park မှာ ၅၂ ကီလိုမီတာ စက်ဘီးစီးနှင်နိုင်ခဲ့ပြီးတဲ့နောက်မှာ ဖခင်ဖြစ်သူက သူ့ကို ကီလိုမီတာ ၁၂၀ စက်ဘီးစီးနှင်ဖို့ စိန်ခေါ်ခဲ့တာပါ။
အာရမ်က ဒီစိန်ခေါ်မှုခရီးစဉ်ပြီးမြောက်ခဲ့ရင် Asia Book of Records မှာ စံချိန်ချိုးနိုင်မယ်လို့ သူ့မိဘတွေက ယုံကြည်ထားပါတယ်။ Asia Book of Records မှာ လက်ရှိစံချိန်ကိုင်ဆောင်ထားသူက တစ်ရက်အတွင်း ကီလိုမီတာ ၁၀၀ စက်ဘီးစီးခဲ့တဲ့ ဗီရက်တ် ဗီဂျေပါပဲ။ ဗီရက်တ်က အသက် ၉ နှစ်အရွယ်၊ ၂၀၂၂ ခုနှစ် မတ်လ ၁၃ ရက်နေ့မှာ ဒီစံချိန်ကို ချိုးခဲ့တာပါ။
အခုတော့ အာရမ်က ကီလိုမီတာ ၁၂၀ စက်ဘီးစီးနှင်နိုင်ဖို့ စက်ဘီးစီးလေ့ကျင့်နေပါတယ်။
ရေးသားသူ –Yoyarlay
မိုးနတ်မင်း သတင်းစုံ – Telegram Channel မှလည်း ပြည်တွင်းသတင်း၊ နိုင်ငံတကာသတင်း၊ ဆယ်လီသတင်းများအပြင် ကျန်းမာရေး၊ ဗေဒင်၊ ဗဟုသုတများကိုပါ နေ့စဉ်တင်ဆက်ပေးနေပါပြီ။ အသစ်အသစ်သော သတင်းတွေမလွတ်သွားရအောင် အောက်ပါ Link လေးကိုနှိပ်ပြီး အခုပဲ join ထားလိုက်ပါ။
မိုးနတ်မင်း ပရိသတ်ကြီးလည်း အခုသတင်းလေးကိုဖတ်ပြီး ထင်မြင်ချက်တွေကို ကွန်မန့်မှာရေးခဲ့ရင်း မိတ်ဆွေများသိအောင် သတင်းကို မျှဝေပေးခဲ့ပါဦး။