စက်မှုဇုန်များတွင် စက်ရုံအလုပ်သမားရှားပါးမှုနှင့်ကြုံတွေ့နေ
ရန်ကုန်တိုင်းအတွင်းရှိ စက်ရုံတချို့၌ အလုပ်သမားရှားပါးမှုနှင့်ကြုံတွေ့လာကြောင်း စက်မှုဇုန်လုပ်ငန်းရှင်များထံမှသိရသည်။
ယခင်က ဝန်ထမ်းလိုအပ်ချက်ရှိပါက လုပ်သက်မရှိသော်လည်း Training လိုင်းဖြင့်ခေါ်ယူကာ အလုပ်ခန့်အပ်ခဲ့ကြောင်း၊ ယခု Training လိုင်းဖြင့် ခေါ်ယူသော်လည်း လာရောက်လျှောက်ထားသည့် အလုပ်သမားမရှိကြောင်း၊ ဝန်ထမ်းဟောင်းများကိုသာ အလုပ်မထွက်ရန် စည်းရုံးနေရသည့်အခြေအနေများဖြစ်ပေါ်နေကြောင်း လုပ်ငန်းရှင်တစ်ဦးကပြောသည်။
“အထည်ချုပ်တွေမှာ အခုလူခေါ်လို့မရဘူးပေါ့။ ဝန်ထမ်းက လုံးဝခေါ်လို့မရဘူး။ ဘယ်လောက်တောင် ဆိုးနေလဲဆို ရုံအချင်းချင်းတွေတောင် သွားလုတဲ့အဆင့်တွေဖြစ်ကုန်ပြီ” ဟု လုပ်ငန်းရှင်တစ်ဦးက စံတော်ချိန်ဒစ်ဂျစ်တယ်သို့ ပြောသည်။
လက်ရှိမြန်မာနိုင်ငံတွင် စစ်မှုထမ်းဥပဒေ အသက်ဝင်လာခြင်းကြောင့် စက်ရုံများတွင် ဝင်ရောက်လုပ်ကိုင်နေသည့် အသက် (၂၀) မှ (၃၅) နှစ်ကြား လူငယ်လူလတ်ပိုင်းများမှာ စိုးရိမ်စိတ်များရှိနေပြီး၊ အလုပ်သမားတချို့မှာလည်း ပြည်ပသို့ထွက်ခွာရန်ပြင်ဆင်လာကြကြောင်း၊ အလုပ်သမားတချို့အား မိဘများကပြန်လည်ခေါ်ဆောင်သွားသောကြောင့် လုပ်ငန်းလည်ပတ်ရန်အခက်အခဲများရှိလာကြောင်း စက်မှုဇုန်ရှိလုပ်ငန်းရှင်များထံမှသိရသည်။
“လုပ်ငန်းပိုင်းမှာ ခက်ခဲတာပေါ့။ အခုအော်ဒါက အရမ်းလာနေတယ်။ အော်ဒါအခြေအနေတော်တော် ကောင်းတယ်။ လုံးဝလူမရှိဘူး။ အော်ဒါချပေးတဲ့အချိန်ကျတော့ Customer က ပြောမယ်လေ မင်းတို့ကလူလည်းမရှိဘူး။ နောက်ရာသီကျရင် လျှော့ပြီးချမယ်ဆိုရင် ကျွန်တော်တို့ပတ်လက်လန်ပြီ။ အဲဒီလိုဖြစ်တော့မယ်ဆိုတာမြင်နေတယ်” ဟု လှိုင်သာယာတွင် အထည်ချုပ်စက်ရုံဖွင့်လှစ်ထားသူတစ်ဦးကပြောသည်။
လက်ရှိ အထည်ချုပ်စက်ရုံများတွင် အလုပ်သမားတစ်ဦးလျှင် ပျမ်းမျှလစာသုံးသိန်းခွဲရရှိပြီး Bonus နှင့်အချိန်ပိုကြေးများပေါင်းပါက လေးသိန်းကျော်ခန့်ရရှိကြောင်း စက်ရုံအလုပ်သမားများထံမှ သိရသည်။
အထည်ချုပ်လုပ်ငန်းရှင်များအသင်း၏စာရင်းအရ လုပ်ငန်းလည်ပတ်နေသည့် စက်ရုံပေါင်း ၅၀၀ ခန့်ရှိပြီး၊ အလုပ်သမား ၃၈၀,၀၀၀ နှင့် လေးသိန်းခွဲကြားရှိကြောင်း၊ တစ်လနှင့် တစ်လ အလုပ်သမားဦးရေစာရင်းမတူညီနိုင်ကြောင်း၊ အသင်းမဝင်ထားသည့် စက်ရုံများလည်း ရှိနေသေးကြောင်း သိရသည်။
ရေးသားသူ –Standard Daily News
မိုးနတ်မင်း သတင်းစုံ – Telegram Channel မှလည်း ပြည်တွင်းသတင်း၊ နိုင်ငံတကာသတင်း၊ ဆယ်လီသတင်းများအပြင် ကျန်းမာရေး၊ ဗေဒင်၊ ဗဟုသုတများကိုပါ နေ့စဉ်တင်ဆက်ပေးနေပါပြီ။ အသစ်အသစ်သော သတင်းတွေမလွတ်သွားရအောင် အောက်ပါ Link လေးကိုနှိပ်ပြီး အခုပဲ join ထားလိုက်ပါ။
မိုးနတ်မင်း ပရိသတ်ကြီးလည်း အခုသတင်းလေးကိုဖတ်ပြီး ထင်မြင်ချက်တွေကို ကွန်မန့်မှာရေးခဲ့ရင်း မိတ်ဆွေများသိအောင် သတင်းကို မျှဝေပေးခဲ့ပါဦး။
