ထိုင်းဗီဇာမလိုဘဲ ပြည်တွင်းဝင်ခွင့် နိုင်ငံ ၃၀ ကျော်ကို တိုးပေး
ထိုင်းမှာ တနင်္လာနေ့ကစပြီး ဗီဇာမလိုဘဲ ပြည်တွင်းဝင်ခွင့်ကို နိုင်ငံ ၃၀ ကျော်ကို တိုးပေးတော့မှာ ဖြစ်လို့ စုစုပေါင်း ၉၃ နိုင်ငံ ရှိသွားပါပြီ။ဒီနိုင်ငံသားတွေ ရက် ၆ဝ ထိ ဗီဇာမလိုဘဲ နေနိုင်မှာ ဖြစ်ပါတယ်။ဒါဟာ နိုင်ငံရဲ့ အဓိက လုပ်ငန်းတခု ဖြစ်တဲ့ ခရီးသွား လုပ်ငန်းကို မြှင့်တင်တာပါ။
ထိုင်းမှာ ဆိုက်ရောက် ဗီဇာ ထုတ်ပေးတဲ့ နိုင်ငံ အရေအတွက်ကလည်း ၁၉ နိုင်ငံကနေ ၃၁ နိုင်ငံ ရှိသွားပြီလို့ ဘန်ကောက်ပို့စ် သတင်းစာက ရေးပါတယ်။
နောက် ဘယ်နေရာကမဆို အလုပ်လုပ်နိုင်တဲ့ ဒစ်ဂျစ်တယ် အလုပ်ရွှေ့ပြောင်းလုပ်ကိုင်သူတွေ၊ အလွတ်တန်း လုပ်ကိုင်သူတွေနဲ့ ထိုင်းဟင်းချက်နည်းနဲ့ ထိုင်းလက်ဝှေ့ သင်ချင်တဲ့ ခရီးသွားတွေ အတွက်လည်း ဗီဇာသစ် တမျိုးကို ထိုင်းအစိုးရက မိတ်ဆက်ပေးနေပါတယ်။
သူတို့ကတော့ ခြောက်လထိ ဒီဗီဇာနဲ့ နေနိုင်ကြပြီး ငါးနှစ်ထိ သက်တမ်းရှိပါတယ်။
ထိုင်းမှာ မဟာဘွဲ့နဲ့ အထက် ဘွဲ့လွန်သင်ဖို့ ဗီဇာ ရထားတဲ့ ကျောင်းသားတွေကိုလည်း ကျောင်းပြီးရင် ချက်ချင်း ပြန်ခိုင်းမယ့်အစား ကျောင်းပြီးပြီးနောက် တနှစ်ကြာတဲ့အထိ အလုပ်ရှာဖို့၊ ခရီးသွားဖို့ ဆက်နေခွင့်ပေးမှာ ဖြစ်ပါတယ်။
ဒီလို ဗီဇာစည်းကမ်းတွေ လျှော့ပေးလိုက်တာဟာ ကမ္ဘာ့စီးပွားရေးနဲ့ ပြည်တွင်းစီးပွားရေး နှေးကွေးပြီး ကြွေးမြီ ထူထပ်လာတဲ့ စိန်ခေါ်မှုကြီးတွေကို တုံ့ပြန်ဖို့ ခရီးသွားလုပ်ငန်းကို မြှင့်တင်တာလို့ ခေဆော့ဒ် သတင်းစာ အင်္ဂလိပ်ပိုင်းမှာ ပါရှိပါတယ်။
ထိုင်းအစိုးရက ဒီနှစ် ပြည်ပ ခရီးသွား ၃၆.၇ သန်းဆီက ဒေါ်လာ ၆၃.၆ ဘီလျံ ရအောင် ဆွဲဆောင်ဖို့ ရည်မှန်းထားပါတယ်။
ထိုင်းကို ဒီနှစ် ပထမနှစ်ဝက်မှာ ပြည်ပခရီးသွား ၁၇ သန်းခွဲ ဝင်လာကြောင်း ထိုင်း ခရီးသွားလုပ်ငန်း ဝန်ကြီးက ပြောပါတယ်။ ဒါဟာ မနှစ်က ပထမ ခြောက်လပိုင်းထက် ၃၅ ရာခိုင်နှုန်း တက်လာတာပါ။ အဲဒီကနေ ဝင်ငွေ ဒေါ်လာ ၂၂.၈ ဘီလျံလောက် ရတယ်လို့လည်း သိရပါတယ်။
ထိုင်းမှာ အလာဆုံး ခရီးသွားတွေက တရုတ်၊ မလေးရှား၊ အိန္ဒိယ၊ တောင်ကိုရီးယားနဲ့ ရုရှားနိုင်ငံက ဖြစ်ကြပါတယ်။
၂၀၂၅ မှာ ထိုင်း မဟာ ခရီးသွားနှစ်အဖြစ် သတ်မှတ်ထားပြီး အဲဒီအတွက် မဟာဗျူဟာတွေကိုလည်း ဒီလဆန်းက ကြေညာခဲ့ပါတယ်။ ဒီထဲမှာ ပြည်တွင်း ခရီးသွားလုပ်ငန်းကို တိုးမြှင့်တာနဲ့ မလေးရှား ခရီးသွားတွေ ဘန်ကောက်ကို ပိုလာ သုံးနိုင်အောင် စည်းရုံးတာတွေ ပါပါတယ်။ နောက် အာရပ်နိုင်ငံတွေကနေ ထိုင်းမှာ လာပြီး ဆေးကုချင်သူတွေအတွက်လည်း ရည်ရွယ်ပါတယ်။ နောက်ထပ် ခရီးသွား လေးသန်း ထပ်လာပြီး ဝင်ငွေ ရည်မှန်းချက် ပြည့်နိုင်တယ်လို့ ထိုင်းအစိုးရက ယုံကြည်ကြောင်းလည်း ထိုင်းခရီးသွားလုပ်ငန်း ကောင်စီ ဥက္ကဋ္ဌက ခန့်မှန်းပါတယ်။
၂၀၂၅ မှာ ထိုင်းကို လာမယ့် ကမ္ဘာလှည့် ခရီးသည် သန်း ၄၀ ကနေ ၄၅ သန်းအတွင်း ရှိမယ်လို့ ထိုင်း ခရီးသွားလုပ်ငန်း ကောင်စီက ခန့်မှန်းပါတယ်။
ရေးသားသူ –BBC Burmese
မိုးနတ်မင်း သတင်းစုံ – Telegram Channel မှလည်း ပြည်တွင်းသတင်း၊ နိုင်ငံတကာသတင်း၊ ဆယ်လီသတင်းများအပြင် ကျန်းမာရေး၊ ဗေဒင်၊ ဗဟုသုတများကိုပါ နေ့စဉ်တင်ဆက်ပေးနေပါပြီ။ အသစ်အသစ်သော သတင်းတွေမလွတ်သွားရအောင် အောက်ပါ Link လေးကိုနှိပ်ပြီး အခုပဲ join ထားလိုက်ပါ။
မိုးနတ်မင်း ပရိသတ်ကြီးလည်း အခုသတင်းလေးကိုဖတ်ပြီး ထင်မြင်ချက်တွေကို ကွန်မန့်မှာရေးခဲ့ရင်း မိတ်ဆွေများသိအောင် သတင်းကို မျှဝေပေးခဲ့ပါဦး။