သမ္မတဘိုင်ဒန် ရွေးကောက်ပွဲမဝင်တော့ဘူးလို့ ကြေညာရတဲ့အထိ ဘာတွေဖြစ်ခဲ့လဲ
အမေရိကန် သမ္မတ ဂျိုးဘိုင်ဒန်က သူဟာ “ပါတီနဲ့ နိုင်ငံ အကျိုးစီးပွား အတွက်” နိုဝင်ဘာ ရွေးကောက်ပွဲမှာ ဝင်ပြိုင်တော့မှာ မဟုတ်ဘူးလို့ ပြောကြားလိုက်ပါတယ်။
အိမ်ဖြူတော် သမ္မတ ရာထူး အတွက် မဲပေးရွေးချယ်မှု မတိုင်ခင် ၄ လ အလိုမှာ ကြေညာလိုက်တာ လည်း ဖြစ်ပါတယ်။
ဇွန်လကုန်တုန်းက လုပ်ခဲ့တဲ့ ရီပတ်ဘလီကန် သမ္မတလောင်း ဒေါ်နယ် ထရမ့် နဲ့ စကားစစ်ထိုးပွဲက သူ့ရဲ့ စွမ်းဆောင်ရည်ကြောင့် ဒီမိုကရက်တစ်ပါတီဝင်တွေ အကြား ပြင်းထန်တဲ့ ဖိအားပေးမှုတွေနဲ့ ရင်ဆိုင်ခဲ့ရပြီး အခုလို ထုတ်ပြန်ကြေညာလိုက်တာပါ။
အမေရိကန် သမ္မတ အဖြစ် တာဝန်ထမ်းဆောင်ရတာဟာ သူ့ဘဝ အတွက် အကြီးကျယ်ဆုံး ဂုဏ်ယူစရာ အဖြစ်လည်း လူမှုကွန်ရက်မှာ ရေးသားခဲ့ပါတယ်။
“ပြန်လည် အရွေးချယ်ခံရဖို့ ရည်ရွယ်ချက်ရှိပေမဲ့ ပါတီရပ်တည်ရေး နဲ့ ကျန်ရှိနေသေးတဲ့ သမ္မတ သက်တမ်း တာဝန်တွေကို ထမ်းဆောင်ဖို့ အာရုံစိုက် လုပ်ဆောင်တာက တိုင်းပြည်အတွက် အကောင်းဆုံး အကျိုးစီးပွား ဖြစ်တယ်လို့ ယုံကြည်ကြောင်း” သူက ပြောဆိုပါတယ်။
ဒီကိစ္စနဲ့ ပတ်သက်ပြီး လာမယ့် အပတ်ထဲမှာ နိုင်ငံ အခြေပြု မိန့်ခွန်း ပြောကြားမယ်လို့လည်း သူ့ရဲ့ ထုတ်ပြန်ချက်မှာ ဖော်ပြပါတယ်။
ဒုတိယသမ္မတ ကမ်မလာ ဟဲရစ်ကိုလည်း ကျေးဇူးတင် စကား ပြောဆိုခဲ့ပြီး သူ့အတွက် အကောင်းဆုံး မိတ်ဖက် တစ်ယောက် ဖြစ်တယ်လို့လည်း ဂုဏ်ပြု ပြောဆိုခဲ့ပါတယ်။
ဒီမိုကရက်တစ်ပါတီရဲ့ သမ္မတလောင်းအဖြစ် ကမ်မလာဟဲရစ်ကို ရွေးချယ်ဖို့လည်း မစ္စတာဘိုင်ဒန်က ပါတီဝင်တွေကို တိုက်တွန်းလိုက်ပါတယ်။
မစ္စတာဘိုင်ဒန်ရဲ့ ကြေညာချက်ထွက်လာအပြီး အိမ်ဖြူတော်ရှေ့မှာ ဆန္ဒလာထုတ်ဖော်သူ
ရှေ့မှာ ဘာဖြစ်လာမလဲ
ဒီမိုကရက်တစ်ပါတီညီလာခံကို သြဂုတ်လ ၁၉ ရက်ကနေ ၂၂ ရက်အထိ ချီကာဂိုမှာ ပြုလုပ်မှာ ဖြစ်ပြီး အဲဒီမှာ ပါတီရဲ့ သမ္မတလောင်းကို ရွေးချယ်အတည်ပြုကြေညာကြမှာပါ။
အခုလို သမ္မတဘိုင်ဒန်ရဲ့ ကြေညာချက်ထွက်လာအပြီးမှာပဲ ပြိုင်ဘက် ဒေါ်နယ်ထရမ့်ကလည်း ဂျိုးဘိုင်ဒန်ဟာ ဘယ်တုန်းကမှ သမ္မတနေရာ ရထိုက်ခဲ့သူမဟုတ်ကြောင်း၊ သမ္မတအဖြစ် လုပ်ဆောင်နိုင်စွမ်းရှိသူ မဟုတ်ကြောင်း သူ့ရဲ့ ဆိုရှယ်မီဒီယာမှာ ရေးသားခဲ့ပါတယ်။
သမ္မတဘိုင်ဒန်က သူ နိုဝင်ဘာရွေးကောက်ပွဲကို ဝင်မပြိုင်တော့ပေမဲ့ အဲဒီအချိန်အထိ သမ္မတ တာဝန်ကို ဆက်ယူသွားမယ်လို့ ပြောပါတယ်၊ ဒါပေမဲ့ သူ့ကို အခုချက်ချင်းပဲ နုတ်ထွက်ပေးဖို့ တောင်းဆိုမှုတွေလည်း ရှိလာပါတယ်။
အောက်လွှတ်တော် ဥက္ကဋ္ဌ မိုက်ဂျွန်ဆင်က မစ္စတာဘိုင်ဒန်ဟာ ရွေးကောက်ပွဲဝင်ဖို့ မသင့်တော်သူဆိုရင် သမ္မတအဖြစ်နေဖို့လည်း သင့်တော်သူမဟုတ်ဘူး၊ ဒါကြောင့် ချက်ချင်းနုတ်ထွက်ပေးသင့်တယ်လို့ သူ့ရဲ့ တွစ်တာ (X) အကောင့်မှာ ရေးတင်ခဲ့ပါတယ်။
ထရမ့်နဲ့ စကားစစ်ထိုးပွဲမှာ ဘိုင်ဒန် အသေအချာ မပြောနိုင်တာက သူ့စွမ်းဆောင်နိုင်မှုအပေါ် ပါတီဝင်တွေကြား သံသယကြီးထွားလာစေခဲ့
သမ္မတဘိုင်ဒန် ရွေးကောက်ပွဲမဝင်ဖို့ ကြေညာတဲ့အထိဖြစ်လာရတဲ့ ဖြစ်စဥ်မှတ်တမ်း
ဇွန် ၂၇ – ရီပတ်ဘလီကန်ပါတီသမ္မတလောင်း ဒေါ်နယ်ထရမ့်နဲ့ စကားစစ်ထိုးပွဲမှာ မစ္စတာဘိုင်ဒန်က မေးခွန်းတွေကို မဖြေနိုင်တာ၊ ဝေ့လည်လည်ဖြစ်နေတာတွေ တွေ့ခဲ့ရအပြီးမှာ သူဟာ ဒီမိုကရက်တစ်ပါတီရဲ့ သမ္မတလောင်းဖြစ်ထိုက်သူလားဆိုတဲ့ မေးခွန်းတွေ ကျယ်ကျယ်လောင်လောင်ထွက်လာခဲ့ပါတယ်။
ဇွန် ၂၈ – နောက်တစ်ရက်အကြာ မြောက်ကာရိုလိုင်းနားမှာ လုပ်တဲ့ မဲဆွယ်ပွဲ မိန့်ခွန်းမှာတော့ မစ္စတာဘိုင်ဒန်က “ကျွန်တော်အရင်ကလောက်တော့ စကားကိုသွက်သွက်မပြောနိုင်တော့ပါဘူး။ အရင်လိုလည်း ကောင်းကောင်း အချေအတင် စကားစစ်မထိုးနိုင်တော့ပါဘူး။ ဒါပေမဲ့ ကျွန်တော်ကောင်းကောင်းသိတာ တစ်ခုရှိပါတယ်။ အဲဒါကတော့ အမှန်တရားကို ဘယ်လိုပြောရမလဲဆိုတာပါ” လို့ ပြောသွားပါတယ်။ ဒါကလည်း သူ့အပေါ်သံသယရှိသူ၊ မေးခွန်းထုတ်နေသူတွေကို သူ ပြိုင်ပွဲက မထွက်ဘူးဆိုတာ အသိပေးလိုက်တာပါ။
ဇူလိုင် ၂ – ဒီမိုကရက်တစ်ပါတီအမတ် လွိုက်ဒေါ့ဂက်က မစ္စတာဘိုင်ဒန် ရွေးကောက်ပွဲမဝင်ဖို့ ပထမဆုံး တိတိလင်းလင်းတောင်းဆိုခဲ့ပြီး သူ့လိုပဲ တောင်းဆိုသူတွေလည်း ထွက်ပေါ်လာပါတယ်။
ဇူလိုင် ၅ – ABC သတင်းဌာနက ဂျော့ချ် စတက်ဖနိုပိုလပ်စ်နဲ့ အင်တာဗျူးမှာ သမ္မတဘိုင်ဒန်က သူ့ကို ဆက်မပြိုင်ဖို့ ‘ဘုရားသခင်’ တစ်ဦးတည်းကပဲ ဆွဲဆောင်ဖျောင်းဖျနိုင်မှာဖြစ်ပြီး သူ့အနေနဲ့ မှတ်ဥာဏ်ကို အစစ်ဆေးအစမ်းသပ်ခံယူဖို့လည်း အစီအစဥ်မရှိဘူးလို့ ပြောပါတယ်။
ဇူလိုင် ၈ – ပါတီတွင်းမှာ သဘောထားကွဲလွဲမှုတွေ ဖြစ်လာပြီးတဲ့နောက်မှာတော့ မစ္စတာဘိုင်ဒန်က Morning Joe ဆိုတဲ့ မနက်ခင်းသတင်းအစီအစဥ်မှာ “သူ ဘယ်ကိုမှ ထွက်မသွားဘူး” လို့ ပြောခဲ့ပြီး ဒီမိုကရက်အမတ်တွေဆီကို ညီညွတ်ကြဖို့တိုက်တွန်းတဲ့ စာရှည်ကြီး ရေးပို့ခဲ့ပါတယ်။
ဇူလိုင် ၁၀ – အောက်လွှတ်တော်ဥက္ကဋ္ဌဟောင်း နန်စီပလိုစီကလည်း အဲဒီ Morning Joe အစီအစဥ်မှာပဲ “သမ္မတက ရွေးကောက်ပွဲမှာ ဝင်ပြိုင် မပြိုင်ဆိုတာ သူ့ဟာသူ ဆုံးဖြတ်ရတော့မှာပဲ” လို့ ပြောခဲ့ပါတယ်။ ဒါကြောင့် ပါတီတွင်းမှာ ကျေလည်မှုမရကြသေးဘူးဆိုတာ သိသာပါတယ်။
ဟောလီးဝုဒ်မင်းသား ဂျော့ချ်ကလူနီကလည်း The New York Times သတင်းစာထဲက သဘောထားမှတ်ချက်အခန်းမှာ မစ္စတာဘိုင်ဒန်ကို သမ္မတလောင်းအဖြစ်က ထွက်ပေးဖို့တိုက်တွန်းခဲ့ပါတယ်။ ဒီမိုကရက်တစ် ဆီနိတ်တာတချို့ကလည်း တောင်းဆိုလာကြပါတယ်။
ဇူလိုင် ၁၁ – ဝါရှင်တန်မှာ လုပ်တဲ့ နေတိုးအဖွဲ့ညီလာခံအပြီး သတင်းစာရှင်းလင်းပွဲမှာ မစ္စတာဘိုင်ဒန်က ယူကရိန်းသမ္မတ ဇာလန်းစကီးကို ‘သမ္မတပူတင်’ လို့ မှားခေါ်ခဲ့ပြီး၊ သူ့ရဲ့ ဒုတိယသမ္မတ ကမ်မီလာ ဟဲရစ်ကိုလည်း ‘ထရမ့်’ လို့ ခေါ်ခဲ့ပါတယ်။
ဇူလိုင် ၁၇ – သမ္မတဘိုင်ဒန်မှာ ကိုဗစ်ရောဂါကူးစက်ခံနေရကြောင်းတွေ့ခဲ့ရပြီး သူ့ရဲ့ မဲဆွယ်လှုပ်ရှားမှုတွေ ရပ်ပြီး ကွာရန်တင်းလုပ်ခဲ့ရပါတယ်။ ထိပ်တန်း ဒီမိုကရက်တစ်ပါတီအမတ် အဒမ်ရှစ်ဖကလည်း မစ္စတာဘိုင်ဒန် အခုအချိန်မှာ “တခြားသူကို နေရာဖယ်ပေးသင့်ပြီ” ဆိုပြီး တိုက်တွန်းခဲ့သလို တခြားအမတ်တွေကလည်း တောင်းဆိုခဲ့ပါတယ်။
ဇူလိုင် ၁၈ – အင်တာဗျူးတစ်ခုမှာ သမ္မတဘိုင်ဒန်က သူ့ရဲ့ ကာကွယ်ရေးဝန်ကြီး လွိုက်အော်စတင်ရဲ့ နာမည်ကို မေ့နေတဲ့ ဗီဒီယိုကလစ်လေးတစ်ခု အွန်လိုင်းပေါ်ပျံ့နှံ့ထွက်ပေါ်လာပါတယ်။ သူက အဲဒီအင်တာဗျူးမှာပဲ “ကျန်းမာရေးနဲ့ပတ်သက်လို့ တစ်ခုခုခံစားနေရကြောင်းပေါ်ထွက်လာရင်” သူ ဆက်မပြိုင်တော့ဘူးလို့ ပြောခဲ့ပါတယ်။
ဇူလိုင် ၁၉ – သမ္မတဘိုင်ဒန်က လာမယ့်အပတ်ကျရင် သူမဲဆွယ်ပွဲတွေ ပြန်လုပ်မယ်လို့ ပြောပါတယ်။ သူ့ကို ဆက်မပြိုင်ဖို့ပြောတဲ့ ဒီမိုကရက်အမတ် ၃၀ ဦးအထိရှိလာပြီး ပါတီကို ငွေလှူနေကြတဲ့ အလှူရှင်တွေကလည်း ဘိုင်ဒန်ကို ထွက်ပေးဖို့ပြောလာကြပါတယ်။
ဇူလိုင် ၂၀ – သမ္မတဘိုင်ဒန်က ဒီမိုကရက်အမတ်တွေကို သူတို့ဟာ ပါတီရဲ့ သမ္မတလောင်းဘယ်သူဆိုတာတောင် မသိကြဘူးလားဆိုပြီး ပြစ်တင်ဝေဖန်ခဲ့ပါတယ်။
ဇူလိုင် ၂၁ – သမ္မတဘိုင်ဒန်က နိုဝင်ဘာသမ္မတရွေးကောက်ပွဲမှာ သူ ဝင်မပြိုင်တော့ဘူးလို့ ကြေညာပြီး ဒုတိယသမ္မတ ကမ်မီလာဟဲရစ်ကို သူ့အနေနဲ့ ထောက်ခံပါတယ်လို့ ပြောခဲ့ပါတယ်။
ရေးသားသူ –BBC Burmese
မိုးနတ်မင်း သတင်းစုံ – Telegram Channel မှလည်း ပြည်တွင်းသတင်း၊ နိုင်ငံတကာသတင်း၊ ဆယ်လီသတင်းများအပြင် ကျန်းမာရေး၊ ဗေဒင်၊ ဗဟုသုတများကိုပါ နေ့စဉ်တင်ဆက်ပေးနေပါပြီ။ အသစ်အသစ်သော သတင်းတွေမလွတ်သွားရအောင် အောက်ပါ Link လေးကိုနှိပ်ပြီး အခုပဲ join ထားလိုက်ပါ။
မိုးနတ်မင်း ပရိသတ်ကြီးလည်း အခုသတင်းလေးကိုဖတ်ပြီး ထင်မြင်ချက်တွေကို ကွန်မန့်မှာရေးခဲ့ရင်း မိတ်ဆွေများသိအောင် သတင်းကို မျှဝေပေးခဲ့ပါဦး။
