စစ်တပ်ဦးဆောင်တဲ့အစိုးရကို လက်မခံဘူးလို့ ဘင်္ဂလားဒေ့ရှ်ကျောင်းသားတွေပြော
ဘင်္ဂလားဒေ့ရှ်နိုင်ငံမှာတော့ ကျောင်းသားဆန္ဒပြပွဲတွေကြောင့် ဝန်ကြီးချုပ် ရာထူးကနေ နုတ်ထွက်သွားပြီဖြစ်ပေမဲ့ စစ်တပ်က ဦးဆောင်မယ့် အစိုးရတစ်ရပ်ကို လက်မခံဘူးလို့ ဆန္ဒပြကျောင်းသားတွေက ပြောလိုက်ပြီး သူတို့ လိုလားတဲ့ အစိုးရတပ်ရပ်ကိုလည်း အကြံပြုလာပါတယ်။
‘‘စွန့်လွှတ် အနစ်နာခံထားတဲ့ကျောင်းသားတွေ’’ကို မျက်နှာမလွှဲရက်ဘူး – ယူနွတ်စ်
နိုဘယ်ငြိမ်းချမ်းရေးဆိုရှင် မစ္စတာ ယူနွတ်စ်
နိုဘယ်ဆုရှင် မိုဟာမက် ယူနွတ်စ်က ကြားဖြတ်အစိုးရမှာ သူ့ကို အတိုင်ပင်ခံလုပ်ဖို့တောင်းဆိုတဲ့ ဘင်္ဂလားဒေ့ရှ် ကျောင်းသားတွေနဲ့ တောင်းဆိုချက်ကို သဘောတူလိုက်ပါတယ်။
ဝန်ကြီးချုပ်အဖြစ်ကနေ ရှိတ် ဟာစီနာ နုတ်ထွက်သွားပြီးတဲ့နောက် စစ်တပ်က ကြားဖြတ်အစိုးရတပ်ရပ်ဖွဲ့ပေးမယ်လို့ ကတိပေးထားတာဖြစ်ပါတယ်။ အခုတော့ အဲဒီအစိုးရမှာ ယူနွတ်စ်ကို အတိုင်ပင်ခံအဖြစ်ပါဝင်ဖို့ ကျောင်းသားတွေရဲ့တောင်းဆိုချက်ကို သူက လက်ခံလိုက်တာပါ။
‘‘အခုလို နိုင်ငံက အခက်အခဲဖြစ်နေတဲ့အချိန်ကာလမှာ အတော်လေးစွန့်လွှတ် အနစ်နာခံထားကြတဲ့ ကျောင်းသားတွေက ကျွန်တော့်ကို ပါဝင်ဖို့ တောင်းဆိုတဲ့အခါ ကျွန်တော် မျက်နှာမလွှဲရက်ဘူး’’ လို့ သူက ပြောပါတယ်။
လက်ရှိမှာ ဆေးကုသဖို ပြင်သစ်နိုင်ငံ၊ ပဲရစ်မြို့ကို ရောက်နေတဲ့ မစ္စတာ ယူနွတ်စ်ဟာ မကြာခင်မှာပဲ ဒါကာကို ပြန်ဖို့ရှိနေတယ်လို့ ယူနွတ်စ်စင်တာရဲ့အမှုဆောင်ချုပ် လာမီယာ မိုရှက်က ဘီဘီစီကိုပြော ထားပါတယ်။
ကျွန်တော်တို့ သမိုင်းသစ်ရေးထိုးနိုင်ခဲ့ပြီ – ဆန္ဒပြကျောင်းသား
ရှိတ် ဟာစီနာ ရာထူးကနေ နုတ်ထွက်ပြီဆိုတဲ့သတင်း တနင်္လာနေ့မှာ ထွက်ပေါ်ပြီးတဲ့နောက် ဆန္ဒပြသူတွေဟာ သူတို့ တောင်းဆိုခဲ့တဲ့ အရေးပါတဲ့အခိုက်အတန့်ကို အားပါးတရ ပြန်ပြောလာကြပါတယ်။
‘‘ကျွန်တော့်အတွက်တော့ အောင်ပွဲလိုပဲ’’ လို့ ပရင့်စ်က ဘီဘီစီရဲ့ Outside Source အစီအစဥ်ကို တနင်္လာနေ့မှာ ပြောပါတယ်။ ‘‘ကျွန်တော်တို့ တကယ်ကို ပျော်ရွှင်ရတယ်။ ရုန်းကန်ရတာတွေ အကြာကြီးဖြစ်ပြီးတဲ့နောက်၊ ဟာစီနာရဲ့ အာဏာရှင်ဆန်ဆန်အုပ်ချုပ်မှုကို နှစ်နဲ့ချီကြာအောင် ကြုံခဲ့ရပြီးတဲ့နောက်မှာ ကျွန်တော်တို့ လွတ်လပ်မှု ရရှိပြီဖြစ်ပါတယ်။ လွတ်လပ်စွာ ထုတ်ဖော်ပြောဆိုခွင့် ပြန်ရလာပါပြီ’’
နောက်ထပ် ဆန္ဒပြသူတစ်ဦးဖြစ်တဲ့ တန်ဗီယာကတော့ ယုံကြည်ရာအတွက် လျှောက်လှမ်းရင်း သူ့လိုလူတွေအများကြီး ကြုံခဲ့ရတဲ့ စွန့်လွှတ် စွန့်စားခဲ့ရတာတွေကို ပြောပါတယ်။
‘‘ဒီနေ့မှာ ကျွန်တော်တို့ သမိုင်းရေးထိုးနိုင်ပြီ’’လို့ သူက ဘီဘီစီကို ပြောပါတယ်။ ‘‘ပြီးခဲ့တဲ့တစ်လလုံးလုံး ဆန္ဒပြပွဲတွေမှာ ကျွန်တော် ပါဝင်ခဲ့တယ်။ ကျွန်တော့် ဘယ်ဘက်လက်ဆိုရင် လုံးဝ မီးလောင်ခဲ့တယ်။ ပြီးတော့ ရာဘာကျည်တွေ ဘေးကနေ တဝီဝီနဲ့ ပျံသွားတာတွေလည်း ကြုံခဲ့ရတယ်’’ လို့ သူက ပြောပါတယ်။
‘‘ပထမ အောင်ပွဲ ရှိလာပြီ’’ ဖြစ်ပေမဲ့ နောက်ထပ်လုပ်ရမှာတွေရှိနေသေးတယ်လို့ဆိုပြီး ဒါကာမြို့မှာ ဆက်ပြီးဖြစ်နေတဲ့ မတည်ငြိမ်မှုတွေကိုလည်း သူက သိတဲ့အကြောင်း ပြောပါတယ်။
‘‘ဝန်ကြီးချုပ် နုတ်ထွက်သွားပြီးတဲ့နောက် သူ့တစ်အိမ်လုံး လုယက်ခံလိုက်ရတယ်။ ဒါက မင်းမဲ့စရိုက်လို့ ကျွန်တော်ကတော့ ယူဆတယ်။ ဒါတွေက ကျွန်တော်တို့ မျှော်လင့်ထားတာမဟုတ်ဘူး’’ လို့ သူက ပြောပါတယ်။
‘‘ကျွန်တော်တို့မှာ တိုက်ရမယ့်ပွဲတွေ ကျန်နေသေးတယ် ဘာကြောင့်လဲဆိုရင် ပိုယဥ်ကျေးပြီး ပညာတတ်တဲ့နိုင်ငံတစ်ခုကို ကျွန်တော်တို့ တည်ဆောက်ဖို့ လိုနေသေးတယ်’’
ရေးသားသူ –BBC Burmese
မိုးနတ်မင်း သတင်းစုံ – Telegram Channel မှလည်း ပြည်တွင်းသတင်း၊ နိုင်ငံတကာသတင်း၊ ဆယ်လီသတင်းများအပြင် ကျန်းမာရေး၊ ဗေဒင်၊ ဗဟုသုတများကိုပါ နေ့စဉ်တင်ဆက်ပေးနေပါပြီ။ အသစ်အသစ်သော သတင်းတွေမလွတ်သွားရအောင် အောက်ပါ Link လေးကိုနှိပ်ပြီး အခုပဲ join ထားလိုက်ပါ။
မိုးနတ်မင်း ပရိသတ်ကြီးလည်း အခုသတင်းလေးကိုဖတ်ပြီး ထင်မြင်ချက်တွေကို ကွန်မန့်မှာရေးခဲ့ရင်း မိတ်ဆွေများသိအောင် သတင်းကို မျှဝေပေးခဲ့ပါဦး။
