ထိုင်းဝန်ကြီးချုပ် ဆေထာ ရာထူးက ဖယ်ရှားခံရ
ထိုင်းနိုင်ငံမှာတော့ ဝန်ကြီးချုပ်ဆေထာ ထဝီဆင်ဟာ လာဘ်ထိုးဖို့ ကြိုးပမ်းမှုနဲ့ ထောင်ဒဏ်ချမှတ်ခံခဲ့ရသူ ရှေ့နေကို ဝန်ကြီးချုပ်ရုံး ဝန်ကြီးအဖြစ် ခန့်အပ်ခဲ့မှုဟာ ဖွဲ့စည်းပုံကို ချိုးဖောက်တာလို့ ပြီးခဲ့တဲ့ မိနစ်ပိုင်း တုန်းကပဲ ဆုံးဖြတ်လိုက်ပါတယ်။
ဝန်ကြီးချုပ် ဆေထာဟာ ရှင်နာဝပ် မိသားစုရဲ့ ရှေ့နေဟောင်း ပီချစ် ချွမ်ဘန်ကို အစိုးရအဖွဲ့ဝင် ဝန်ကြီးအဖြစ် ခန့်အပ်ခဲ့တာဖြစ်ပါတယ်။ ပီချစ် ချွမ်ဘန်ဟာ တရားရေးဝန်ထမ်းတဦးကို လာဘ်ပေးဖို့ ကြိုးပမ်းပြီး တရားရုံးကို မထီမဲ့မြင်ပြုလုပ်ခဲ့တယ်ဆိုတဲ့ စွပ်စွဲချက်နဲ့ ၂၀၀၈ ခုနှစ်မှာ ခေတ္တအကျဥ်းချခံခဲ့ရသူ ဖြစ်ပါတယ်။
အဲဒီလို ခန့်အပ်မှုကြောင့် ဝန်ကြီးချုပ်ဟာ ဖွဲ့စည်းပုံခုံရုံးကို တိုင်တန်းခံရတာ ဖြစ်ပါတယ်။
ဝန်ကြီးချုပ်ဆေထာကတော့ မစ္စတာ ပီချစ်ကို ဝန်ကြီးချုပ်ရုံးဝန်ကြီးအဖြစ် ခန့်အပ်ခဲ့မှုမှာ အမှားအယွင်း တစုံတရာ မလုပ်ခဲ့ဘူးလို့ ဆိုပါတယ်။
ဖွဲ့စည်းပုံဆိုင်ရာ ခုံရုံးကတော့ မစ္စတာ ပီချစ်ကို ဝန်ကြီးအဖြစ် ခန့်အပ်တာဟာ ‘’မျက်မြင်ရိုးဖြောင့်မှု ကင်းမဲ့တာ၊ နောက် ဖွဲ့စည်းပုံအရ အရည်အချင်းမပြည့်မီတာနဲ့ ကျင့်ဝတ်စံနှုန်းပိုင်းကို အလေးထားကြောင်း မပြခဲ့တာတွေဟာ ဖွဲ့စည်းပုံကို ချိုးဖောက်တာကြောင့် ဝန်ကြီးချုပ်သက်တမ်းကို အဆုံးသတ်ဖို့ ဆုံးဖြတ်လိုက်တာဖြစ်ပါတယ်’’ လို့ ဆုံးဖြတ်ပါတယ်။
ဖွဲ့စည်းပုံခုံရုံးတရားသူကြီး ၉ ဦးမှာ ၅ မဲ၊ ၄ မဲနဲ့ အခုဆုံးဖြတ်ချက်ကို အတည်ပြုလိုက်တာကြောင့် ထိုင်းဝန်ကြီးချုပ်ဆေထာရဲ့ ဝန်ကြီးချုပ်သက်တမ်းလည်း ကုန်ဆုံးပြီဖြစ်ပါတယ်။
အခုတော့ ဝန်ကြီးချုပ်အသစ်အတွက် လွှတ်တော်မှာ မဲခွဲပြီး အတည်ပြုရတော့မှာ ဖြစ်ပါတယ်။
လွှတ်တော်က ဝန်ကြီးချုပ်သစ်ကို မဲခွဲ အတည်မပြုခင်နဲ့ အစိုးရအဖွဲ့အသစ် တက်မလာခင်အထိ လက်ရှိအစိုးရအဖွဲ့ဟာ အိမ်စောင့်အစိုးရအနေနဲ့ ဆက်ရှိနိုင်တယ်လို့လည်း ဖွဲ့စည်းပုံ ခုံရုံးက ဆုံးဖြတ်ထားပါတယ်။
ထိုင်းနိုင်ငံဖွဲ့စည်းပုံခုံရုံးက လက်ရှိ ထိုင်းဝန်ကြီးချုပ် ဆေထာ ထဝီဆင်ကို ဝန်ကြီးချုပ်ရာထူးကနေ ဖယ်ရှားဖို့ ဆုံးဖြတ်ပြီး မိနစ်ပိုင်းမှာပဲ မစ္စတာ ဆေထာက သတင်းစာရှင်းလင်းပွဲ ပြုလုပ်လာပါတယ်။
‘‘ကျွန်တော့်ရဲ့ ရိုးသားမှုအပေါ် ကျွန်တော် ယုံကြည်မှုရှိပါတယ်။ စိတ်တော့ မကောင်းပါဘူး။ ဒါပေမဲ့ ခုံရုံးဆုံးဖြတ်ချက်ကို ကျွန်တော် လုံးဝ သဘောတူတာမျိုးတော့ မဟုတ်ပါဘူး’’ လို့ သူက ပြောပါတယ်။
‘‘အစည်းအဝေးခန်းထဲရောက်နေတာကြောင့် ကြားနာမှုကို ကျွန်တော် အဆုံးအထိ နားမထောင်ဖြစ်ခဲ့ပါဘူး။’’
‘‘ဖယ်ရှားခံရတယ်ဆိုတဲ့စကားလုံးအပေါ်မှာ ကျွန်တော် ပိုအာရုံစိုက်မှာတော့ မဟုတ်ဘူး။ ဒါပေမဲ့ ကျင့်ဝတ်မရှိတဲ့ ဝန်ကြီးချုပ်အဖြစ် တံဆိပ်တပ်ခံရတာကိုတော့ ကျွန်တော် စိတ်မကောင်းဖြစ်မိတယ်။ ပြီးတော့ ကျွန်တော်ဟာ မူလအကျင့်စရိုက်အရလည်း ဒီလို လူမျိုးမဟုတ်ပါဘူး။ ဒါပေမဲ့ ဆုံးဖြတ်ချက်လည်း ထွက်လာပြီ၊ ဒီဆုံးဖြတ်ချက်ကိုလည်း ဝါရင့်သမ္ဘာရင့် တရားသူကြီးတွေက ဆုံးဖြတ်တာဆိုတော့ အဲဒီဆုံးဖြတ်ချက်ကို ကျွန်တော် အရေးစိုက်မှာ ဖြစ်ပါတယ်’’ လို့ သူက ပြောပါတယ်။
ဝန်ကြီးချုပ်သက်တမ်း တနှစ်မပြည့်ခင်မှာပဲ ရာထူးက ဖယ်ရှားခံရ
အသက် ၆၇ နှစ်အရွယ် မစ္စတာ ဆေထာဟာ ဝန်ကြီးချုပ်တာဝန်ယူထားတာ တနှစ်မပြည့်ခင်မှာပဲ အခုလို ရာထူးကနေ ဖယ်ရှားခံရတာဖြစ်ပါတယ်။ ဒါ့အပြင် သူဟာ ၁၆ နှစ်အတွင်း ဖွဲ့စည်းပုံခုံရုံးကနေ ဖယ်ရှားတာခံရတဲ့ တတိယမြောက် ထိုင်းဝန်ကြီးချုပ်လည်း ဖြစ်လာပါတယ်။
တရားရေးကို လာဘ်ထိုးမှုနဲ့ ၂၀၀၈ ခုနှစ်မှာ လပိုင်း ထောင်ဒဏ်ချမှတ်ခံရတဲ့ ရှင်နာဝပ်မိသားစုရဲ့ ရှေ့နေဟောင်းကို ဝန်ကြီးချုပ်ရုံးဝန်ကြီးတာဝန် ခန့်အပ်ခဲ့တာနဲ့ပတ်သက်ပြီး ထိုင်းအထက်လွှတ်တော် အမတ်တွေက ဝန်ကြီးချုပ်ကို ဖွဲ့စည်းပုံခုံရုံးဆီ တိုင်ကြားခဲ့တာ ဖြစ်ပါတယ်။
ရေးသားသူ –BBC Burmese
မိုးနတ်မင်း သတင်းစုံ – Telegram Channel မှလည်း ပြည်တွင်းသတင်း၊ နိုင်ငံတကာသတင်း၊ ဆယ်လီသတင်းများအပြင် ကျန်းမာရေး၊ ဗေဒင်၊ ဗဟုသုတများကိုပါ နေ့စဉ်တင်ဆက်ပေးနေပါပြီ။ အသစ်အသစ်သော သတင်းတွေမလွတ်သွားရအောင် အောက်ပါ Link လေးကိုနှိပ်ပြီး အခုပဲ join ထားလိုက်ပါ။
မိုးနတ်မင်း ပရိသတ်ကြီးလည်း အခုသတင်းလေးကိုဖတ်ပြီး ထင်မြင်ချက်တွေကို ကွန်မန့်မှာရေးခဲ့ရင်း မိတ်ဆွေများသိအောင် သတင်းကို မျှဝေပေးခဲ့ပါဦး။
