ယူကရိန်းကို လေကြောင်းရန်ကာကွယ်ရေး ဒုံးကျည် ၆၅၀
ဗြိတိန်ထောက်ပံ့မည်
ရုရှားဒရုန်းများနှင့် ဗုံးများရန်မှကူညီကာကွယ်ရန် အမေရိကန်ဒေါ်လာ ၁၆၂ သန်းတန်ဖိုးရှိ ဘက်စုံသုံး အပေါ့စား ဒုံးကျည် ၆၅၀ ကို ယူကရိန်းအား ထောက်ပံ့ပေးသွားမည် ဖြစ်ကြောင်း ဗြိတိန်အစိုးရက ပြောကြားသည်။
၂၀၂၂ ခုနှစ် က စစ်ပွဲစတင်ခဲ့ပြီးနောက်ပိုင်း ပြီးခဲ့သည့်သီတင်းပတ်အတွင်း ယူကရိန်းအပေါ် အကြီးမားဆုံး လေကြောင်းတိုက်ခိုက်မှုကို ရုရှားက လုပ်ဆောင်ခဲ့ပြီးနောက် မိမိကိုယ်ကိုယ် ကာကွယ်နိုင်ရန် လေကြောင်းကာကွယ်ရေးအတွက် အကူအညီပေးကြရန် ယူကရိန်းက ထပ်မံပန်ကြားခဲ့သည်။
ဂျာမနီနိုင်ငံရှိ အမေရိကန်လေတပ်စခန်းတွင် အခြေစိုက်ထားသည့် နိုင်ငံပေါင်း ၅၀ ပါဝင်သော ယူကရိန်းကာကွယ်ရေးအဆက်အသွယ်အုပ်စု အစည်းအဝေးသို့ ဗြိတိန်ကာကွယ်ရေးဝန်ကြီး ဂျွန်ဟီလီ တက်ရောက်ခဲ့စဉ် အထက်ပါ ဒုံးကျည်ထောက်ပံ့ရေး ကြေညာချက်ထွက်ပေါ်လာခြင်းဖြစ်သည်။
ယူကရိန်းအတွက် အကူအညီများကို လျင်မြန်စွာပေးပို့သွားရေး အစိုးရ၏ မူဝါဒအတိုင်း ယင်းဒုံးကျည် ပထမအသုတ်ကို နှစ်ကုန်ပိုင်းတွင် ပေးပို့သွားမှာ ဖြစ်ကြောင်း ဗြိတိန်ကာကွယ်ရေးဝန်ကြီးဌာန က ပြောကြားသည်။
“ ဒီ ကတိကဝတ်အသစ် က ယူကရိန်းလေကြောင်းကာကွယ်ရေးအတွက် အရေးပါတဲ့ အားဖြည့်မှု ဖြစ်ပါလိမ့်မယ်” ဟု ကာကွယ်ရေးဝန်ကြီး ဟီလီ က ထုတ်ပြန်ချက်တွင် ပြောကြားသည်။
Thales ကုမ္ပဏီ က ထုတ်လုပ်ထားသော ဒုံးကျည်များသည် ၆ ကီလိုမီတာအထိ ဝေးကွာသော ပစ်မှတ်ကို လက်လှမ်းမီကာ မြေပြင် ၊ ဝေဟင် နှင့် ရေပြင်ပေါ်ရှိ ပလက်ဖောင်းအမျိုးမျိုးမှ ပစ်ခတ်နိုင်ကြောင်း သိရသည်။
ပြီးခဲ့သည့် တနင်္လာနေ့တွင် ရုရှားက ယူကရိန်းကို ဒရုန်းနှင့် ဒုံးကျည် ၂၀၀ ကျော်ဖြင့် တိုက်ခိုက်ခဲ့ကာ ယင်းမှာ စစ်ပွဲစတင်ပြီးနောက်ပိုင်း အကြီးမားဆုံး လေကြောင်းတိုက်ခိုက်ခံရမှု ဖြစ်ကြောင်း ယူကရိန်းက ပြောကြားသည်။
ရေးသားသူ –The Standard Time Daily
မိုးနတ်မင်း သတင်းစုံ – Telegram Channel မှလည်း ပြည်တွင်းသတင်း၊ နိုင်ငံတကာသတင်း၊ ဆယ်လီသတင်းများအပြင် ကျန်းမာရေး၊ ဗေဒင်၊ ဗဟုသုတများကိုပါ နေ့စဉ်တင်ဆက်ပေးနေပါပြီ။ အသစ်အသစ်သော သတင်းတွေမလွတ်သွားရအောင် အောက်ပါ Link လေးကိုနှိပ်ပြီး အခုပဲ join ထားလိုက်ပါ။
မိုးနတ်မင်း ပရိသတ်ကြီးလည်း အခုသတင်းလေးကိုဖတ်ပြီး ထင်မြင်ချက်တွေကို ကွန်မန့်မှာရေးခဲ့ရင်း မိတ်ဆွေများသိအောင် သတင်းကို မျှဝေပေးခဲ့ပါဦး။
