၈ ရက် ခရီး ဆိုပြီး သွားခဲ့ကြတဲ့ အာကာသယာဉ်မှူး နှစ်ယောက်
အာကာသထဲ ၈ လ သောင်တင်မယ်
ဘိုရင်းကုမ္ပဏီ ထုတ် စတားလိုင်နာ လွန်းပျံယာဉ်ဟာ အာကာသယာဉ်မှူး နှစ်ယောက်ကို ကမ္ဘာပတ်လမ်းထဲက သိပ္ပံ သုတေသနစခန်းပေါ်မှာ ထားခဲ့ရပြီး ကမ္ဘာပေါ်ကို လူမဲ့ ပြန်ဆင်းလာပါတယ်။ဘိုရင်းကုမ္ပဏီ ထုတ် စတားလိုင်နာ အာကာသယာဉ်ဟာ အမေရိကန်ပြည်ထောင်စု နယူးမက္ကဆီကို သဲကန္တာရထဲမှာ အောင်မြင်စွာ ပြန်လည် ဆင်းသက်ခဲ့ပါတယ်။
ဒါဟာ အဲဒီ လွန်းပျံယာဉ် အနေနဲ့ ကမ္ဘာမြေနဲ့ နိုင်ငံတကာ အာကာသ စခန်း ISS ကြား အသွားအပြန် ခရီးနှင်ဖို့ ဆိုတဲ့ ရည်မှန်းချက်ကို ပြည့်မြောက်အောင် ဆောင်ရွက် ခဲ့တာလို့ ဆိုနိုင်ပါတယ်။
ဒါပေမယ့်၊ အာကာသယာဉ်မှူးနှစ်ယောက်ကတော့ ISS ပေါ်မှာ ကျန်နေရစ်ခဲ့ ရပါတယ်။ ဘိုရင်းစတားလိုင်နာ ယာဉ်ပျံဟာ ISS ကနေ ကပ်ထားရာ ကနေ ခွာထွက်ပြီးတဲ့နောက် သူ့ချည်းပဲသက်သက် အလိုအလျောက် ထိန်းချုပ်မောင်းနှင်တဲ့ စနစ်နဲ့ ကမ္ဘာမြေပေါ် လူမဲ့ ပြန်လည် ဆင်းသက်ခဲ့တာ ဖြစ်ပါတယ်။
လွန်းပျံယာဉ်ဟာ လွှတ်တင်ပြီး မကြာခင်မှာတင် ဟေလီယမ် ဓာတ်ငွေ့ ယိုစိမ့်တာ အပါအဝင် နည်းပညာပိုင်း ပြဿနာတချို့ ရှိလာခဲ့ပါတယ်။ ဒါ့ကြောင့်လည်း အာကာသယာဉ်မှူး နှစ်ယောက် ဖြစ်တဲ့ အာကာသယာဉ်မှူး ဘွတ်ချ် ဝီလ်မော Butch Wilmore နဲ့ ဆူနီ ဝီလျမ်စ်တို့ အနေနဲ့ အာကသစခန်းမှာ နေရစ်ခဲ့တာဟာ ပိုပြီး ဘေးကင်း စိတ်ချရနိုင်တယ် ဆိုပြီး အမေရိကန် အာကာသ အေဂျင်စီ နာဆာ NASA က ဆုံးဖြတ်ခဲ့ပါတယ်။
သူတို့ နှစ်ယောက်ဟာ ISS ပေါ်မှာ လာမယ့်နှစ် ဖေဖေါ်ဝါရီလ အထိ နေသွားရမှာ ဖြစ်ပါတယ်။ သူတို့ဟာ အဲဒီအချိန်မှပဲ SpaceX လူတင်ယာဉ်ဖြစ်တဲ့ Dragon ယာဉ်ပျံနဲ့ ပြန်လာမယ်လို့ ဆိုပါတယ်။
ဒါဟာ အာကာသထဲက ကမ္ဘာပတ်လမ်းမှာ ရှိတဲ့ သိပ္ပံဓာတ်ခွဲခန်း သုတေသန စခန်း ဖြစ်တဲ့ ISS ပေါ်ကို ၈ ရက် မစ်ရှင်ခရီး ဆိုပြီး သွားလိုက်တာ၊ အာကာသထဲ ၈ လ သောင်တင်ရမယ့် အဓိပ္ပာယ်ဖြစ်ပါတယ်။
ရည်မှန်းချက်အတိုင်း အလုံးစုံ ဖြစ်မြောက် စေချင်ပေမယ့် ဖြစ်မလာခဲ့ဘူးလို့ နာဆာ အဖွဲ့က တာဝန်ရှိသူ ဂျိုဝဲလ် မွန်တာနိုက သတင်းစာရှင်းလင်းပွဲမှာ ပြောပါတယ်။
“အခုလိုမျိုး စမ်းသပ် ပျံသန်းမှုတွေမှာ အားလုံး စီစဉ်ထားတဲ့ အတိုင်း ဖြစ်ချင်မှ ဖြစ်တတ်ပါတယ်။ ဖြစ်နိုင်ခြေတွေ အားလုံးအတွက် ပြင်ဆင်ထားခဲ့ပြီး၊ အခုလို ယာဉ်ပျံကို အိမ်အရောက် ပြန်ခေါ်နိုင်ခဲ့တဲ့ အတွက် ဝမ်းမြောက်လှပါတယ်။ ဒါလည်းပဲ ဒီခရီးစဉ်ရဲ့ အောင်မြင်မှုလို့ ပြောရမှာပါ။ ကျွန်တော်တို့ ထပ်ပြီး လုပ်စရာတွေ လိုသေးတယ် ဆိုတာ တစ်ဖွဲ့လုံး သိမြင်ထားပါတယ်” လို့ ဆိုပါတယ်။
စတားလိုင်နာရဲ့ အိမ်ပြန်ခရီးဟာ ၆ နာရီ ကြာပါတယ်။ ကမ္ဘာ့လေထုထဲ ပြန် ဝင်ရောက်လာချိန်မှာပဲ အရှိန်ထိန်း လေထီးတွေ ပွင့်လာခဲ့ပြီး ကျဆင်းနှုန်းကို လျှော့ချ ခဲ့ပါတယ်။
အဲဒီနောက်မှာတော့ နယူးမက္ကဆီကိုမှာ ရှိတဲ့သဲဖြူ အာကာသ ဆိပ်ကမ်း လို့ နာမည် ပေးထားတဲ့ စခန်း ရှိရာဆီ ဆင်းသက် လာခဲ့ပါတယ်။
ဒီ ခရီးစဉ်ဟာ ဘိုးရင်း စကိုင်းလိုင်နာ ယာဉ်ပျံရဲ့ အာကာသယာဉ်မှူးတွေ လိုက်ပါတဲ့ ပထမဆုံး စမ်းသပ်ပျံသန်းမှု ဖြစ်ပါတယ်။ ဇွန် ၅ ရက်နေ့မှာ ဖလော်ရီဒါပြည်နယ် ကာနယ်ဗားရဲလ် အငူကနေ လွှတ်တင်ခဲ့တာပါ။
လွှတ်တင်ပြီး မကြာခင်မှာပဲ လောင်စာဆီတွေကို စက်ရှိရာ တွန်းထုတ်ပေးတဲ့ ဟီလီယမ်ဓာတ်ငွေ့ ယိုစိမ့်တဲ့ ပြဿနာ ရှိနေသလို၊ တွန်းထုတ်ပေးတဲ့ ပစ္စည်း ကိရိယာတွေလည်း ကောင်းကောင်း အလုပ်မလုပ်တာ သိလာရပါတယ်။
အဲဒီနောက်မှာတော့ ဘိုရင်းကုမ္ပဏီဘက်ကရော နာဆာက အင်ဂျင်နီယာတွေပါ ပြဿနာ အရင်းခံကို နားလည်အောင် လတွေနဲ့ချီ ကြိုးစားခဲ့ကြပါတယ်။ ဒီလိုနဲ့ သြဂုတ်လ နှောင်းပိုင်းထိ ရောက်လာပါတယ်။
အဲဒီ အချိန်ကျမှပဲ နာဆာဘက်က ဆုံးဖြတ်ချက် ချပါတယ်။ စကိုင်းလိုင်နာကို ပြန်ခေါ်မယ်၊ အာကာသယာဉ်မှူးတွေတော့ အဲဒီယာဉ်ပေါ် ပြန်လိုက်လာဖို့ စိတ်မချဘူး၊ ISS ပေါ် နေခဲ့ရမယ် ဆိုတဲ့ ဆုံးဖြတ်ချက် ဖြစ်ပါတယ်။
ISS ရဲ့ မန်နေဂျာ ဒါနီဝီဂယ်ရဲ့ အဆိုအရ ကျန်နေရစ်ခဲ့တဲ့ အာကာသယာဉ်မှူး နှစ်ယောက်ဟာ ပြောင်းလဲလာတဲ့ အခြေအနေတွေ အပေါ် အရင်းခံအတိုင်း နားလည် သဘောပေါက် လက်ခံပြီး၊ လုပ်သင့်လုပ်ထိုက်တာတွေကို လိုက်လျေညီထွေ ဖြစ်အောင် အလိုက်သင့် ပြောင်းလဲ လုပ်ဆောင်နေတယ်လို့ ဆိုပါတယ်။
နှစ်ယောက်စလုံးဟာ အရင်တုန်းကလည်း အာကာသထဲ ကာလတာရှည် နေဖူးခဲ့ကြသူတွေ ဖြစ်ပါတယ်။ အခုလည်း နောက်ထပ် လပေါင်းများစွာ ဆက်နေဖို့ လိုအပ်လာတဲ့ အတွက်၊ မြေဆွဲအား ကင်းမဲ့တဲ့ နေရာမှာ ကျန်းမာစွာ နေနိုင်ရေးအတွက် လုပ်ရမယ့် လေ့ကျင့်ခန်းတွေ လုပ်ဆောင် နေတယ်လို့လည်း ISS မန်နေဂျာ က ဆိုပါတယ်။
နာဆာရဲ့ အခု ခရီးစဉ် မန်နေဂျာ စတိဗ် စတစ်ချ်ကလည်း အာကာသယာဉ်မှူး နှစ်ယောက်စလုံး စိတ်ပိုင်း ကြံ့ခိုင်နေပြီး၊ သူတို့ မိသားစုတွေနဲ့လည်း ပုံမှန် အဆက်အသွယ် ရှိတယ်လို့ ဆိုပါတယ်။
အာကာသ သူရဲကောင်း ဝီလ်မောနဲ့ ဝီလျမ်စ်တို့ဟာ သူတို့ ဇွန်လထဲ ISS ကို ရောက်ရှိခဲ့ချိန်ကစလို့ စတားလိုင်နာ ယာဉ်ပျံရဲ့ စနစ်တွေကို စမ်းသပ်တာ၊ ဒေတာ အချက်အလက်တွေကို ဆန်းစစ် ပိုင်းခြားတာတွေ ပြုလုပ် နေခဲ့တာတင်မက ISS ရဲ့ သုတေသန လုပ်ငန်းတွေ၊ ISS ကြီးကို ထိန်းသိမ်းမွမ်းမံတဲ့ လုပ်ငန်းတွေထဲမှာပါ ဝင်ရောက် လုပ်ကိုင် နေကြပြီး အလုပ်နဲ့ လက်နဲ့မပြတ် ရှိနေခဲ့ကြတယ်လို့ ဆိုပါတယ်။
ရေးသားသူ –BBC Burmese
မိုးနတ်မင်း သတင်းစုံ – Telegram Channel မှလည်း ပြည်တွင်းသတင်း၊ နိုင်ငံတကာသတင်း၊ ဆယ်လီသတင်းများအပြင် ကျန်းမာရေး၊ ဗေဒင်၊ ဗဟုသုတများကိုပါ နေ့စဉ်တင်ဆက်ပေးနေပါပြီ။ အသစ်အသစ်သော သတင်းတွေမလွတ်သွားရအောင် အောက်ပါ Link လေးကိုနှိပ်ပြီး အခုပဲ join ထားလိုက်ပါ။
မိုးနတ်မင်း ပရိသတ်ကြီးလည်း အခုသတင်းလေးကိုဖတ်ပြီး ထင်မြင်ချက်တွေကို ကွန်မန့်မှာရေးခဲ့ရင်း မိတ်ဆွေများသိအောင် သတင်းကို မျှဝေပေးခဲ့ပါဦး။
