ဒေါ်နယ်ထရန့်နှင့်ဆက်ဆံရေးကို အဖတ်ဆယ်နိုင်သေးကြောင်း
ယူကရိန်းသမ္မတ ဇီလန်စကီးပြောကြား
နှစ်ဦးအကြား အိမ်ဖြူတော်တွင် အချင်းများခဲ့ပြီးနောက် အမေရိကန်သမ္မတဒေါ်နယ်ထရန့် နှင့် ဆက်ဆံရေးကို ပြင်ဆင်တည့်မတ်သွားရန် ၎င်းအနေဖြင့်စိတ်အားထက်သန်ကြောင်း ယူကရိန်းသမ္မတ ဇီလန်စကီး ကအချက်ပြသည်။
ယမန်နေ့တွင်ထရန့်နှင့်တွေ့ဆုံပြီးနောက် ဇီလန်စကီး က ဖောက်စ်သတင်းဌာနအား တွေ့ဆုံမေးမြန်းခွင့်ပေးခဲ့ပြီး ၎င်းအနေဖြင့် ထရန့်အား တောင်းပန်စကားပြောကြားလိုပါသလားဟု မေးမြန်းခံရချိန်၌ “ ကျွန်တော်တို့က အလွန်ပဲ ပွင့်လင်း၊ အလွန်ပဲရိုးသားခဲ့ပါတယ်။ ကျွန်တော်တို့ မကောင်းတာ တစ်ခုခုလုပ်ခဲ့တယ်ဆိုတာ ကျွန်တော့်အနေနဲ့ မသေချာပါဘူး။” ဟု ဇီလန်စကီး က ဖြေကြားသည်။
ယူကရိန်းက ငြိမ်းချမ်းရေးလိုချင်သည့်အတွက် ၎င်းအနေဖြင့် သမ္မတထရန့် နှင့် သွားရောက်တွေ့ဆုံခဲ့ခြင်းဖြစ်ကြောင်း ဇီလန်စကီးက ပြောသည်။
တွင်းထွက်ပစ္စည်းသဘောတူညီချက်က လုံခြုံရေးအာမခံချက်များအတွက် ပထမအဆင့်ဖြစ်ကြောင်း နှင့် ယင်းမှာ ငြိမ်းချမ်းရေးအတွက် ၊ ငြိမ်းချမ်းရေးနှင့် ပိုနီးစပ်လာရေးအတွက် ရည်ရွယ်ခဲ့ကြောင်း ၎င်းက ဆက်ပြောသည်။
ဒေါ်နယ်ထရန့် နှင့် ဆက်ဆံရေးအား အဖတ်ဆယ်နိုင်ဦးမည်လားဟု မေးမြန်းခံရချိန်တွင် ယူကရိန်းသမ္မတ က အပြုသဘောဖြင့် တုံ့ပြန်ခဲ့ကာ “ ဟုတ်ကဲ့ အဖတ်ဆယ်နိုင်ပါတယ်။” ဟု ဖြေကြားခဲ့သည် ။
သို့သော် ထရန့်နှင့် အချင်းများခဲ့ခြင်းအတွက် နောင်တရကြောင်းလည်းဇီလန်စကီး က ပြောသည်။
ထို့နောက်ဒေါ်နယ်ထရန့် က ဇီလန်စကီး၏ ဖောက်စ်သတင်းနှင့် အင်တာဗျူးကို ကြည့်ရှုခဲ့ကြောင်း ထရန့်နှင့်အတူလိုက်ပါခဲ့သည့် သတင်းထောက်များက ပြောကြားကြသည်။
ဇီလန်စကီး က အမေရိကန်နိုင်ငံအား မလေးမစားလုပ်ခဲ့ကြောင်း အိမ်ဖြူတော် တွေ့ဆုံမှုအပြီး မကြာမီတွင် ဒေါ်နယ်ထရန့်က ၎င်း၏လူမူကွန်ရက် ပေါ်တွင် စွပ်စွဲပြောကြားသည်။
“သမ္မတ ဇီလန်စကီးက ငြိမ်းချမ်းရေးအတွက် အသင့်မရှိဘူးလို့ ကျွန်တော်ဆုံးဖြတ်လိုက်ပါတယ်။ သူအဆင့်သင့်ဖြစ်ရင် ပြန်လာနိုင်ပါတယ်။” ဟု ထရန့်က ရေးသားခဲ့သည်။
စစ်ပွဲရှုံးနေသည်ကို ဇီလန်စကီးက သဘောပေါက်ရန်လိုကြောင်း သီတင်းပတ်ကုန်အနားယူရန် ၎င်း၏ ဖလော်ရီဒါနေအိမ်သို့မသွားမီအမေရိကန်သမ္မတ ဒေါ်နယ်ထရန့်က သတင်းထောက်များအား ပြောကြားသည်။
“ သူပြောရမှာက ကျွန်တော်ငြိမ်းချမ်းရေးလိုချင်တယ် ဆိုတာပဲ။ သူက ဒီမှာလာပြီး ပူတင်ဘာဖြစ်တယ်၊ ညာဖြစ်တယ်ဆိုပြီးမကောင်းတာတွေချည်းပဲပြောရမှာမဟုတ်ဘူး။သူပြောရမှာက ကျွန်တော် ငြိမ်းချမ်းရေး ယူချင်တယ်၊ စစ်မတိုက်ချင်တော့ဘူးဆိုတာပဲ။” ဟု ထရန့် က ပြောသည်။
ယင်းဖြစ်ရပ်အပေါ်အမေရိကန်လွှတ်တော်တွင်ရီပက်ဘလေကန်၏တုံ့ပြန်မှုမှာ အကောင်းအဆိုး ရောထွေးနေပြီး ဒီမိုကရက်များကမူ တွေ့ဆုံမှုအား ထရန့် ကိုင်တွယ်ပုံကို ပြစ်တင်ပြောကြားကြသည်။
ရေးသားသူ- The Standard Time Daily
မိုးနတ်မင်းသတင်းစုံကို ဖတ်ရှုအားပေးတဲ့အတွက် ကျေးဇူးအထူးတင်ရှိပါတယ်။
မိုးနတ်မင်း သတင်းစုံ နှင့် Moe Nat Min TV မှ ပြည်တွင်းသတင်း၊ နိုင်ငံတကာသတင်း၊ ဆယ်လီသတင်းများ (အနုပညာသတင်းများ) အပြင် ကျန်းမာရေး၊ ဗေဒင်၊ ဗဟုသုတများကိုပါ နေ့စဉ်တင်ဆက်ပေးနေပါပြီ။
👉 သတင်း အသစ်တင်တိုင်း သိရှိရန်
Telegram Channel Join ထားပါ
Telegram Channel ဝင်ရန်နှိပ်ပါ
👉 ရုပ်သံဖြင့် သတင်းကြည့်ရှုရန်
Youtube Channel Join ထားပါ
Youtube Channel ဝင်ရန်နှိပ်ပါ