စွပ်စွဲပြစ်တင်ခံ တောင်ကိုရီးယားသမ္မတကို ရာထူးမှ ထုတ်ပယ်
ဆယ်စုနှစ်များစွာအတွင်း နိုင်ငံ၏ အဆိုးရွားဆုံးနိုင်ငံရေးအကျပ်အတည်းကို ဖြစ်ပေါ်စေခဲ့သည့် ပြီးခဲ့သည့်နှစ်က စစ်အုပ်ချုပ်ရေးဥပဒေပြဌာန်းမှုကြောင့် ပါလီမန်၏ စွပ်စွဲပြစ်တင်မှုကို အခြေခံဥပဒေဆိုင်ရာတရားရုံးက ဆက်လက်အတည်ပြုခဲ့ပြီးနောက် တောင်ကိုရီးယားသမ္မတ ယွန်းဆွတ်ယိုးလ်အား ရာထူးမှ ဖယ်ရှားလိုက်သည်။
အာရှ၏ စတုထ္တမြောက်အကြီးဆုံးစီးပွားရေး နိုင်ငံတွင် ဖွံ့ဖြိုးမှုနှေးကွေးနေစဉ် အမေရိကန်မှ ဒေါ်နယ်ထရန့် အစိုးရနှင့်ဆက်ဆံရေးအားကိုင်တွယ်ရန် ကြိုးပမ်းမှုများကို အရိပ်မည်းထိုးခဲ့သော လပေါင်းများစွာ နိုင်ငံရေးမတည်ငြိမ်မှုကို တရားရုံး၏ တညီတညွတ်တည်းဆုံးဖြတ်ချက် နှင့် အတူ အဆုံးသတ်သွားစေခဲ့သည်။
အခြေခံဥပဒေအရ ယခုအခါ သမ္မတရွေးကောက်ပွဲကို ရက်ပေါင်း ၆၀ အတွင်း ကျင်းပရန် လိုအပ်ပြီး သမ္မတသစ်အား ကျမ်းသစ္စာကျိန်ဆိုသည့်အချိန်အထိ ဝန်ကြီးချုပ် ဟန်ဒတ်ဆူးက ယာယီသမ္မတအဖြစ် ဆက်လက်တာဝန်ယူထားမည်ဖြစ်သည်။
ဒီဇင်ဘာ ၃ ရက်စစ်အုပ်ချုပ်ရေးဥပဒေပြဌာန်းမှုဖြင့် ယွန်းဆွတ်ယိုးလ်သည် သမ္မတအဖြစ် ၎င်း၏ တာဝန်ကို ချိုးဖောက်ခဲ့ပြီး အခြေခံဥပဒေက အပ်နှင်းထားသော အာဏာများထက် ကျော်လွန်လုပ်ဆောင်ခဲ့ကြောင်း ယင်းနှင့်အတူ နိုင်ငံ၏ ဒီမိုကရေစီအတွက် ကြီးမားသော စိန်ခေါ်မှု ဖြစ်စေခဲ့ကြောင်း ယာယီတရားသူကြီးချုပ် မွန်းဟွန်ဘေးက ပြောကြားသည်။
ယွန်းဆွတ်ယိုးလ်က ပြည်သူလူထု၏ ယုံကြည်မှုကို အကြီးအကျယ်ချိုးဖောက်ခဲ့ကြောင်းနှင့် ၎င်း၏ စစ်အုပ်ချုပ်ရေးကြေညာမှုကြောင့် စီးပွားရေး၊ နိုင်ငံခြားရေးမူဝါဒ အပါအဝင် လူ့အဖွဲ့အစည်း နယ်ပယ်စုံတွင် ဝရုန်းသုန်းကား အခြေအနေများ ဖြစ်ပေါ်စေခဲ့ကြောင်း တရားသူကြီးချုပ် က ဆက်လက်ပြောကြားသည်။
တရားရုံးချုပ်၏ဆုံးဖြတ်ချက် ထွက်ပေါ်လာခဲ့ပြီးနောက် ၎င်းအားထုတ်ပယ်ရန် ညအိပ်ဆန္ဒပြနေကြသူ ရာပေါင်းများစွာအပါအဝင် လူထောင်ပေါင်းများစွာက အားရဝမ်းသာ ဖြစ်သွားခဲ့ကြပြီး “ ငါတို့နိုင်တယ်။” ဟု ဟစ်ကြွေးခဲ့ကြသည်။
သမ္မတအိမ်တော်အနီး စုဝေးနေခဲ့ကြသော ၎င်း၏ ထောက်ခံသူများမှာမူ ကြီးမားသောရုပ်သံမျက်နှာပြင်မှ ထွက်ပေါ်လာသော တရားရုံးဆုံးဖြတ်ချက်ကြောင့် အံ့ဩမင်သက်သွားခဲ့ကြသည်။
အဓိကအတိုက်အခံပါတီ က ၎င်းပါ၏ ပါလီမန်လူများစုနေရာရရှိမှုအား အလွဲသုံးစားလုပ်နေခြင်းကို သတိပေးသည့်အနေဖြင့် စစ်အုပ်ချုပ်ရေးကြေညာခဲ့ခြင်းဖြစ်ကြောင်း ယွန်းဆွတ်ယိုးလ်၏ ချေပပြောဆိုမှုကို တရားရုံးကပယ်ချခဲ့ပြီး ယင်းသို့ သဘောထားမတိုက်ဆိုင်မှုများကို ကိုင်တွယ်ရန် အခြားနည်းလမ်းများ ရှိကြောင်း ပြောကြားသည်။
ယနေ့ တရားရုံးဆုံးဖြတ်ချက်နှင့်အတူ နိုင်ငံတော်အလံ နှင့်အတူ လွှင့်ထူထားသော သမ္မတအလံကို ဖြုတ်ချလိုက်ကြောင်းသိရသည်။
ထို့ပြင်စစ်စခန်းများနှင့် ကွပ်ကဲရေးစင်တာများတွင် ထားရှိသော သမ္မတရုပ်ပုံများကို ဖယ်ရှားပြီး ဖျက်ဆီးပစ်ရန် ဥပဒေက ပြဌာန်းထားသည်။
အသက် ၆၄ နှစ်အရွယ် ယွန်းဆွတ်ယိုးလ်သည် စစ်အုပ်ချုပ်ရေးဥပဒေကြေညာခြင်းနှင့် ဆက်စပ်၍ နိုင်ငံတော်ပုန်ကန်မှု ရာဇဝတ်မှု စွဲချက်များကို ဆက်လက်ရင်ဆိုင်ရမည်ဖြစ်ကာ ပြစ်မှုထင်ရှားခဲ့ပါက သေဒဏ် သို့မဟုတ် တစ်သက်တစ်ကျွန်းထောင်ဒဏ်ကျခံရနိုင်ကြောင်း သိရသည်။
ရေးသားသူ- The Standard Time Daily
မိုးနတ်မင်းသတင်းစုံကို ဖတ်ရှုအားပေးတဲ့အတွက် ကျေးဇူးအထူးတင်ရှိပါတယ်။
မိုးနတ်မင်း သတင်းစုံ နှင့် Moe Nat Min TV မှ ပြည်တွင်းသတင်း၊ နိုင်ငံတကာသတင်း၊ ဆယ်လီသတင်းများ (အနုပညာသတင်းများ) အပြင် ကျန်းမာရေး၊ ဗေဒင်၊ ဗဟုသုတများကိုပါ နေ့စဉ်တင်ဆက်ပေးနေပါပြီ။
👉 သတင်း အသစ်တင်တိုင်း သိရှိရန်
Telegram Channel Join ထားပါ
Telegram Channel ဝင်ရန်နှိပ်ပါ
👉 ရုပ်သံဖြင့် သတင်းကြည့်ရှုရန်
Youtube Channel Join ထားပါ
Youtube Channel ဝင်ရန်နှိပ်ပါ
