ပျော်ဘွယ် KBZ ဘဏ်ထဲ ပိတ်မိသူတွေကိုအချိန်မီမကယ်နိုင်တာကြောင့်
သေဆုံးသူများပြားခဲ့ရတယ်လို့ ကျန်ရစ်သူတချို့ ပြော
အင်အားအလွန်ပြင်းထန်တဲ့ငလျင်ဒဏ်ကြောင့်ပြိုကျခဲ့တဲ့ မန္တလေးတိုင်း၊ ပျော်ဘွယ်မြို့က KBZ ဘဏ် အဆောက်အဦထဲပိတ်မိနေသူတွေကို အချိန်မီ မကယ်တင်နိုင်တာကြောင့် သေဆုံးသူများပြားခဲ့ရတယ်လို့ ဦးလေးဖြစ်သူကို ဆုံးရှုံးထားရသူတစ်ဦးက ပြောပါတယ်။
တူဝရီးနှစ်ဦးဟာ မတ် ၂၈ ရက်တုန်းက ပျော်ဘွယ် KBZ ဘဏ်ဒုတိယထပ်မှာငွေထုတ်နေချိန် ငလျင်လှုပ်ခတ်ခဲ့တာကြောင့် ဘဏ်အဆောက်အဦထဲ ပိတ်မိခဲ့ပြီး တူဖြစ်သူက အဲဒီနေ့ကတည်းက လွတ်မြောက်ခဲ့ပါတယ်။
“အဆောက်အဦ စောင်းကျတဲ့ဘက်ကျွန်တော်ကပါသွားပြီး ဦးလေးက အဝင်ဝပြိုတဲ့ထဲပါသွားတာပါ။ ကျွန်တော်က အဲဒီနေ့မှာပဲ အုတ်တွေကြားကအလင်းရောင်ဝင်တာကိုမှန်းပြီး ကိုယ့်ဘာသာဖယ်ရင်း ထွက်လာ နိုင်ခဲ့ပါတယ်။ ဦးလေးအလောင်းကိုတော့ မနေ့ ဧပြီ ၃ ရက် ည ၈ နာရီလောက်မှရပါတယ်” လို့ ပိတ်မိရာက လွတ်မြောက်ခဲ့ပေမဲ့ ဦးလေးဖြစ်သူကိုဆုံးရှုံးထားရသူက ပြောပါတယ်။
ပျော်ဘွယ် KBZ ဘဏ်ပြိုကျအဆောက်အဦကို ပျော်ဘွယ်မီးသတ်ကဦးစီးကယ်ဆယ်နေပြီး အထက်လူကြီး ခွင့်ပြုချက်စောင့်ဆိုင်းတယ်လို့ဆိုကာ အချိန်ယူတာကြောင့် အခုလိုလူသေများရတာလို့သူက ထောက်ပြပါ တယ်။
“၂၉ ရက်နေ့က အောင်ပန်းက ကယ်ဆယ်ရေးအဖွဲ့ လာပေမယ့်လည်း အကယ်မခံဘူးလေ။ ဘဏ်ကငွေတွေ ရှိနေတယ်ဆိုပြီး ကျွန်တော်တို့အရပ်သားတွေလည်းကပ်ခွင့်မရဘူး။ ဧပြီ ၁ ရက်နေ့မှ အဆောက်အဦ နား ကပ်လို့ရတယ်” လို့ သူက ဆက်ပြောပါတယ်။
ပျော်ဘွယ် KBZ ဘဏ်ကို မတ် ၂၉ ရက်က ကယ်ဆယ်ရေးရောက်ခဲ့တဲ့ အောင်ပန်းလူမှုကူညီရေး အဖွဲ့ဝင်တစ်ဦးအပြောအရ တော့ ၂၄ နာရီအတွင်းလုံလုံလောက်လောက်ကယ်ဆယ်နိုင်တာမျိုးမရှိခဲ့ဘူးလို့ ဆိုပါတယ်။
“ကျွန်တော်တို့နေ့လယ် ၂ နာရီမှာရောက်တော့ ဘဏ်ကိုဘယ်သူမှမကယ်နေဘူး၊ ရဲရော မီးသတ်ရောမရှိဘူး။ ရပ်ကွက်လူကြီးတွေကို ကျွန်တော်တို့တင်ပြပြီး ရှာဖွေရေးစတယ်။ ညနေ ၃ နာရီမှာပဲ ဘဏ်ဝန်ထမ်းတစ်ဦး ကို အသက်ရှင်လျက်ကယ်လိုက်နိုင်တယ်။ အဲဒီအချိန် ပျော်ဘွယ်မီးသတ်ကရောက်လာပြီး သူတို့ကိုမပြောဘဲ ကယ်ဆယ်တာကြောင့်လို့ ဆိုပြီးပြောတယ်” လို့ ကယ်ဆယ်ရေးပါဝင်ခဲ့သူ အောင်ပန်းကူညီရေးအဖွဲ့ဝင် တစ်ဦးက ပြောပါတယ်။
ကယ်ဆယ်ရေးအဖွဲ့ဝင်အချင်းချင်းကြား ညှိနှိုင်းမရသလို ပျော်ဘွယ်မီးသတ်အဖွဲ့ရဲ့ ဘတ်ဟိုးကားတွေနဲ့ ရှာဖွေရေးစတင်တာကြောင့် မတ် ၂၉ ရက်ညပိုင်းမှာပဲ အောင်ပန်းကိုပြန်ခဲ့ကြတယ်လို့ သိရပါတယ်။
ဒါပေမဲ့ မိသားစုဝင်ဆုံးရှုံးထားသူတချို့ပြောသလို KBZ ဘဏ်တာဝန်ရှိသူတွေက တားဆီးတာကြောင့် ရှာဖွေမရခဲ့တဲ့ အခြေအနေမရှိခဲ့ဘဲ KBZ ဘဏ်ဘက်က အကူအညီတောင်းလို့ အောင်ပန်းအဖွဲ့တွေက ပျော်ဘွယ်ကို သွားကူညီခဲ့တာလို့ ဆိုပါတယ်။
ဒီဖြစ်စဉ်နဲ့ပတ်သက်လို့ ပျော်ဘွယ်မြို့နယ်မီးသတ်ဦးစီးမှူးကို ဘီဘီစီကဆက်သွယ်မေးမြန်းပေမဲ့ ညနေ ၆ နာရီမှာပြန်လည်ဆက်သွယ်ဖို့အကြောင်းပြန်ပါတယ်။
ဒါပေမယ့် ပျော်ဘွယ်မီးသတ်ဦးစီးဌာနရဲ့ ဖေ့စ်ဘုတ်စာမျက်နှာပေါ်မှာတော့ ဒီဖြစ်စဉ်နဲ့ပတ်သက်လို့ အချက်အလက်မမှန်ကန်ဘူးလို့ တုံ့ပြန်ထားပါတယ်။
အောင်ပန်းလူမှုကူညီရေးအဖွဲ့နဲ့လည်း အတူတူပူးပေါင်းဆောင်ရွက်ခဲ့သလို အောင်ပန်းအဖွဲ့ကယ်ဆယ်ခဲ့သူ ဟာလည်း ဆေးရုံသွားရာလမ်းမှာကွယ်လွန်ခဲ့ပြီလို့ သိရပါတယ်။ အချိန်မီမကယ်တင်နိုင်ဘူးဆိုတာနဲ့ ပတ်သက်လို့တော့ တိတိကျကျတုံ့ပြန်ပြောတာမတွေ့ရပါဘူး။
ပျော်ဘွယ်မြို့နယ်မီးသတ်ဦးစီးမှူးရဲ့ ဧပြီ ၂ ရက် ဘီဘီစီကို ဖြေကြားချက်အရတော့ မတ် ၃၀ ရက်က စင်ကာပူကယ်ဆယ်ရေးအဖွဲ့တွေမှာပါလာတဲ့ နည်းပညာစက်အကူအညီနဲ့ စစ်ဆေးပြီးနောက် KBZ ဘဏ်အဆောက်အဦ အောက်မှာ အသက်ရှင်သူမရှိတော့ဘူးလို့ ဆိုပါတယ်။
KBZ ဘဏ်ဘက်ကတားဆီးတာမလုပ်ခဲ့ဘူးလို့လည်း သူက ဧပြီ ၂ ရက်တုန်းက ဘီဘီစီကို ဖြေကြားခဲ့ ပါတယ်။
ဧပြီ ၂ ရက် နေ့လယ်ပိုင်းအထိ ပျော်ဘွယ် KBZ ဘဏ်ပြိုကျအဆောက်အဦထဲကနေ သေဆုံးရုပ်အလောင်း ကိုးလောင်း ရရှိခဲ့ပြီး ပိတ်မိနေဆဲသေဆုံးရုပ်အလောင်း ခြောက်လောင်းကိုထပ်မံရှာဖွေဖို့လုပ်နေတယ် လို့ သိရှိခဲ့ရပါတယ်။
စစ်ကောင်စီရဲ့ ဧပြီ ၄ ရက်ထုတ်နိုင်ငံပိုင်သတင်းစာမှာဖော်ပြချက်အရ မန္တလေးတိုင်းထဲက ငလျင်ကြောင့် သေဆုံးမှုများတဲ့မြို့တွေထဲ ပျော်ဘွယ်က ဒုတိယအများဆုံးဖြစ်ပြီး ၂၃၃ ယောက်သေဆုံးထားပါတယ်။
ရေးသားသူ- BBC Burmese
မိုးနတ်မင်းသတင်းစုံကို ဖတ်ရှုအားပေးတဲ့အတွက် ကျေးဇူးအထူးတင်ရှိပါတယ်။
မိုးနတ်မင်း သတင်းစုံ နှင့် Moe Nat Min TV မှ ပြည်တွင်းသတင်း၊ နိုင်ငံတကာသတင်း၊ ဆယ်လီသတင်းများ (အနုပညာသတင်းများ) အပြင် ကျန်းမာရေး၊ ဗေဒင်၊ ဗဟုသုတများကိုပါ နေ့စဉ်တင်ဆက်ပေးနေပါပြီ။
👉 သတင်း အသစ်တင်တိုင်း သိရှိရန်
Telegram Channel Join ထားပါ
Telegram Channel ဝင်ရန်နှိပ်ပါ
👉 ရုပ်သံဖြင့် သတင်းကြည့်ရှုရန်
Youtube Channel Join ထားပါ
Youtube Channel ဝင်ရန်နှိပ်ပါ
