ငလျင်ဒဏ်သင့်မန္တလေးနှင့် နေပြည်တော်၌ ခိုးယူမှုများရှိနေ
မန္တလေးနှင့်နေပြည်တော်ရှိငလျင်ဒဏ်သင့်ဝန်ထမ်းအိမ်ရာနှင့် ကွန်ဒိုတိုက်ခန်းများတွင် ပစ္စည်းခိုးယူမှုများရှိနေကြောင်းဒေသခံများထံမှသိရသည်။
မန္တလေးမြို့တွင် ငလျင်ဒဏ်ခံခဲ့ရခြင်းကြောင့် လူမနေရဲတော့သည့် ကွန်ဒိုများတွင်ခိုးယူခံရမှုများရှိကြောင်း မန်းလေးမြို့တွင်နေထိုင်သူတစ်ဦးကပြောသည်။
“ကျွန်မအခုနေတဲ့ 63 Tower ကွန်ဒို ငလျင်ဒဏ်ကြောင့်ထိခိုက်ထားလို့နေလို့မရတော့သလို ပစ္စည်းတွေအခိုးခံရလို့ အကုန်တစ်ကပြန်စရမှာပါပဲ။ အကုန်ပြန်ထူထောင်ရမှာပါ” ဟု ၎င်းက ပြောသည်။
ထို့ပြင်နေပြည်တော်ရှိဝန်ထမ်းအိမ်ရာတွင်လည်း ပစ္စည်းခိုးယူခံရမှုများရှိနေကြောင်း ဒေသခံများထံမှ သိရသည်။
“လုတဲ့၊ ခိုးတဲ့လူတွေကအဖွဲ့လိုက်လုပ်နေကြတာ။ နေပြည်တော်မှာကသိတဲ့အတိုင်း တိုက်တွေပေါ် ပြန်မတက်ရဲကြဘူးလေ။ အကုန်လမ်းဘေးဆင်းနေရတာ။ သူတို့လုတဲ့ခိုးတဲ့အဖွဲ့တွေက ကိုယ်တွေလိုပဲ လမ်းဘေးမှာအထုပ်တွေလာချနေတယ်။ လူတွေရောထွေးအောင်ပေါ့။ပြီးကျ အရက်ထိုင်သောက် ကြတယ်။ မနေ့ကဆို အိမ်မှာအရေးကြီးတဲ့ပစ္စည်းကျန်လို့ ကြောက်ကြောက်နဲ့သွားယူတာ။ လူစိမ်းတွေ အုပ်စုလိုက်ကြီး အိမ်မှာဝင်နေ နေကြတာ။ ဒါသူတို့အိမ် ထွက်သွားဆိုပြီးတောင်ပြောလွှတ်တာ။ အိမ်က အရေးကြီးတဲ့တန်ဖိုးရှိတာတွေအပြင် ပတ်စပို့စ်တွေ၊ မှတ်ပုံတင်တွေကအစပြန်မရတော့ဘူး” ဟု နေပြည်တော်ဝန်ထမ်းအိမ်ရာတွင်နေထိုင်သူတစ်ဦးကပြောသည်။
ပြီးခဲ့သည့်မတ် ၂၈ ရက်၊ မွန်းလွဲ ၁ နာရီဝန်းကျင်က မြန်မာနိုင်ငံစစ်ကိုင်းမြို့ကိုဗဟိုပြု၍ အင်အားရစ်ခ်ျ တာစကေး ၇ ဒသမ ၇ အဆင့်ရှိမြေငလျင်နှင့် နောက်ဆက်တွဲမြေငလျင်လှုပ်ခတ်မှုကို ရန်ကုန်အပါအဝင် မြန်မာပြည်အလယ်ပိုင်းဒေသတွင် သိသိသာသာခံစားခဲ့ရသည်။
ရေးသားသူ- The Standard Time Daily
