ငလျင်ဒဏ်သင့် ဂရိတ်ဝေါဟိုတယ်၌ ရှာဖွေမှုများဆက်လက်လုပ်ဆောင်နေ
မန္တလေးမြို့၌ပြိုကျခဲ့သည့် ဂရိတ်ဝေါဟိုတယ်တွင် မြန်မာနိုင်ငံမီးသတ်တပ်ဖွဲ့နှင့် တရုတ်နိုင်ငံမှ ကယ်ဆယ်ရေးအဖွဲ့များပူးပေါင်းကာ ယနေ့(ဧပြီ ၄ ရက်) တွင် ရှာဖွေကယ်ဆယ်ရေးများ ဆက်လက် လုပ်ဆောင်လျက်ရှိကြောင်းသိရသည်။
အဆိုပါဟိုတယ်မှာရှစ်ထပ်ရှိပြီး မြေညီထပ်နှင့်ပထမထပ်မှာငလျင်လှုပ်ခတ်ပြီးနောက်ပြိုကျကာ နှစ်လွှာမှစ၍ ရှစ်လွှာအထိကျန်ရှိကြောင်း၊ ရှာဖွေမှုများပြုလုပ်ရာတွင် အသက်ရှင်ကျန်သူနှင့်သေဆုံး သူများကိုမတွေ့ရှိခဲ့ဘဲ ၎င်းတို့၏ပစ္စည်းများသာတွေ့ရှိခဲ့ကြောင်း စိတ္တသုခအရန်မီးသတ်တပ်ဖွဲ့မှ တာဝန်ရှိသူတစ်ဦးက ပြောသည်။
“အခန်းထဲသက်ကြီးဘိုးဘွားတွေရှိတယ်ဆိုလို့ ကျွန်တော်တို့ကလည်း ကိုယ်ချင်းစာပြီးရှာပေးမယ်ဆိုပြီး တက်ခွင့်ပြုမပြု သက်ဆိုင်ရာအဖွဲ့ကိုလည်းမေးတယ်။ သူတို့က ဒီမှာတရုတ်ကယ်ဆယ်ရေးအဖွဲ့ရှိတဲ့ အတွက် တရုတ်အဖွဲ့ကဝင်ခိုင်းရင်ဝင်ပါ ပြောတယ်။ ကျွန်တော်တို့မှာ ပစ္စည်းကိရိယာ ပြည့်စုံတဲ့အတွက် ဝင်ခွင့်ပြုလိုက်တာပါ။ အခန်းတိုင်းတော့ကျွန်တော်တို့စစ်လာခဲ့တယ်။ စစ်လာပြီး ကျွန်တော်တို့ ရောက်မယ့်အချိန်ကိုမှန်းပြီး သူတို့ကလည်းစက်နဲ့ရှာမှာမို့ ကျွန်တော်တို့ရှိရင်ရှာမရလို့ ရှစ်လွှာကနေ နှစ်လွှာပြန်ရောက်တဲ့ထိကို စောင့်ပေးပါတယ်။ ကျွန်တော်တို့ ရှာတဲ့လုပ်ငန်းစဉ်ပြီးတာနဲ့ ထွက်ခွာပေးဖို့ မေတ္တာရပ်ခံတာကြောင့်ထွက်လာခဲ့ရတယ်။ ကျွန်တော်တို့ပြန်ရောက်တာနဲ့ သူတို့စက်နဲ့ရှာဖို့ တစ်ခါတည်းဝင်ပါတယ်။ တရုတ်အဖွဲ့နဲ့ မြန်မာနိုင်ငံမီးသတ်တပ်ဖွဲ့ကရှာဖွေကယ်ဆယ်ရေးအဖွဲ့တွေ တောက်လျှောက်ရှာနေပါတယ်” ဟု ၎င်းကပြောသည်။
ရှာဖွေရန်အကူညီတောင်းခံထားသည့် အခန်းနံပါတ် ၄၁၀ နှင့်အထပ်ရှစ်ထပ်၏အခန်းတိုင်းသို့ ဝင်ရောက်စစ်ဆေးကာ စာရွက်စာတမ်းများမှအပ တန်ဖိုးရှိသောရွှေ၊ ငွေ၊ Laptop၊ စိစစ်ရေးကတ်ပြား များအား အခန်းနံပါတ်နှင့်တကွစာရင်းပြုစု၍ ဟိုတယ်ရှာဖွေရေးတာဝန်ခံများနှင့် သက်ဆိုင်ရာ အုပ်ချုပ်ရေးအဖွဲ့များသို့ အပ်နှံပေးခဲ့ကြောင်းသိရသည်။
“ကျွန်တော်တို့ပွင့်နေတဲ့ အခန်းတိုင်း၊ ပိတ်ထားတဲ့အခန်းတိုင်းကိုဖွင့်ကြည့်ပြီးရှာတဲ့အခါ dead body တော့မတွေ့ခဲ့ဘူး။ နယ်ခံအဖွဲ့ အစည်းမဟုတ်တော့ ပိတ်မိတဲ့စာရင်းကိုမသိဘူး။ ဟိုတယ် reception ကပဲ သေချာသိနိုင်မယ်။ အရင်ရက်တွေကတော့ အသက်ရှင်ရက်ထွက်လာတာ၊ dead body ထွက်တာ တော့ကြားပါတယ်။ ပစ္စည်းတွေ သိမ်းလာပေးတာလည်းရှိတယ်။ ဆေးကျောင်းကောင်မလေး နှစ်ယောက်ရဲ့ laptop တွေ့တယ်။ သူတို့နဲ့လည်းအဆက်သွယ်ပြန်ရပါတယ်။ သူတို့ကငလျင်လှုပ် တော့အရေးပေါ် ထွက်ပေါက်ကနေ မှန်ခွဲပြီးထွက်ပြေးလို့ ကံကောင်းပြီးလွတ်ပြီး အသက်ရှင်ပါတယ်။ သူတို့ပြေးပုံ အတိုင်းပြေးနိုင်ရင်တော့ လွတ်နိုင်ပေမယ့် ပြိုတဲ့ဘက်ပြေးမိရင် ကံမကောင်းနိုင်ဘူးပေါ့” ဟု စိတ္တသုခအရန်မီးသတ်တပ်ဖွဲ့မှ တာဝန်ရှိသူတစ်ဦးက ပြောသည်။
အဆိုပါ ဂရိတ်ဝေါဟိုတယ်မှာ ပြီးခဲ့သည့်မတ်လ ၂၈ ရက်တွင်လှုပ်ခတ်ခဲ့သည့် ငလျင်ဒဏ်ကြောင့် ပြိုကျခဲ့ပြီး မတ်လ ၃၀ ရက်တွင် မြန်မာနိုင်ငံမီးသတ်ဦးစီးဌာနမှ ရှာဖွေကယ်ဆယ်ရေးတပ်ဖွဲ့ဝင်များနှင့် အိန္ဒိယနိုင်ငံမှရှာဖွေကယ်ဆယ်ရေးတပ်ဖွဲ့ဝင်များပူးပေါင်းကာ ကူညီကယ်ဆယ်ရေးလုပ်ငန်းများ စတင်ခဲ့သည်။
ယင်းနောက်မတ်လ ၃၁ ရက်တွင် မီးသတ်ဦးစီးဌာနမှ ရှာဖွေကယ်ဆယ်ရေးတပ်ဖွဲ့ဝင်များ၊ တရုတ်နှင့်ရုရှားနိုင်ငံမှရှာဖွေကယ်ဆယ်ရေးတပ်ဖွဲ့ဝင်များက ကိုယ်ဝန်ဆောင်အမျိုးသမီးတစ်ဦးအား အသက်ရှင် လျက်ကယ်ဆယ်နိုင်ခဲ့ပြီး သေဆုံးသူအမျိုးသားတစ်ဦး၊ အမျိုးသမီးသုံးဦး၏ ရုပ်အလောင်းများအား ရှာဖွေတွေ့ရှိခဲ့ကြောင်း မြန်မာနိုင်ငံမီးသတ်တပ်ဖွဲ့ကထုတ်ပြန်ခဲ့သည်။
ယင်းသို့ရှာဖွေမှုများလုပ်ဆောင်းပြီးနောက် ဟိုတယ်အုပ်ချုပ်ရေးဘက်မှ ကယ်ဆယ်ရေးလုပ်ငန်းများကို ကန့်သတ်မှုများရှိလာသောကြောင့် ဟိုတယ်တွင်ပိတ်မိသူများ၏မိသားစုဝင်များက ဟိုတယ်ရှေ့ လမ်းဘေးတွင် လက်အုပ်ချီတောင်းပန်၍ ရှာဖွေမှုများဆက်လက်လုပ်ဆောင်ပေးရန် တောင်းဆိုသည့် ဗီဒီယိုဖိုင်မှာ လူမှုကွန်ရက်တွင်ပျံ့နှံ့ခဲ့ပြီးနောက် ဂရိတ်ဝေါဟိုတယ်၌ရှာဖွေရေးလုပ်ငန်းများ ပြန်လည် လုပ်ဆောင်ခဲ့ခြင်းဖြစ်သည်ဟု ဒေသခံများကပြောသည်။
ရေးသားသူ- The Standard Time Daily
မိုးနတ်မင်းသတင်းစုံကို ဖတ်ရှုအားပေးတဲ့အတွက် ကျေးဇူးအထူးတင်ရှိပါတယ်။
မိုးနတ်မင်း သတင်းစုံ နှင့် Moe Nat Min TV မှ ပြည်တွင်းသတင်း၊ နိုင်ငံတကာသတင်း၊ ဆယ်လီသတင်းများ (အနုပညာသတင်းများ) အပြင် ကျန်းမာရေး၊ ဗေဒင်၊ ဗဟုသုတများကိုပါ နေ့စဉ်တင်ဆက်ပေးနေပါပြီ။
👉 သတင်း အသစ်တင်တိုင်း သိရှိရန်
Telegram Channel Join ထားပါ
Telegram Channel ဝင်ရန်နှိပ်ပါ
👉 ရုပ်သံဖြင့် သတင်းကြည့်ရှုရန်
Youtube Channel Join ထားပါ
Youtube Channel ဝင်ရန်နှိပ်ပါ
