လာမည့် ဧပြီ ၁၇ ရက်အထိ ငလျင်ဒဏ်သင့်ဒေသများ အပါအဝင် တိုင်းနှင့်ပြည်နယ်များတွင် မိုးရွာနိုင်ဟု မိုးဇလ ထုတ်ပြန်
(ဧပြီ ၁၀ ရက်)နံနက်ပိုင်းမှစတင်၍ လာမည့် ဧပြီ ၁၇ ရက်အထိ ငလျင်ဒဏ်သင့် ဒေသများအပါအဝင် တိုင်းနှင့်ပြည်နယ်များတွင် မိုးရွာသွန်းနိုင်ပြီး နေရာကွက်၍မိုးကြီးနိုင်ကြောင်း မိုးလေဝသနှင့်ဇလဗေဒညွှန်ကြားမှုဦးစီးဌာန၏ထုတ်ပြန်ချက်အရ သိရသည်။
မြန်မာစံတော်ချိန် နံနက် ၅ နာရီခွဲ တိုင်းထွာချက်အရ အားကောင်းသောလေဖိအားနည်းရပ်ဝန်းသည် ဘင်္ဂလားပင်လယ်အော်အနောက် အလယ်ပိုင်းသို့ ရောက်ရှိခဲ့ပြီး လေဖိအားနည်းရပ်ဝန်းအဖြစ် အားလျော့သွားခဲ့ကြောင်း၊ အဆိုပါ လေဖိအားနည်းရပ်ဝန်းသည် နောက် ၂၄ နာရီအတွင်း ဘင်္ဂလားပင်လယ်အော်အလယ်ပိုင်း၌ တဖြည်းဖြည်း အားလျော့သွားနိုင်ကြောင်း မိုးဇလမှထုတ်ပြန်ထားသည်။
လေဖိအားနည်းရပ်ဝန်း၏ အရှိန်ကြောင့် ယနေ့နံနက်မှ မနက်ဖြန်ဧပြီ ၁၁ ရက်အတွင်း နေပြည်တော်၊ ရန်ကုန်တိုင်း၊ မန္တလေးတိုင်း၊ ပဲခူးတိုင်း၊ မကွေးတိုင်း၊ စစ်ကိုင်းတိုင်း၊ ဧရာဝတီတိုင်း၊ တနင်္သာရီတိုင်း၊ ကချင်ပြည်နယ်၊ ကယားပြည်နယ်၊ ကရင်ပြည်နယ်၊ ချင်းပြည်နယ်၊ မွန်ပြည်နယ်၊ ရခိုင်ပြည်နယ် နှင့် ရှမ်းပြည်နယ်တို့တွင် နေရာကျဲကျဲ မိုးထစ်ချုန်း ရွာနိုင်ကြောင်း ထုတ်ပြန်ထားသည်။
ထို့ပြင် ဧပြီ ၁၂ ရက် မှ ဧပြီ ၁၇ရက်အတွင်း နေပြည်တော်၊ ရန်ကုန်တိုင်း၊ မန္တလေးတိုင်း၊ ပဲခူးတိုင်း၊ မကွေးတိုင်း၊ စစ်ကိုင်းတိုင်း၊ ဧရာဝတီတိုင်း၊ တနင်္သာရီတိုင်း၊ ကချင် ပြည်နယ်၊ ကယားပြည်နယ်၊ ကရင်ပြည်နယ်၊ ချင်းပြည်နယ်၊ မွန်ပြည်နယ်၊ ရခိုင်ပြည်နယ် နှင့် ရှမ်းပြည်နယ်တို့တွင် နေရာစိပ်စိပ်မှ နေရာအနှံ့အပြား မိုးထစ်ချုန်းရွာပြီး၊ အချို့ဒေသများတွင် နေရာကွက်၍ မိုးကြီးနိုင်ကြောင်း ထုတ်ပြန်ချက်အရသိရသည်။
“မြန်မာနိုင်ငံအလယ်ပိုင်းက ငလျင်ဒဏ်သင့်ဒေသတွေမှာတော့ ဧပြီလ ၁၁ ရက် ည ၁၀ နာရီမှ နောက် ၂၄ နာရီအတွင်း မိုးများနိုင်ပါမယ်။ရွာသွန်းနိုင်တဲ့မိုးရေချိန် ၂၄ နာရီအတွင်း ၆၀ မီလီမီတာ(၂ ဒသမ ၃၆ လက်မ)အထိ ရွာနိုင်ပါမယ် “ဟု မိုးလေဝသစောင့်ကြည့်လေ့လာသူ ဦးဝင်းနိုင်ကလည်းခန့်မှန်းထားသည်။
ငလျင်ဒဏ်သင့်ဒေသခံများအတွက် အမိုးအကာများစီစဉ်ဆောင်ရွက်သင့်ကြောင်း ရုတ်တရက် မိုးများနိုင်မည့်အခြေအနေကြောင့် ရေကြီးနိုင်မည့်အန္တရာယ်ရှိလာနိုင်ကြောင်း၊ ငလျင်ထိထားသည့် မြေအောက်မြေထုလွှာအခြေအနေများကြောင့် မြေပြို၊မြေကျွံနိုင်သည့် အခြေအနေများကိုကြိုတင်ထည့်သွင်းစဉ်းစားရန် လိုအပ်ကြောင်းကိုလည်း ၎င်းကဆက်လက်အသိပေးထားသည်။
မိုးသည်းထန်စွာရွာသွန်းခြင်းနှင့်အတူ လေပြင်းတိုက်ခတ်ခြင်း၊ မိုးထစ်ချုန်းခြင်း၊ မိုးကြိုးပစ်ခြင်း၊ လျှပ်စီးလက်ခြင်း၊ မိုးသီးကြွေခြင်း၊ လျှပ်တစ်ပြက်ရေကြီးခြင်းနှင့် မြေပြိုခြင်းစသည့် သဘာဝဘေးအန္တရာယ်များ ဖြစ်ပေါ်နိုင်၍ အဆိုပါဒေသများရှိ ကုန်းမြင့်ဒေသအနီးတွင် နေထိုင် ကြသူများအနေဖြင့် မြေပြိုမှုအန္တရာယ်အားလည်းကောင်း၊ မြစ်ငယ်၊ ချောင်းငယ်များအနီးတွင် နေထိုင် ကြသူများအနေဖြင့် ရေကြီး၊ ရေလျှံမှုအန္တရာယ်များကိုလည်းကောင်း ကြိုတင်သတိပြုရန် မိုးဇလမှထုတ်ပြန်ချက်တွင်အသိပေး ဖော်ပြထားသည်။
ရေးသားသူ-The Standard Time Daily
မိုးနတ်မင်းသတင်းစုံကို ဖတ်ရှုအားပေးတဲ့အတွက် ကျေးဇူးအထူးတင်ရှိပါတယ်။
မိုးနတ်မင်း သတင်းစုံ နှင့် Moe Nat Min TV မှ ပြည်တွင်းသတင်း၊ နိုင်ငံတကာသတင်း၊ ဆယ်လီသတင်းများ (အနုပညာသတင်းများ) အပြင် ကျန်းမာရေး၊ ဗေဒင်၊ ဗဟုသုတများကိုပါ နေ့စဉ်တင်ဆက်ပေးနေပါပြီ။
👉 သတင်း အသစ်တင်တိုင်း သိရှိရန်
Telegram Channel Join ထားပါ
Telegram Channel ဝင်ရန်နှိပ်ပါ
👉 ရုပ်သံဖြင့် သတင်းကြည့်ရှုရန်
Youtube Channel Join ထားပါ
Youtube Channel ဝင်ရန်နှိပ်ပါ
