ရှမ်းပြည်နယ်မြောက်ပိုင်းမှာ တိုင်းရင်းသား လက်နက်ကိုင်အဖွဲ့ ၂ ခုကြား တိုက်ပွဲထပ်မံဖြစ်ပွားရာက ကိုယ်ဝန်ဆောင် အမျိုးသမီး ၁ ဦး အပါအဝင် လူ ၄ ဦး လက်နက်ကြီးကျည် ထိမှန်ဒဏ်ရာရခဲ့သလို စစ်ရှောင်တွေလည်း ထပ်တိုးလာတဲ့အကြောင်း ပြောပြပါမယ်။
နမ္မတူမြို့နယ် နမ့်ပိုင်ရွာအနီး တိုင်းရင်းသား လက်နက်ကိုင်အဖွဲ့ ၂ ခုဖြစ်တဲ့ TNLA တအန်း(ပလောင်)တပ်ဖွဲ့နဲ့ RCSS ရှမ်းပြည်တပ်မတော်တောင်ပိုင်းအကြား တိုက်ပွဲထပ်မံဖြစ်ပွားရာက ဒေသခံတချို့ ထိခိုက်ဒဏ်ရာတွေ ရခဲ့ကြတာပါ။
ကြာသပတေးနေ့ ညနေ ၄ နာရီလောက်မှာ ဖြစ်ပွားခဲ့တဲ့ တိုက်ပွဲနဲ့ ပတ်သက်ပြီး TNLA ဗိုလ်မှူးတာ့အိုက်ကျော်က အခုလို ပြောပါတယ်။
“မနေ့ကတော့ ဒီ နမ့်ပိုင်ရွာအထက်နားမှာဖြစ်တယ်။ ကျနော်တို့ အဖွဲ့က နမ့်ပိုင်ကနေတက်လာတော့ RC က အပေါ်ကနေ လှမ်းပစ်တော့ တိုက်ပွဲစဖြစ်တယ်။ ညနေ ၄ နာရီခွဲကနေ ၅ နာရီထိ နာရီဝက်လောက်ဖြစ်တယ်ဗျ။”
တိုက်ပွဲဖြစ်ပွားချိန်မှာ နမ့်ပိုင်ရွာအတွင်းကို လက်နက်ကြီးကျည်ကျရောက်တာကြောင့် ကိုယ်ဝန်ဆောင်တစ်ဦးအပါအဝင် ၄ ယောက် ထိခိုက်ခဲ့ကြောင်း စစ်ရှောင်တွေကို ကူညီပေးနေတဲ့ နမ္မတူမြို့က ဦးစိုင်းဘဉာဏ်က ပြောပါတယ်။
“လက်နက်ကြီးကျတာပေါ့။ လက်နက်ကြီးကျပြီးမှ ထော်လာဂျီပေါ်ကျပြီးမှာ အိမ်ထဲမှာနေတဲ့လူတွေ အကုန်လုံး ထိမိတာ။ ကျားတစ်ယောက်၊ မ သုံးယောက်။ ကိုယ်ဝန်သည်က အသက် ၁၉ နှစ်။ ဆေးရုံပို့ထားတယ်။ နမ္မတူဆေးရုံ။”
ထိခိုက်ဒဏ်ရာရသူတွေဟာ အသက်အန္တရာယ် မစိုးရိမ်ရကြောင်းနဲ့ သက်သာလာပြီဖြစ်ကြောင်းလည်း ပြောပါတယ်။
တိုက်ပွဲဖြစ်ပွားပြီးနောက်မှ နမ့်ပိုင်ရွာသားတွေဟာ မန်စံရွာကို တိမ်းရှောင်လာတာကြောင့် စစ်ရှောင်ဦးရေ ထပ်တိုးလာနေကြောင်း ဦးစိုင်းဘဉာဏ်က ဆက်ပြောပါတယ်။
“အခြေအနေကတော့ ဆက်ဖြစ်မယ့် အလားအလာရှိတာဆိုတော့ သူတို့ နမ့်ပိုင်ရွာက လူတွေအားလုံး ကျနော်တို့ မန်စံကို ရောက်နေပြီ။ နမ့်ပိုင်က လူ ၄၃ ယောက်ပေါ့။ သူတို့ ထပ်ပြီးရောက်လာတာ။ အားလုံး အခု လူသစ်ရော၊ လူဟောင်းရောဆိုရင် ၃၀၀ ကျော်လောက်ရှိတယ်။”
ဒီကနေ့လည်း နားတုံရွာဘက်မှာ လက်နက်ကြီး ပစ်ခတ်သံတွေကြားရကြောင်းနဲ့ စစ်ရှောင်တွေ ထပ်ရောက်နိုင်ဖွယ်ရှိကြောင်းလည်း ခန့်မှန်းပြောဆိုပါတယ်။
RCSS ကတော့ သူတို့တပ်ဖွဲ့ကို TNLA က ထိုးစစ်ဆင် တိုက်ခိုက်တာဖြစ်ကြောင်း၊ နမ့်ပိုင်ရွာအတွင်း ကျရောက်တဲ့လက်နက်ကြီးဟာ TNLA က ပစ်ခတ်တာဖြစ်ကြောင်း သတင်းထုတ်ပြန်ထားပေမဲ့ ဒေသခံတွေကတော့ ဘယ်အဖွဲ့ လက်ချက်ဆိုတာကို အတည်ပြုချက် မပေးပါဘူး။
မြန်မာနိုင်ငံက လက်နက်ကိုင် ပဋိပက္ခတွေအတွင်း အရပ်သားထိခိုက်သေဆုံးမှုတွေအပေါ် စိုးရိမ်ကြောင်း ကုလသမဂ္ဂ အပါအဝင် နိုင်ငံတကာ အဖွဲ့အစည်းတွေနဲ့ လူ့အခွင့်အရေးလှုပ်ရှားသူတွေကလည်း ပြောဆိုထားကြပါတယ်။ လူ့အခွင့်အရေးအဖွဲ့အစည်း တစ်ခုဖြစ်တဲ့ ညီမျှခြင်းမြန်မာရဲ့ ဒါရိုက်တာ ဦးအောင်မျိုးမင်းကတော့ စစ်ပွဲအတွင်းမှာ အရပ်သားတွေကို ထိခိုက်မှုမရှိစေဖို့ လက်နက်ကိုင်အဖွဲ့တွေမှာ တာဝန်ရှိကြောင်း ထောက်ပြထားပါတယ်။
“ပါဝင်ပတ်သက်တဲ့ တပ်ဖွဲ့တိုင်း၊အဖွဲ့အစည်းတိုင်း အရပ်သူ၊ အရပ်သားတွေတင်မကဘဲနဲ့ ခုဏကလို အမျိုးသမီးနဲ့ ကလေးတွေကို ကာကွယ်ပေးရမယ့် တာဝန်ရှိပါတယ်။ ဂျနီဗာကွန်ဗင်းရှင်းဆိုတဲ့အကြောင်းအရာက တစ်နိုင်ငံနဲ့ တစ်နိုင်ငံ စစ်ဖြစ်မှ မဟုတ်ဘူး။ ပြည်တွင်းမှာဖြစ်ပျက်နေတဲ့ စစ်ပွဲဆိုင်ရာတွေမှာလည်း သက်ရောက်မှုရှိပါတယ်။ ဘယ်သူပဲ ကျူးလွန်ကျူးလွန် ဒီဟာတွေက အမြန်ဆုံးလည်း ရပ်ဖို့ လိုအပ်တယ်။ ဒါတွေမဖြစ်အောင်လည်း တားဖို့ လိုအပ်သလို ဖြစ်လာတဲ့ ကိစ္စမှာလည်း အမြန်ဆုံး အရေးယူဆောင်ရွက်နိုင်ဖို့။ ထိခိုက်တဲ့သူတွေကို လိုအပ်သလို ဝိုင်းဝန်းပြီးတော့ ပြန်လည်နာလံထအောင်လုပ်ဆောင်ပေးဖို့အတွက် ပါဝင်ပတ်သက်တဲ့ အဖွဲ့တွေအားလုံး တာဝန်ယူပေးကြပါ။ နောက် စစ်ကို တားဆီးပေးကြပါလို့ တိုက်တွန်းလိုပါတယ်။”
ရှမ်းပြည်နယ်မြောက်ပိုင်းမှာ နယ်မြေပိုင်ဆိုင်မှုအတွက် အငြင်းပွားရာက ဒီလ ၅ ရက်နေ့က စတင်ပြီး SSPP ရှမ်းပြည်တပ်မတော်မြောက်ပိုင်းနဲ့ TNLA တအန်း(ပလောင်) ပူးပေါင်းတပ်တွေနဲ့ RCSS ရှမ်းပြည်တပ်မတော်တောင်ပိုင်းအကြား တိုက်ပွဲတွေ ဖြစ်ပွားခဲ့တာပါ။ ဒီကနေ့အထိဆိုရင် တိုက်ပွဲပေါင်း ၄ ကြိမ်လောက်ဖြစ်ပွားခဲ့ပြီး လက်ရှိမှာလည်း စစ်ရေးတင်းမာမှုတွေ ဆက်ရှိနေဆဲဖြစ်ပါတယ်။
