စစ်မှုထမ်းဥပဒေကြောင့် တိမ်းရှောင်လာသူတွေကို ကူညီပေးဖို့ ထိုင်းအတိုက်ခံ တိုက်တွန်း
ထိုင်းရောက်မြန်မာအရေးလှုပ်ရှားသူတွေနဲ့ တွေ့ဆုံခဲ့တဲ့ ကနဝီဆစ်ဘ်ဆန် (အလယ်လူ)
မြန်မာနိုင်ငံမှာ စစ်မှုမထမ်းမနေရဥပဒေကြောင့် ထွက်ပြေးတိမ်းရှောင်လာကြတဲ့ မြန်မာနိုင်ငံသားတွေကို ထိုင်းအစိုးရအနေနဲ့ လူသားချင်းစာနာထောက်ထားပြီး ကူညီပေးဖို့ ထိုင်းနိုင်ငံရဲ့ အတိုက်အခံလွှတ်တော်အမတ်ကနဝီဆစ်ဘ်ဆန်ကတိုက်တွန်းလိုက်ပါတယ်။
ထိုင်း FAIR ပါတီရဲ့ လွှတ်တော်ကိုယ်စားလှယ်ဖြစ်တဲ့ ကနဝီဆစ်ဘ်ဆန်က မြန်မာ့အရေးနဲ့ပတ်သက်ပြီး တော်လှန်ရေးအင်အားစုတွေနဲ့ မြန်မာနိုင်ငံသားတွေဘက်ကတောက်လျှောက်ရပ်တည် ပြီး ထိုင်းအစိုးရကို မေးခွန်းထုတ်လေ့ရှိသူလည်းဖြစ်ပါတယ်။
အခုဆိုရင် မြန်မာအလုပ်သမား ၇၀၀၊၈၀၀ ဝန်းကျင် ထိုင်းကိုနေ့စဥ် ပို့နေတဲ့လုပ်ငန်းစဥ်ကို ရပ်တန့်လိုက်တာကိုလည်း FAIRပါတီရဲ့ ကိုယ်စားလှယ်ဖြစ်တဲ့ ကနဝီက ထောက်ပြပါတယ်။
ကနဝီက သူ့အနေနဲ့ မြန်မာပြည်တွင်း မငြိမ်မသက်မှုတွေက ရွှေ့ပြောင်းအလုပ်သမားအရေးနဲ့ ဆက်စပ်မှုရှိမရှိ မသေချာပေမယ့် ထိုင်းနိုင်ငံကို ဝင်ရောက်လာတဲ့မြန်မာနိုင်ငံသားတွေကို နေရပ်ပြန်ပို့မယ်ဆိုရင် ဖြစ်လာနိုင်တဲ့ အကျိုးဆက်တွေအတွက်တော့ စိုးရိမ်မိတယ်လို့ ပြောပါတယ်။
“ထိုင်းဘက်ကိုမြန်မာနိုင်ငံသားအများကြီးထွက်ပြေးတိမ်းရှောင်လာနေကြတယ်။ သူတို့က တရားမဝင်ခိုးကြောင်ခိုးဝှက်ဝင်လာကြတာမဟုတ်ပါဘူး။ သူတို့ဟာ အသက်ဘေးကပြေးလာကြတာ။ စစ်မြေပြင်မှာ အသေခံခိုင်းဖို့လုပ်နေတာကို ရှောင်လာကြတာ။ စစ်မှုထမ်းတာကနေလွတ်မြောက်အောင် ရှောင်လာကြတာ။’’ လို့ ကနဝီကပြောပါတယ်။
ဒီကြီးထွားလာနေတဲ့ မြန်မာနိုင်ငံသားတွေရဲ့ အကျပ်အတည်းကို တုံ့ပြန်တဲ့အနေနဲ့ ထိုင်းအစိုးရက ခြောက်လကြာ အရေးပေါ် အစီအစဉ်တစ်ခု လုပ်ပေးဖို့ လိုအပ်ကြောင်း အလေးပေးပြောကြားခဲ့ပါတယ်။
တရားဝင်စာချုပ်လုပ်သား MoUs အလုပ်သမား ပို့ဆောင်တာ ရပ်ထားလို့ ဖြစ်ပေါ်လာတဲ့ အလုပ်သမားလိုအပ်ချက် ကွက်လပ်နေရာမှာ ထိုင်းနိုင်ငံမှာခိုလှုံဖို့ရောက်လာတဲ့မြန်မာနိုင်ငံသားတွေကို ယာယီခန့်ထားပေးဖို့ကိုလည်း အဆိုပြုခဲ့ပါတယ်။
ရေးသားသူ –BBC Burmese
မိုးနတ်မင်း သတင်းစုံ – Telegram Channel မှလည်း ပြည်တွင်းသတင်း၊ နိုင်ငံတကာသတင်း၊ ဆယ်လီသတင်းများအပြင် ကျန်းမာရေး၊ ဗေဒင်၊ ဗဟုသုတများကိုပါ နေ့စဉ်တင်ဆက်ပေးနေပါပြီ။ အသစ်အသစ်သော သတင်းတွေမလွတ်သွားရအောင် အောက်ပါ Link လေးကိုနှိပ်ပြီး အခုပဲ join ထားလိုက်ပါ။
မိုးနတ်မင်း ပရိသတ်ကြီးလည်း အခုသတင်းလေးကိုဖတ်ပြီး ထင်မြင်ချက်တွေကို ကွန်မန့်မှာရေးခဲ့ရင်း မိတ်ဆွေများသိအောင် သတင်းကို မျှဝေပေးခဲ့ပါဦး။
