ထိုင်းနိုင်ငံအလယ်ပိုင်း စမွတ်ဆာခွန်းခရိုင်၊ မဟာချိုင်မြို့က ဘောလုံးကွင်းထဲမှာ ယာယီဖွင့်လှစ်ထားတဲ့ အရေးပေါ်ဆေးရုံမှာ ကုသမှုခံယူနေရတဲ့ မြန်မာအလုပ်သမားတွေကို အသုတ်လိုက်ခွဲပြီး ဆေးရုံက ဆင်းခွင့်ပြုနေတာ ဖြစ်ပါတယ်။ မနေ့တုန်းက တတိယ အသုတ်အဖြစ် ယာယီဆေးရုံကနေ ဆင်းခွင့်ပြုလိုက်တဲ့ သူတွေနဲ့ပါဆိုရင် အလုပ်သမား ၆၀၀ နီးပါး ရှိသွားပြီလို့လည်း ထိုင်းနိုင်ငံအခြေစိုက် ရွှေ့ပြောင်းအလုပ်သမား အခွင့်အရေးကွန်ယက်ရဲ့ဥက္ကဋ္ဌ ဦးအောင်ကျော်က ပြောပါတယ်။
“ဆေးရုံက ဆင်းတာ ၆၀၀ ဝန်းကျင်လောက်ဖြစ်သွားပြီ။ သုံးသုတ်ပါ။ ပထမဦးဆုံးကတော့ ၃၀၀ လောက်ဆိုတာ သူတို့ ထုတ်ပြန်တယ်။ နောက်ရက်တွေမှာတော့ ၂ သုတ်ကတော့ ၃၀၀ နီးပါးလောက်ရှိတယ်။”
ထိုင်းနိုင်ငံမှာ ကိုဗစ်ကပ်ရောဂါ ကူးစက်မှုတွေ တကျော့ပြန်ဖြစ်ပွားရာက မြန်မာနိုင်ငံသားတွေ အလုပ်လုပ်ကိုင်နေတဲ့ မဟာချိုင်ဒေသမှာ ရောဂါကူးစက်မှုတွေ အများအပြား စစ်ဆေးတွေ့ရှိခဲ့တာပါ။ ရောဂါကူးစက်သူ မြန်မာနိုင်ငံသား ခန့်မှန်းခြေ ၁,၀၀၀ ကျော်လောက်ကို ယာယီဆေးရုံကို ပို့ဆောင်ကုသပေးခဲ့ပြီး မကြာသေးခင်ရက်တွေကစ ပြန်လည်သက်သာလာသူတွေကို ဆေးရုံက ဆင်းခွင့်ပြုနေတာ ဖြစ်ပါတယ်။ ထိုင်းနိုင်ငံမှာ စမွတ်ဆာခွန်းခရိုင်ဟာ ကိုဗစ်ရောဂါကူးစက်မှုတွေ မြင့်မားနေဆဲ ဖြစ်ပေမဲ့ အရင်ထက်တော့ နည်းလာနေတယ်လို့လည်း ထိုင်းကျန်းမာရေးတာဝန်ရှိသူတွေက သတင်းထုတ်ပြန်ထားတယ်လို့ အလုပ်သမားရေး လှုပ်ရှားသူ ဦးအောင်ကျော်က ပြောပြပါတယ်။
“ခရိုင်အားလုံးထဲမှာ ကျနော်တို့ စမွတ်ဆာခွန်းကတော့ ထိပ်ဆုံးက တက်နေတယ်။ ၁၁ ရက်နေ့ ၂၄၉၊ ၁၂ ရက်နေ့မှာ ၂၈၇ နေ့တိုင်းတက်နေတယ်။ ဒီနေ့တော့ သတင်းမထွက်သေးဘူး။ ပျမ်းမျှကတော့ နေတိုင်း ၂၀၀ ကျော်တက်နေတယ်။ အလုပ်သမားတွေကြားမှာ စစချင်းကတော့ ၁,၀၀၀ ကျော်ကနေ ၇၀၀ ကျော်၊ ၈၀၀ ကျော် အခုနောက်ပိုင်းမှာ၂၀၀ ကျော်ပဲဆိုတော့ အလုပ်သမားတွေကြားမှာ ကူးစက်မှု ကျလာပြီလို့ သူတို့ သတ်မှတ်တယ်။ လုပ်သားတွေ ကိုယ်တိုင်လည်းအရင်ကဆို လမ်းမတွေပေါ်မှာ တိုးမပေါက်ဘူး။ အခုကတော့ လမ်းမတွေပေါ်မှာ လူတွေ သိပ်မရှိတော့ဘူး။ သူတို့ ကျန်းမာရေးအရတော့ လိုက်နာတယ်ပေါ့ ဒဏ်ငွေ ၂၀,၀၀၀ ရိုက်မယ်ဆိုတာကိုလည်း စိုးရိမ်တာပေါ့။ ဒဏ်ငွေရိုက်တာက နှားခေါင်းစည်း မတပ်တာ ကျန်းမာရေးဝန်ကြီးဌာနက စည်းမျဉ်းတွေ မလိုက်နာရင် ဒဏ်ငွေ ၂၀,၀၀၀ ရိုက်မယ်ဆိုတာကိုလည်း သူတို့ စိုးရိမ်တာမျိုးဖြစ်ပြီး လိုက်နာတာလည်းတွေ့ရပါတယ်။”
ဆေးရုံကနေ ပြန်ဆင်းလာတဲ့ လူနာတွေကိုတော့ နယ်မြေ ကျန်းမာရေဆိုင်ရာ ကပ်ရောဂါ ထိန်းချုပ်ရေးအဖွဲ့က ရောဂါကင်းရှင်းပြီဖြစ်ကြောင်း ဆေးမှတ်တမ်း ထောက်ခံစာထုတ်ပေးပြီး မူရင်းအလုပ်ရှင်တွေဆီ ပြန်ပို့ပေးခဲ့ပါတယ်။ ဒါပေမဲ့ စမွတ်ဆာခွန်းခရိုင်ထဲက အလုပ်သမားတွေကိုတော့ တနယ်မြေနဲ့ တနယ်မြေ ကူးသန်းခွင့်နဲ့ ခရီးသွားလာခွင့်တွေကိုတော့ ဆက်ပိတ်ပင်ကန့်သတ်ထားဆဲဖြစ်ပါတယ်
ကိုဗစ်ကပ်ရောဂါကြောင့်သေဆုံးသူ ၆၇ ဦးနဲ့ ကူးစက်သူ အတည်ပြုလူနာ ၁၀,၀၀၀ ကျော်ရှိတဲ့ ထိုင်းနိုင်ငံမှာ ပြီးခဲ့တဲ့ လလယ်ကစလို့ ကူးစက်မှုတွေ တကျော့ပြန် တွေ့ရှိခဲ့တဲ့အထဲမှာ မြန်မာရွှေ့ပြောင်းအလုပ်သမားတွေ အများစုပါဝင်နေတာပါ။
မြန်မာနိုင်ငံမှာတော့ သေဆုံးသူ ၂,၈၀၀ ကျော်နဲ့ ကူးစက်သူအတည်ပြုလူနာ ၁၃၀,၀၀၀ ကျော်ရှိနေတာကြောင့် ထိုင်းအာဏာပိုင်တွေက နယ်စပ်ဒေသတွေမှာ သွားလာလှုပ်ရှားမှုတွေကို ကန့်သတ်ထားပြီး လုံခြုံရေးကိုလည်း တင်းကြပ်ထားပါတယ်။
