ခုနစ်ရက်သားသမီးများအတွက် 3.12.2023 မှ 9.12.2023ထိ တစ်ပတ်စာကံကြမ္မာဟောကိန်း
တနင်္ဂနွေသားသမီး
အောင်မြင်မှု၏အနှစ်သာရကိုရရှိမည်။ အဆင့်မြင့်တက်လမ်းကြုံမည်။ ခက်ခဲသောပြဿနာများဖြေရှင်းနိုင်မည်။ ယှဥ်ပြိုင်သူအလုံးအပေါ် အနိုင်ယူနိုင်မည်။ ပညာအတတ်နှင့် တိုးတက်မှုရမည်။ ချက်ချင်းဆုံးဖြတ်ပြီး ရှေ့တိုးဆောင်ရွက်ခြင်းတို့မှ ထူးခြားသောအကျိုးဆက်ကိုရရှိမည်။ လုပ်ငန်းခွင်မှသူများ အလုပ်တိုးတက်မည်။ ပညာသင်တန်းကိစ္စများဆောင်ရွက်ရမည်။ နာမည်ကောင်းသတင်းကျော်ကြားမည်။ အခြားသူတစ်ပါးတို့ကနေရာပေး၍ တလေးတစားဆက်ဆံခြင်းကိုရရှိမည်။ ပြတ်တောက်နေသော အဆက်အသွယ်များနှင့်ပြန်လည်ချိတ်ဆက်မိမည်။
ယတြာ – ကြက်၊ ငှက်တို့ကို အစာကျွေးခြင်းပြုပါ။
တနင်္လာသားသမီး
ဖြေရှင်းရန်ခက်ခဲသောပြဿနာနှစ်ခု တစ်ပြိုင်နက်တည်းဖြေရှင်းရမည်။ ကာလရှည်ကြာမှားယွင်းထားသောစာရင်းဇယားများ၊ ပျောက်ဆုံးနေသောစာရင်းဇယားများ၊ ကွာဟနေသော စာရင်းဇယားများ၊ မရိုးမသားဆောင်ရွက်သောလုပ်ဖော်ကိုင်ဖက်များ၊ ပြဿနာအလုံးစုံကိုခေါင်းရှောင်၍ မိမိအပေါ် အပြစ်ပုံချသူများကြား ရောက်ရှိနေမည်။ ပြတ်သားပါးနပ်စွာ ကိုင်တွယ်ဖြေရှင်းပါ။ ရိုးအသည်ဟုယူဆသတ်မှတ်ထားသောသူက ကိုယ့်အပေါ်လိမ်ညာလိမ့်မည်။ စုဆောင်းထားသောငွေများ ရုတ်ခြည်းသုံးစွဲရမည်။ လျှပ်စစ်ပစ္စည်းများဝယ်ယူမှုမှားယွင်းတတ်သည်။
ယတြာ – မိမိအိမ်ဘုရားမှာ လိမ္မော်ရည်ကပ်လှူပါ။
အင်္ဂါသားသမီး
အရေးကြီးသောဆုံးဖြတ်ချက်များ ချမှတ်နိုင်မည်။ အတိုက်အခံများရှိမည်။ ဆောင်ရွက်ရန် ငွေအင်အား၊ လူအင်အားအပြည့်ရှိသည့်အပြင် အခွင့်အရေးကောင်းများကိုရရှိနေလျက် လက်တွေ့ဆောင်ရွက်ရန် ခက်ခဲနေမည်။ အတားအဆီး၊ အနှောင့်အယှက်များရှိမည်။ မနာလိုသူများက လိုက်လံပိတ်ဆို့တားဆီးသောကြောင့်နှောင့်နှေးလွဲချော်ခြင်းများရှိမည်။ ဝေဖန်သူများစကားအပေါ် အလေးထားမိ၍ အမှားကြုံတတ်သည်။ သူတစ်ပါးအပေါ်ယုံကြည်အားကိုး၍မရ။ ပေါ်ပေါက်လာသောအခြေအနေနှင့် ဖြစ်ပေါ်လာသောပြဿနာအရပ်ရပ်အားကိုယ်တိုင်ကိုင်တွယ်ဖြေရှင်းပါ။
ယတြာ – ရွက်လှေတစ်ခု ပိုစတာပုံ အနီးအပါးထားရှိပါ။
ဗုဒ္ဓဟူးသားသမီး
အယူအဆသစ်တို့ကို လက်တွေ့အကောင်အထည်ဖော်သင့်သည်။ တိုးတက်ရန်လုပ်သောကိစ္စများမှ ကောင်းသောသတင်းကြားသိရမည်။ အများအပေါ်ဦးဆောင်ရမည်။ သူတစ်ပါးကိစ္စတို့ကို ကြားဝင်တာဝန်ယူ၍ဆောင်ရွက်ရမည်။ နာမည်အောင်မြင်မှုနှင့်ကြုံမည်။ ကိုယ်ရေးကိုယ်တာကိစ္စထက် သူတစ်ပါးကိစ္စတို့ကိုလုပ်ကိုင်ဆောင်ရွက်ရလိမ့်မည်။ လုပ်သမျှလူသိထင်ရှားဖြစ်မည်။ ကိုယ့်အပေါ်စိတ်ဝင်စား၍ ကိုယ့်သတင်းနားစွင့်နေသူများရှိမည်။ကိုယ့်အပေါ် တစေ့တစောင်းကြည့်နေသူများရှိ၏။ အသွားအလာအနေအထိုင်အစစအရာရာဆင်ခြင်ရပေမည်။
ယတြာ – ပိတောက်ကိုင်းကို သုံးပိုင်းချိုးပြီးရေမျှောပြီး လိုရာဆန္ဒပြုပါ။
ကြာသပတေးသားသမီး
မိတ်ကောင်းဆွေကောင်း အထောက်အကူရမည်။ အခက်အခဲများကျော်လွှားနိုင်မည်။ ၅၂၈ – ၁၅၀၀ မေတ္တာ အလုံးစုံကောင်းသောကာလဖြစ်သည်။ မိသားစုနှင့်ပတ်သက်သည့် စိတ်ချမ်းမြေ့စရာများကို ကြုံတွေ့ရမည်။ တစ်ပါးသူတို့ဆောင်ရွက်ရင်းမနိုင်မနင်းဖြစ်ကာ တစ်ပိုင်းတစ်စရပ်တန့်ထားရသည့် အလုပ်ကိစ္စ၊ ငွေကြေးကိစ္စတို့ကို စနစ်တကျဖြစ်အောင်ပြုပြင်ဆောင်ရွက်နိုင်လိမ့်မည်။ အလှူမဂ်လာဧည့်ခံပွဲများသို့ သွားရောက်ရကိန်းရှိမည်။ မိသားစုအတွင်း စာသင်သားတို့ရှိက ပညာရေးအထူးကောင်းမည်။ အကြီးအကဲများ ကျန်းမာရေးအညံ့ကြုံကမပေါ့ဆအပ်။
ယတြာ – စားပွဲတင်ကမ္ဘာလုံးပုံစံငယ်တစ်ခုဝယ်ယူပြီး အနီးအပါးထားရှိပါ။
သောကြာသားသမီး
ဦးတည်ချက်ပြောင်း၍ ခရီးကိစ္စများဆောင်ရွက်အောင်မြင်မည်။ အရပ်ဝေးနှင့်ဆက်စပ်သောလုပ်ငန်းများမှ ထူးခြားသောတိုးတက်မှုကိုကြုံမည်။ နေရာအပြောင်းအရွှေ့ကိစ္စအဆင်ပြေမည်။ နိုင်ငံခြားခရီးသွားရောက်မှု ကိုယ်တိုင်တွင်လည်းကောင်း၊ မိသားစုတွင်လည်းကောင်း ဖြစ်တည်နေသည်။ ခြံ၊ ကား၊ အခန်းရောင်းမှား၊ ဝယ်မှားဖြစ်သူတစ်ဦးအား လိုက်လံကူညီဖြေရှင်းပေးရလိမ့်မည်။ အသက်အရွယ်ကြီးသူမိသားစုဝင်တို့၏ ကျန်းမာရေးအညံ့ကြုံမည်။ မပေါ့အပ်။ ပညာရေးကိစ္စဆောင်ရွက်သူများ အိမ်တွင်ရှိက ထိပ်တန်းမှထူးချွန်စွာ အောင်မြင်ခြင်းများရရှိနိုင်သည်။
ယတြာ – လှေကားပုံ ပိုစတာ အနီးအပါးထားရှိပါ။
စနေသားသမီး
ဘဝအခြေအနေ ရုတ်တရက်ပြောင်းလဲမြင့်မားသွားမည်။ ရည်မှန်းချက်အောင်မြင်မည်။ အခက်အခဲများ ကျော်လွှားနိုင်မည်။ ငွေကြေးအပေးအယူကိစ္စ အဆင်ပြေမည်။ ရင်းနှီးမြှုပ်နှံမှုများမှ အမြတ်အစွန်းကောင်းစွာရရှိမည်။ ကြိုးပမ်းဆောင်ရွက်ထားသည့်များမှ အကျိုးထူးခံစားရမည်။ ပုံမှန်ထက်ပို၍ ငွေဝင်မည်။ အပြိုင်အဆိုင် အားလုံးကို ကျော်လွှားနိုင်မည်။ အရောင်းထိုင်းပစ္စည်းများ စျေးကွက်အတွင်းအရောင်းအဝယ်သွက်လက်ကာ အကျိုးအမြတ်ကောင်းများရှိမည်။ အလှူမင်္ဂလာကိစ္စများကြုံမည်။ ရောင်းမှားဝယ်မှားပြဿနာများဖြေရှင်းနိုင်မည်။ ဝေးကွာနေသူများနှင့် ပြန်လည်ချိတ်ဆက်မိမည်။ သူတစ်ပါးကိစ္စလိုက်လံကူညီရင်း မိတ်ဆွေသစ်တိုးပွားမည်။
ယတြာ – နှင်းဆီနီ ၃ ပွင့်ကို ပန်းအိုးဖြင့်ထိုးပြီးအမြင့်တင်၍ လိုရာဆန္ဒပြုပါ။
ရေးသားသူ –ဆရာမရွှေရုပ်လွှာအကြားအမြင် ဗေဒင်
မိုးနတ်မင်း သတင်းစုံ – Telegram Channel မှလည်း ပြည်တွင်းသတင်း၊ နိုင်ငံတကာသတင်း၊ ဆယ်လီသတင်းများအပြင် ကျန်းမာရေး၊ ဗေဒင်၊ ဗဟုသုတများကိုပါ နေ့စဉ်တင်ဆက်ပေးနေပါပြီ။ အသစ်အသစ်သော သတင်းတွေမလွတ်သွားရအောင် အောက်ပါ Link လေးကိုနှိပ်ပြီး အခုပဲ join ထားလိုက်ပါ။
မိုးနတ်မင်း ပရိသတ်ကြီးလည်း အခုသတင်းလေးကိုဖတ်ပြီး ထင်မြင်ချက်တွေကို ကွန်မန့်မှာရေးခဲ့ရင်း မိတ်ဆွေများသိအောင် သတင်းကို မျှဝေပေးခဲ့ပါဦး။
