ယာဉ်ကြောပိတ်ဆို့မှုမဖြစ်ဘဲ လမ်းပြင်စေနိုင်မယ့် ရွေ့လျားခုံးကျော်တံတား
လမ်းပြင်ရင် ယာဉ်ကြောပိတ်ဆို့တတ်တယ်ဆိုတဲ့ ပြဿနာကို ဆန်းသစ်တီထွင်မှုတစ်ခုကြောင့် ဖြေရှင်းနိုင်ခဲ့ပါပြီ။ ဆွစ်ဇာလန်နိုင်ငံ လမ်းပြုပြင်ထိန်းသိမ်းရေးအာဏာပိုင်အဖွဲ့က ရွေ့လျားခုံးကျော်တံတားကို အသုံးပြုပြီး ယာဉ်ကြောပိတ်ဆို့မှုမရှိအောင် လမ်းပြင်သွားခဲ့တာပါ။
Astra Bridge လို့ အမည်ပေးထားတဲ့ ရွေ့လျားခုံးကျော်တံတားဟာ ၂၅၇ မီတာ ရှည်လျားပြီး ခုံးကျော်တံတားတစ်ခုလို လုပ်ဆောင်ပေးနိုင်ပါတယ်။ ပြုပြင်စရာရှိတဲ့ လမ်းပိုင်းမှာ အဲဒီရွေ့လျားခုံးကျော်တံတားခင်းထားရင် ကားတွေက ခုံးကျော်ပေါ်ကနေ ဖြတ်သန်းမောင်းနှင်နိုင်ပြီး လမ်းပြင်သူတွေကလည်း ခုံးအောက်မှာ လမ်းပြင်နေနိုင်မှာ ဖြစ်လို့ ယာဉ်ကြောပိတ်ဆို့မှု ဖြစ်မှာ မဟုတ်ပါဘူး။
Astra Bridge ပရောဂျက်ကို ဦးဆောင်သူကတော့ ဂျက်မာရီယန်လို့ အမည်ရပါတယ်။ သူဟာ လွန်ခဲ့တဲ့ ၁၀ နှစ်ကျော်က သြစတြီးယားမှာတွေ့တဲ့ ယာယီခုံးကျော်တံတားတစ်ခုကို သဘောကျသွားပြီး ဝယ်သုံးခဲ့ပေမဲ့ ခပ်နိမ့်နိမ့် ဖြစ်နေတာ၊ အသံဆူညံလွန်းတာ၊ ရွှေ့ပြောင်းလို့မလွယ်ကူတာ စတဲ့အချက်တွေကြောင့် သူ့ဘာသာ ပြန်လည်ဆန်းသစ်တီထွင်ဖို့ စိတ်ကူးရခဲ့တာပါ။
လမ်းအကျယ် ၅ မီတာ၊ အမြင့် ၃ မီတာရှိပြီး တစ်နာရီ မိုင် ၆၀ နှုန်း မောင်းနှင်ရာမှာ အဆင်ပြေချောမွေ့စေဖို့ လမ်းအခုံးကိုလည်း ပြေပြစ်အောင် တွက်ချက်ထားရပါတယ်။ ဆွစ်ဇာလန်မှာ အသုံးပြုနေတဲ့ ရွေ့လျားခုံးကျော်တံတားကို နော်ဝေ၊ ဂျာမနီနဲ့ နယ်သာလန်နိုင်ငံတွေကပါ စိတ်ဝင်စားနေပြီး ဆွစ်ဇာလန်နိုင်ငံဘက်ကလည်း အဲဒီနည်းပညာကို ဝေမျှပေးဖို့ ဆန္ဒရှိနေတယ်လို့ ဆိုပါတယ်။
ရေးသားသူ –Yoyarlay
မိုးနတ်မင်း သတင်းစုံ – Telegram Channel မှလည်း ပြည်တွင်းသတင်း၊ နိုင်ငံတကာသတင်း၊ ဆယ်လီသတင်းများအပြင် ကျန်းမာရေး၊ ဗေဒင်၊ ဗဟုသုတများကိုပါ နေ့စဉ်တင်ဆက်ပေးနေပါပြီ။ အသစ်အသစ်သော သတင်းတွေမလွတ်သွားရအောင် အောက်ပါ Link လေးကိုနှိပ်ပြီး အခုပဲ join ထားလိုက်ပါ။
မိုးနတ်မင်း ပရိသတ်ကြီးလည်း အခုသတင်းလေးကိုဖတ်ပြီး ထင်မြင်ချက်တွေကို ကွန်မန့်မှာရေးခဲ့ရင်း မိတ်ဆွေများသိအောင် သတင်းကို မျှဝေပေးခဲ့ပါဦး။
