‘အထိန်းအကွပ်မဲ့’ ခရီးသွားတွေကြောင့် ဂေရှားမယ်တွေရှိရာအရပ်ကို ဝင်ရောက်ခွင့် ဂျပန် ပိတ်ပင်မယ်
ဂေရှားမယ်တွေဟာ ဂျပန့်ရိုးရာယဥ်ကျေးမှု ခွဲမရအောင် ဖြစ်တည်လာတဲ့ အတတ်ပညာရှင်ဖျော်ဖြေမယ်တွေ ဖြစ်ကြပါတယ်
ဂေရှားမယ်တွေလို့ ပြောလိုက်ရင် မျက်နှာမှာ မိတ်ကပ်အဖြူဖြူ လိမ်းချယ်၊ အရောင်စုံ ကီမိုနိုဝတ်စုံနဲ့ ခပ်သုတ်သုတ်လေးလျှောက်ကြတဲ့ ရှေးဂျပန်အမျိုးသမီးတွေကို မျက်လုံးထဲမြင်မိကြမှာဖြစ်ပါတယ်။
ဂျပန်ရဲ့ ရှေးဟောင်းမြို့တော် ကျိုတိုကို သွားလည်ဖူးတယ်ဆိုရင်လည်း ဖျော်ဖြေရေးအရပ်လို့ သိကြတဲ့ နာမည်ကျော် ဂျီယွန်းအရပ်က လမ်းကျဥ်းလေးတွေကြားထဲမှာ ဧည့်သည်နဲ့ချိန်းထားလို့ ဖျော်ဖြေရေးအတွက် သုတ်သုတ်ပြာပြာလျှောက်ကြတဲ့ ဂေရှားမယ်တွေကို ဖြတ်ကနဲ့ မြင်မိကြမှာဖြစ်ပါတယ်။
တွေ့ဖူးမြင်ဖူးကြသူတွေကတော့ ‘‘မှော်ဆန်တဲ့တဒင်္ဂအခိုက်အတန့်’’လို့ ဆိုပြီး အဲဒီမြင်ကွင်းကို ခေါ်ကြပါတယ်။
ဂျပန့်ယဥ်ကျေးမှုနဲ့ တွဲမြင်လေ့ရှိတဲ့ ဂေရှားမယ်တွေဟာ အကအလှနဲ့ ဂီတအပါအဝင် ရိုးရာအနုပညာအမျိုးမျိုးအတွက် လေ့ကျင့်သားပြည့်ကြတဲ့ ဖျော်ဖြေရေးမယ်တွေဖြစ်ကြပါတယ်။
ဒါပေမဲ့ အခုတော့ ကျိုတိုဟာ မြို့တွင်းက ဂေရှားမယ်တွေကို မြင်တွေ့နိုင်မယ့် နေရာအချို့ကို အပြင်လူမဝင်နိုင်အောင် ပိတ်ဖို့ လုပ်နေပါတယ်။
‘‘ဧပြီလရောက်ရင်တော့ ခရီးသွားတွေအနေနဲ့ လူအများကို ဝင်ခွင့်မပေးထားတဲ့ လမ်းတွေကို ဝင်ရောက်တာမျိုးကို ဟန့်တားတဲ့ ကြေညာချက်ပါ စာတန်းတွေ ကပ်သွားဖို့ရှိပါတယ်’’ လို့ ဒေသန္တရ အရာရှိ အီဆိုခါဇု အိုတာက အေပီသတင်းဌာနကို ပြောပါတယ်။
ဂျီယွန်းအရပ်က တမူထူးလှတဲ့လမ်းကျဥ်းကျဥ်းလေးတွေမှာ မြင်ကွင်းလှည့်လည်ပြသတဲ့ ဧည့်လမ်းညွှန်တွေနောက် တကောက်ကောက်လိုက်တဲ့ ခရီးသွားတွေနဲ့ ပြည့်နေတတ်ပါတယ်။ တစ်ခါတလေဆိုရင် ခရီးသွားတွေဟာ စိတ်ဝင်စားဖို့ ကောင်းတဲ့အကြောင်းအရာရှိရင် ရပ်နားထောင်ကြလေ့လည်း ရှိပါတယ်။
ခရီးသွားတွေ လည်ပတ်စရာအဖြစ် နာမည်ကြီးတဲ့ဒီနေရာဟာ မျက်စိပသာဒဖြစ်စရာကျောင်းဆောင်တွေ၊ ဥယျာဥ်တွေ၊ ရေနွေးကြမ်းဆိုင်တွေအပြည့်နဲ့ ကွေ့ကွေ့ကောက်ကောက်လမ်းကြားလေးတွေရှိရာအရပ်လည်းဖြစ်ပါတယ်။
ဒီနေရာဟာ ဂေရှားမယ်တွေ၊ သူတို့ရဲ့ လက်သင် ဂေရှားမယ်အငယ်လေးတွေက ကီမိုနိုအဆင်တွေ ဝတ်ဆင်ပြီး ဆံထုံးထုံးကာ အကအလှနဲ့ ဂီတ ဖျော်ဖြေကြတဲ့နေရာလည်းဖြစ်ပါတယ်။
လမ်းလျှောက်လာတဲ့ဂေရှားမယ်တစ်ဦးကို ဓာတ်ပုံလှမ်းရိုက်နေတဲ့ ခရီးသွားတွေ
ဂေရှားမယ်တွေ လမ်းကျဥ်းလေးတွေထဲက ထွက်လာတဲ့အခါ ခရီးသွားအုပ်စုလိုက်က တစ်ခါတလေ ‘’အတင်းကာရော ဓာတ်ပုံဝိုင်းရိုက်ကြ’’လေ့ရှိတယ်လို့ ဒေသန္တရအာဏာပိုင်တွေက ပြောပါတယ်
ဂျီအွန်းအရပ်ဟာ အကသင်တန်း ဒါမှမဟုတ် ဂျပန့်ရိုးရာ ညစာပါတီပွဲကိုဧည့်ခံဖို့သွားမယ့် ဂေရှားမယ်တွေကို တွေ့လိုဇောနဲ့ ကင်မရာကိုင် ခရီးသွားတွေနဲ့ပြည့်လေ့ရှိပါတယ်။
‘များလွန်းနေတဲ့ ခရီးသွားအရေအတွက်’
‘‘ခရီးသွားတွေဟာ အထိန်းအကွပ်မရှိ’’ ဂေရှားမယ်တွေကို ထိပါးကြတယ်ဆိုပြီး အင်မတန် စိတ်အားထက်သန်လှတဲ့ခရီးသွားတွေအကြောင်း ဒေသန္တရအာဏာပိုင်တွေဆီ တိုင်ကြတန်းကြတာ နှစ်တွေကြာနေပြီဖြစ်ပါတယ်။ တခါတလေမှာ ဂေရှားမယ်တွေကို အတင်းအကျပ်ဓာတ်ပုံရိုက်တာ၊ သူတို့ဝတ်ဆင်ထားတဲ့ကီမိုနိုဝတ်စုံတွေကို ပွတ်သပ်ကိုင်တွယ်တာတွေတောင် ရှိတယ်လို့ ဆိုပါတယ်။
ကိုဗစ်ကပ်ဘေးဖြစ်လာပြီး ခရီးသွားလုပ်ငန်းကျတဲ့အခါမှာ ဒီပြဿနာကို အရေးတကြီးဖြေရှင်းရမယ့် ကိစ္စမျိုး သဘောမထားခဲ့ပေမဲ့ အခုတော့ ခရီးသွားတွေ အင်နဲ့အားနဲ့ပြန်ဝင်ရောက်လာချိန် ရောက်လာပြန်ပါတယ်။
ဂျီအွန်းမြို့ရဲ့ ကိုယ်စားလှယ်အတွင်းရေးမှူး အိုတာကတော့ လေး ငါးပေးလောက်ပဲ ကျယ်တဲ့ လမ်းကျဥ်းကျဥ်းလေးထဲကနေ ဂေရှားမယ်တွေ ထွက်လာကြတဲ့အခါမှာ ခရီးသွားတွေဟာ ‘‘သတင်းဓာတ်ပုံကို အသည်းအမည်းရိုက်ကူးသူ’’တွေလို ပြုမူကြတယ်လို့ ဆိုပါတယ်။
ဓာတ်ပုံရိုက်ကူးခွင့် ပိတ်ထားတဲ့နေရာတွေကို ဝင်ရောက်မယ်ဆိုရင် ဒဏ်ကြေး ဂျပန်ယမ်းငွေ ၁၀,၀၀၀ ပေးရမယ်လို့ ခရီးသွားတွေကို သတိပေးစာတွေကို အင်္ဂလိပ်-ဂျပန် နှစ်ဘာသာနဲ့သတိပေးချက်ထုတ်ထားပါတယ်
အဲဒီအရပ်က အများပြည်သူသွားလာဝင်ရောက်နိုင်တဲ့နေရာတွေကိုတော့ ခရီးသွားတွေသွားလာခွင့်ရှိနေဦးမှာဖြစ်ပါတယ်။ ဒါကြောင့် ကျိုတိုမြို့က ကျန်တဲ့နေရာတွေမှာတော့ ဂျပန်ကရော၊ ကမ္ဘာတလွှားက ခရီးသွားတွေနဲ့ပါ ပြည့်နေဦးမှာဖြစ်ပါတယ်။
ပြီးခဲ့တဲ့နှစ်အတွင်း ဂျပန့်အစားအစာ၊ နည်းပညာမြင့်အသုံးအဆောင်ပစ္စည်းတွေ၊ ဥယျာဥ်တွေ၊ ဖူဂျီတောင်လို သဘာဝအလှတွေနဲ့ ချယ်ရီပွင့်ချိန်တွေမှာ ဂျပန်ကိုလာရောက်လည်ပတ်တဲ့ခရီးသွားဟာ ၂၅ သန်းကျော်အထိရှိခဲ့ပါတယ်။
၂၀၁၉ ခုနှစ်မှာ ခရီးသွား ၃၂ သန်းရှိခဲ့ပြီး ၂၀၂၁ ခုနှစ်မှာ ခရီးသွား နှစ်သိန်းခွဲနီးပါးအထိ ကျဆင်းခဲ့ပေမဲ့ ဒီနှစ်မှာတော့ ခရီးသွားအရေအတွက်ဟာ ၂၀၁၉ ခုနှစ်က စံချိန်ကို ပြန်ရောက်နိုင်ခြေရှိတယ်လို့ ကျွမ်းကျင်သူတွေက ခန့်မှန်းထားပါတယ်။
ခရီးသွားမြင့်မယ်ဆိုတဲ့အတွေးဟာ ဂျီအွန်းမှာနေထိုင်တဲ့ဒေသခံတွေအတွက်တော့ စိတ်ထဲ ထိခိုက်စရာဖြစ်နေပါတယ်။ ပြီးခဲ့တဲ့လတွေအတွင်း ခရီးသွားတွေ တသီကြီးရောက်လာတဲ့အပေါ် စိတ်အားထက်သန်မှုမရှိကြတဲ့သူတို့ကို ဒေသသန္တရ အာဏာပိုင်တွေက ‘‘ကျိုတိုဟာ အပန်းဖြေဖို့နေရာသက်သက်’’ မဟုတ်ဘူးလို့ ပြောဆိုထားတာကြောင့် ဖြစ်ပါတယ်။
ရေးသားသူ –BBC Burmese
မိုးနတ်မင်း သတင်းစုံ – Telegram Channel မှလည်း ပြည်တွင်းသတင်း၊ နိုင်ငံတကာသတင်း၊ ဆယ်လီသတင်းများအပြင် ကျန်းမာရေး၊ ဗေဒင်၊ ဗဟုသုတများကိုပါ နေ့စဉ်တင်ဆက်ပေးနေပါပြီ။ အသစ်အသစ်သော သတင်းတွေမလွတ်သွားရအောင် အောက်ပါ Link လေးကိုနှိပ်ပြီး အခုပဲ join ထားလိုက်ပါ။
မိုးနတ်မင်း ပရိသတ်ကြီးလည်း အခုသတင်းလေးကိုဖတ်ပြီး ထင်မြင်ချက်တွေကို ကွန်မန့်မှာရေးခဲ့ရင်း မိတ်ဆွေများသိအောင် သတင်းကို မျှဝေပေးခဲ့ပါဦး။
