ခင်ဦးမှာ ငါးရက်အတွင်း အိမ်ခြေ ၅၀၀ ကျော် မီးရှို့ခံရ
မင်္ဂလာပါ ပရိသတ်ကြီးရေ.. မိုးနတ်မင်း သတင်းစုံမှ ကြိုဆိုလိုက်ပါတယ်။ အခုတင်ဆက်ပေးမယ့် သတင်းလေးကတော့ ခင်ဦးမှာ ငါးရက်အတွင်း အိမ်ခြေ ၅၀၀ ကျော် မီးရှို့ခံရ ဆိုတဲ့သတင်းလေးပဲ ဖြစ်ပါတယ်။
စစ်ကိုင်းတိုင်းဒေသကြီး၊ ခင်ဦးမြို့နယ်ထဲက ကျေးရွာတွေကို စစ်ကောင်စီက ၁၈ ရက်နေ့ကတည်းက ၀င်ရောက်မီးရှို့နေတဲ့အတွက် ၅ ရက်တာ ကာလအတွင်း အိမ်ခြေ ၅၀၀ ကျော် ပျက်စီးခဲ့တယ်လို့ ခင်ဦးမြို့နယ်ဒေသကာကွယ်ရေးအဖွဲ့တွေထံက သိရပါတယ်။
ဒီကနေ့ နို၀င်ဘာလ ၂၂ ရက်နေ့ မနက် ၉ နာရီ ၀န်းကျင်လောက်မှာလည်း ကန့်ဘလူမြို့နယ်နဲ့ ခင်ဦး အစပ်ကရွာဖြစ်တဲ့ ကျောက်တိုင်ရွာကို မီးရှို့နေပြီး စစ်ကောင်စီနဲ့ ဒေသကာကွယ်ရေးအဖွဲ့တွေအကြား အပြန်အလှန်ပစ်ခတ်မှု ဖြစ်ပွားခဲ့တယ်လို့ သိရပါတယ်။
ဒီလို အပြန်အလှန်ပစ်ခတ်မှုကြောင့် ခင်ဦး ဒေသကာကွယ်ရေးတပ်တွေဘက်က ၂ ဦးထိခိုက်ဒဏ်ရာရသူရှိတယ်လို့လည်း ကာကွယ်ရေးအဖွဲ့၀င်တွေက ပြောပါတယ်။
အခုလို ငါးရက်ဆက်တိုက် ရွာတွေကို မီးရှို့နေတာနဲ့ ပတ်သက်ပြီး ခင်ဦး အနောက်ဘက်ခြမ်းတာ၀န်ခံ ပြောပြတာက ” စစ်ကိုင်းထဲမှာ ခင်ဦးက အချက်အချာကျလို့ အဓိကထား ချေမှုန်းမယ်လို့ လွန်ခဲ့တဲ့ တစ်လတည်းက သူတို့ ကြွေးကြော်သံကြားထားပြီးသား။ အခုက နည်းဗျူဟာက သူတို့က စမပစ်ဘူး။ ရွာအပြင်ဘက်က စစ်ကြောင်းစထိုးတယ်။ ညနေဆို ရွာထဲ၀င်တယ်။ မနက်ဆို မီးရှို့ထွက်တယ်။ ဒီနေ့ ဆို ၅ ရက်မြောက်ရှိပြီ။ အိမ်ခြေလည်း ၅၀၀ ကျော်လောက် ပျက်စီးသွားခဲ့ပြီ” လို့ ဆိုပါတယ်။
မီးရှို့ခံရတဲ့ကျေးရွာတွေက ပေါင်းလဲကုန်းရွာက အိမ်ခြေ ၂၀၀၊ လိပ်ယာကုန်း ရွာက အိမ်ခြေ ၃၀ ၊ လက်ပံကြီး ရွာက အိမ်ခြေ ၅၀ နဲ့ ဆီဆုံလေး ၅ အိမ် မဒေါင်းကြီး ၊ ရွှေကာ ရွာနှစ်ရွာပေါင်းက အိမ်ခြေ ၂၀၀ ကျော် နဲ့ စောကြီးရွာ၊ သေနပ်စိန်ရွာတို့က အိမ်တွေ ပျက်စီးခဲ့တာလို့ ခင်ဦးမြို့နယ် ဒေသကာကွယ်ရေးအဖွဲ့တွေရဲ့ စာရင်းဇယားတွေအရ သိရပါတယ်။ လတ်တလောမီးရှို့တာတွေကြောင့် ဒေသခံ သောင်းနဲ့ချီ ဘေးလွတ်ရာကို တိမ်းရှောင်နေကြရပြီး အနွေးထည် ဆေးစတာတွေ လိုအပ်နေတယ်လို့ လည်း သိရပါတယ်။ ဒါပေမဲ့ ဒီဖြစ်စဥ်နဲ့ပတ်သက်လို့ စစ်ကောင်စီဘက်က သတင်းထုတ်ပြန်တာမရှိသေးပါဘူး။
ရေးသားသူ – BBC Burmese
မိုးနတ်မင်း ပရိသတ်ကြီးလည်း အခုသတင်းလေးကိုဖတ်ပြီး ထင်မြင်ချက်တွေကို ကွန်မန့်မှာရေးခဲ့ရင်း မိတ်ဆွေများသိအောင် သတင်းကို မျှဝေပေးခဲ့ပါဦး။
