နှစ်သစ်ကူးညမှာ ညမထွက်ရအမိန့် ခေတ္တပယ်ဖျက်
မင်္ဂလာပါ ပရိသတ်ကြီးရေ.. မိုးနတ်မင်း သတင်းစုံမှ ကြိုဆိုလိုက်ပါတယ်။ အခုတင်ဆက်ပေးမယ့် သတင်းလေးကတော့ နှစ်သစ်ကူးညမှာ ညမထွက်ရအမိန့် ခေတ္တပယ်ဖျက် ဆိုတဲ့သတင်းလေးပဲ ဖြစ်ပါတယ်။
လာမယ့်ဒီဇင်ဘာ ၃၁ ရက်နေ့ နှစ်သစ်ကူးပွဲတော်ညကို စည်းကားသိုက်မြိုက်စွာကျင်းပဖို့ရှိလို့ ညမထွက်ရအမိန့်ကို ခေတ္တ ပယ်ဖျက်လိုက်ကြောင်း စစ်ကောင်စီရဲ့ ရန်ကုန်တိုင်းအစိုးရအဖွဲ့အာဏာပိုင်တွေက ဒီနေ့ဒီဇင်ဘာ ၂၉ ရက်နေ့စွဲနဲ့ ထုတ်ပြန်ကြေညာလာပါတယ်။ ရန်ကုန်တိုင်းဒေသကြီးအစိုးရအဖွဲ့ရဲ့အစီအစဥ်နဲ့ ပြည်သူ့ရင်ပြင်မှာ နိုင်ငံတကာနှစ်သစ်ကူးပွဲတော် (Count Down party) ကျင်းပဖို့ရှိပြီး မီးရှူးမီးပန်းတွေပစ်ဖောက်တာ၊ စတိတ်ရှိုးပွဲတွေနဲ့ စည်းကားသိုက်မြိုက်စွာကျင်းပဖို့ရှိလို့ ပုဒ်မ ၁၄၄ အရ ထုတ်ပြန်ထားတဲ့ ညမထွက်ရအမိန့်ကို ဒီဇင်ဘာ ၃၁ ရက်မှာ ခေတ္တပယ်ဖျက်ခွင့်ပြုတယ်လို့အဲဒီစာမှာဖော်ပြထားပါတယ်။ တစ်ဖက်မှာလည်း လွတ်လပ်ရေးနေ့ မွာ ရန်ကုန်နဲ့နေပြည်တော်မှာ ပစ်မှတ်ထားတဲ့ တိုက်ခိုက်မှုတွေ ရှိနိုင်ပြီး ဟိုတယ်တချို့နဲ့ စစ်တပ်နဲ့ဆက်နွယ်တဲ့ အဆောက်အဦတွေ၊ စားသောက်ဆိုင်တွေနဲ့ ဘားတွေကိုမသွားရောက်ကြဖို့နဲ့ လုံခြုံရေးသတိပြုကြဖို့ ဗြိတိန်နဲ့အမေရိကန်သံရုံးတို့က ပြီးခဲ့တဲ့ ရက်ပိုင်းတည်းက သတိပေးချက်ထုတ်ပြန်ထားတာရှိပါတယ်။ ဒါ့အပြင် ရန်ကုန်မှာ ဒီဇင်ဘာလအတွင်းမှာပဲ အများပြည်သူ စီးနင်းအသုံးပြုတဲ့ ဒလရန်ကုန်မြစ်ကူးသင်္ဘော ချယ်ရီ အမြန်ယာဥ်ပေါ်မှာ ပေါက်ကွဲမှုဖြစ်ခဲ့လို့ လူ တစ်ဒါဇင်ကျော်ဒဏ်ရာရရှိခဲ့သလို ပြီးခဲ့တဲ့ရက်ပိုင်းကပဲ တာမွေက ပွဲစျေးတစ်ခုမှာ ပေါက်ကွဲမှုဖြစ်လို့အမျိုးသမီးတစ်ဦးနဲ့ကလေးတစ်ဦး ထိခိုက်ဒဏ်ရာရရှိခဲ့တဲ့ဖြစ်စဥ်တွေရှိထားပါတယ်။
“ရန်ကုန်ပြည်သူ့ရင်ပြင်မှာ countdown လုပ်မယ်ဆိုတာကတော့ ဟုတ်ပါတယ်။ အများပြည်သူပျော်ရွှင်စေဖို့အတွက် အဓိကရည်ရွယ်ပြီးတော့ လုပ်တာပါ။ countdown လုပ်ဖို့နိုင်ငံတကာလိုပဲ လုပ်ချင်တယ်လို့ဆန္ဒပြုလာတဲ့ပြည်သူတော်တော်များများလည်း ရှိပါတယ်။ ဒါကြောင့် အခုလို ဆောင်ရွက်တယ်လို့ သိရပါတယ်” လို့ ရန်ကုန်တိုင်းဒေသကြီး အစိုးရအဖွဲ့နဲ့ နီးစပ်သူတစ်ဦးက အတည်ပြုပါတယ်။
ရေးသားသူ – BBC Burmese
မိုးနတ်မင်း ပရိသတ်ကြီးလည်း အခုသတင်းလေးကိုဖတ်ပြီး ထင်မြင်ချက်တွေကို ကွန်မန့်မှာရေးခဲ့ရင်း မိတ်ဆွေများသိအောင် သတင်းကို မျှဝေပေးခဲ့ပါဦး။
