ထူးထူးခြားခြားသင့်လက္ခဏာဟောကိန်းများ
မင်္ဂလာပါ ပရိသတ်ကြီးရေ.. မိုးနတ်မင်း သတင်းစုံမှ ကြိုဆိုလိုက်ပါတယ်။ အခုတင်ဆက်ပေးမယ့် သတင်းလေးကတော့ ထူးထူးခြားခြားသင့်လက္ခဏာဟောကိန်းများ ဆိုတဲ့သတင်းလေးပဲ ဖြစ်ပါတယ်။
နိမိတ်ဖတ် လက္ခဏာဗေဒပညာနဲ့ ပတ်သက်ပြီးတော့ ကျွန်တော့်ရဲ့ ဗေဒင်ဟောလာတဲ့ သက်တမ်း (၂၂)နှစ် ကာလတစ်လျှောက်မှာ ဘယ်အရာမှ အမှုမဲ့ အမှတ်မဲ့ မနေဘဲ သေသေချာချာ ဟောကြားရင်း လေ့လာထားတဲ့ လက္ခဏာအရေးအကြောင်းလေးတွေကို မှတ်စုမှာ မှတ်တမ်း တင်ထားလေ့ရှိပါတယ် ။
အဲဒီမှတ်တမ်းလေးတွေထဲကနေပြီး လက္ခဏာကို စိတ်၀င်စားတဲ့ မည်သူမဆို မိမိတို့ရဲ့လက် တွေဖြန့်ကြည့်ရင်း တိုက်ဆိုင်ကြည့်နိုင်အောင် ရေးသားဖော်ပြလိုက်ပါတယ် ။
နံပါတ်(၁)ပုံမှာ ပြထားတဲ့အတိုင်း အသက် လမ်းကြောင်းကနေပြီးတော့ ထောင်တက်လာတဲ့ လမ်းကြောင်းဟာ အပေါ်ဘက်မှာ ရှိတဲ့ တက်လမ်း ကြောင်းကို သွားထိနေမယ်ဆိုရင်တော့ သင်ဟာ စီးပွားဥစ္စာတိုးတက်မယ် ၊ အိမ်ကြီးအိမ်ကောင်းတွေပိုင် ဆိုင်ပြီးတော့ တန်ခိုးဩဇာတက်မယ့်သူ ၊ နောက်ပြီး အစိုးရ၀န်ထမ်းဆိုရင်တော့ ရာထူးတက်တာတို့ ၊ ဒိအပြင် မိန်းကလေးတွေဆိုရင်တော့ ခင်ပွန်းကောင်းတွေ ရတတ်တယ်ဆိုတဲ့ နိမိတ်ဖြစ်ပါတယ် ။
နံပါတ်(၂)ပုံမှာ ပြထားသည့်အတိုင်း လက်ညှိုးနဲ့ လက်ခလယ်ကြား စနေဂြိုဟ်ခုံနဲ့ ကြာသပတေး ဂြိုဟ်ခုံကြားမှာ ထင်ရှားတဲ့ ညောင်ရွက်သဏ္ဌာန် တစ်ခုသော သင်္ကေတဟာ သင့်ဘ၀မှာ အလှူအ တန်း ကြီးကြီးမားမားတွေ ပေးရနိုင်တာတို့ ၊ ၀န်ထမ်း အကြီးအကဲများနှင့် ရင်းနှီးကျွမ်း၀င် ခင်မင်မှုရရှိတတ်တာတွေရဲ့ နိမိတ်ကို ဖော်ဆောင်တာပဲ ဖြစ်ပါတယ် ။
နံပါတ်(၃)ပုံမှာ ပြထားတဲ့အတိုင်း လက်ခလယ်အောက် စနေဂြိုဟ်ခုံပေါ်မှာရှိတဲ့ ကံလမ်းကြောင်းဟာ အသက်လမ်းကြောင်းကနေတစ်ဆင့်
တက်လမ်းကြောင်းနဲ့ နှလုံးလမ်းကြောင်းကို ဖြတ် တက်လာပြီး ယပ်တောင်ပုံသဏ္ဌာန်ဖြစ်နေတာက တော့ အသက်လတ်ပိုင်းလောက်ကနေ စပြီးတော့ စီးပွားရေး အစစအရာရာ အဆင်ပြေလာပြီး ရာထူး ဩဇာအာဏာရှိပြီး ချမ်းသာတဲ့သူတွေရဲ့အကူအညီ အထောက်အပံ့ကောင်းတွေ ရရှိလိမ့်မယ်လို့ နိမိတ် ပြနေခြင်းပဲဖြစ်တယ် ။
နံပါတ်(၄)ပုံမှာပြထားသည့်အတိုင်း လက်ညှိုးနဲ့ လက်ခလယ်ထိပ်တွေမှာ ခုံးဗွေ(ခေါ်) ခေါင်အုပ်ဗွေ ရှိနေတာဟာ အနုပညာ ၊ အလှပညာဆိုင်ရာ အလုပ် များနဲ့ အကျိုးပေး အောင်မြင်မယ်ဆိုတဲ့ နိမိတ်ပုံဖြစ် ပါတယ် ။
နံပါတ်(၅)ပုံမှာပြထားသည့်အတိုင်း နှလုံး လမ်းကြောင်းပေါ်ကနေ စတင်ထွက်လာတဲ့ လက်သူ ကြွယ်အောက် စနေဂြိုဟ်ခုံပေါ်မှာ အောင်မြင်ရေး လမ်းကြောင်း ထွက်လာပြီး ဘေးမှာအထောက်အကူ လမ်းကြောင်းတွေနဲ့အတူ ထိပ်ပေါ်မှာ ကြာဖူးပုံ ကျောက်မျက်ရတနာ သင်္ကေတလေး ရှိနေရင်တော့ သင်ဟာ ကျောက်မျက်ရတနာ ရွှေလုပ်ငန်းများဖြင့် ကြီးပွားအောင်မြင်ကာ အောင်မြင်နေသောသူများနှင့် လက်တွဲလုပ်ဆောင်ရမယ်ဆိုတဲ့ နိမိတ်ပဲဖြစ်ပါတယ် ။
နံပါတ်(၆)ပုံမှာပြထားသည့်အတိုင်း လက်သန်း အောက် ဗုဒ္ဓဟူးဂြိုဟ်ခုံပေါ်မှာ နှလုံးလမ်းကြောင်း ပေါ်ကစပြီး ကျန်းမာရေးလမ်းကြောင်း ထွက်ပေါ်လာ ပြီး ဒေါင်လိုက်မျဉ်းကို ခပ်စွေစွေမျဉ်းတစ်ခု ဖြတ်ထားရင်တော့ နှလုံးနှင့်ပတ်သက်ပြီး ကျန်းမာရေးထိခိုက်ကာ အလုပ်တွေမှာ သူတစ်ပါးရဲ့ ရုတ်တရက် အလိမ်ခံရခြင်းတွေ ကြုံတွေ့ရမယ့် နိမိတ်ဖြစ်ပါတယ် ။
နံပါတ်(၇)ပုံမှာပြထားသည့်အတိုင်းတက်လမ်းကြောင်းနဲ့ နှလုံးသားလမ်းကြောင်း အလယ်မှာ စတုဂံလွင်ပြင်မှ ဗိမာန်သင်္ကေတရှိနေမယ်ဆိုရင်တော့ သင်ဟာ အိုးအိမ်ခြံမြေတိုက်တာ ၊ ယာဉ်ရထားတွေ ပိုင်ဆိုင်နိုင်ပြီး ကျောင်းဇရပ်စတဲ့ သာသနိက အ ဆောက်အအုံတွေကို လှူဒါန်းနိုင်မယ်ဆိုတဲ့ နိမိတ် ဖြစ်ပါတယ် ။
နံပါတ်(၈)ပုံမှာပြထားသည့်အတိုင်း တက်လမ်း ကြောင်းဟာ တနင်္လာဂြိုဟ်ခုံဘက်မှာ ငါးရုပ်ပုံသဏ္ဌာန် သင်္ကေတရှိနေတာကြောင့်မို့ သင်ဟာ ရေထွက်ကုန် ၊ တွင်းထွက်ပစ္စည်းစတာတွေနဲ့ အကျိုးပေးမယ့် နိမိတ် ဖြစ်ပါတယ် ။
နံပါတ်(၉)ပုံမှာပြထားသည့်အတိုင်း လက်ဖနောင့်စွန်းမှာ ဒေါင်လိုက်မျဉ်းတွေ ခပ်စောင်းစောင်း ဖြစ်ပေါ်နေမယ်ဆိုရင် သင်ဟာ ပြည်တွင်း ပြည်ပ ခရီးတွေ သွားရတာတွေ မကြာခဏ လုပ်ရမယ့်နိမိတ် ဖြစ်ပါတော့တယ်
ရေးသားသူ – စာရေးဆရာ သာထက်ဇော်(မကွေး) တဲရော့ ၊ ဗေဒ ၊ လက္ခဏာ
မိုးနတ်မင်း ပရိသတ်ကြီးလည်း အခုသတင်းလေးကိုဖတ်ပြီး ထင်မြင်ချက်တွေကို ကွန်မန့်မှာရေးခဲ့ရင်း မိတ်ဆွေများသိအောင် သတင်းကို မျှဝေပေးခဲ့ပါဦး။
