ဆေးမတိုးနိုင်တဲ့ ဘက်တီးရီးယားပိုး ကူးစက်ရောဂါကို တိုက်ဖျက်နိုင်မယ့် ဒြပ်ပေါင်းတွေကို deep learning အသုံးပြု ရှာဖွေဖော်ထုတ်နိုင်ခဲ့
ဉာဏ်ရည်တုနည်းပညာတစ်ရပ်ဖြစ်တဲ့ deep learning ကို အသုံးပြုပြီး မက်ဆာချူးဆက်နည်းပညာသိပ္ပံ(MIT)ရဲ့ သုတေသီတွေက ဆေးမတိုးနိုင်တဲ့ ဘက်တီးရီးယားပိုး ကူးစက်ရောဂါကို တိုက်ဖျက်နိုင်မယ့် ဒြပ်ပေါင်းတွေကို ခွဲခြားဖော်ထုတ်နိုင်ခဲ့ပါတယ်။
ပဋိဇီဝဆေးတွေကို ခံနိုင်ရည်ရှိပြီး staph ဘက်တီးရီးယားကြောင့် ဖြစ်ပေါ်လာတဲ့ methicillin-resistant Staphylococcus aureus(MRSA) ကို အဲဒီဒြပ်ပေါင်းတွေက တိုက်ဖျက်ဖယ်ရှားနိုင်စွမ်းရှိကြောင်း Nature စာစောင်မှာ အသေးစိတ် ရေးသားဖော်ပြထားပါတယ်။ ဒါ့အပြင် လူ့ခန္ဓာကိုယ်က ဆဲလ်တွေကို ထိခိုက်နိုင်မှုလည်း မရှိသလောက် နည်းပါးတာကြောင့် ဆေးဝါးဖော်စပ်ရာမှာ အသုံးပြုနိုင်မယ့် အလားအလာ ရှိနေပါတယ်။
အဲဒီဒြပ်ပေါင်းတွေကို အသုံးပြုရင် ပဋိဇီဝဆေးတွေ ဘယ်လောက်ထိ ထိရောက်မှုရှိနိုင်မလဲဆိုတာကို deep-learning နည်းပညာ အသုံးပြုပြီး သုတေသီတွေက လေ့လာခဲ့ကြတာ ဖြစ်ပါတယ်။ အခု ရရှိခဲ့တဲ့ အသိအမြင်သစ်ကြောင့် ဆေးဝါးဒီဇိုင်းတွေကို ပိုကောင်းအောင် မွမ်းမံဖို့၊ အာနိသင်ပိုထိရောက်တဲ့ ပဋိဇီဝဆေးတွေ ဖော်စပ်ဖို့ အလားအလာကောင်းတွေ ရှိလာခဲ့ပါပြီ။
အသက်အန္တရာယ်ထိခိုက်စေနိုင်တဲ့ ဘက်တီးရီးယား ၇ မျိုးကို တိုက်ဖျက်ချေမှုန်းနိုင်မယ့် ပဋိဇီဝဆေးဝါး အမျိုးအစားသစ်တွေကို ၇ နှစ်တာကာလအတွင်း ရှာဖွေဖော်ထုတ်နိုင်ဖို့ ရည်ရွယ်ပြီး မက်ဆာချူးဆက်နည်းပညာသိပ္ပံမှာ Antibiotics-AI Project ကို ဖော်ဆောင်ခဲ့တာပါ။ အခုတွေ့ရှိမှုကတော့ အဲဒီစီမံကိန်းရဲ့ တစ်စိတ်တစ်ပိုင်း ဖြစ်ပါတယ်။
အမေရိကန်နိုင်ငံမှာ နှစ်စဉ်နှစ်တိုင်း ဆေးမတိုးတဲ့ ဘက်တီးရီးယားပိုး ကူးစက်ခံနေရသူ ၈၀၀၀၀ ကျော်အထိ ရှိနေပါတယ်။
ရေးသားသူ –Yoyarlay
မိုးနတ်မင်း သတင်းစုံ – Telegram Channel မှလည်း ပြည်တွင်းသတင်း၊ နိုင်ငံတကာသတင်း၊ ဆယ်လီသတင်းများအပြင် ကျန်းမာရေး၊ ဗေဒင်၊ ဗဟုသုတများကိုပါ နေ့စဉ်တင်ဆက်ပေးနေပါပြီ။ အသစ်အသစ်သော သတင်းတွေမလွတ်သွားရအောင် အောက်ပါ Link လေးကိုနှိပ်ပြီး အခုပဲ join ထားလိုက်ပါ။
မိုးနတ်မင်း ပရိသတ်ကြီးလည်း အခုသတင်းလေးကိုဖတ်ပြီး ထင်မြင်ချက်တွေကို ကွန်မန့်မှာရေးခဲ့ရင်း မိတ်ဆွေများသိအောင် သတင်းကို မျှဝေပေးခဲ့ပါဦး။
