မာမာအေး ၊ ၂၀ ရာစု မြန်မာ့ဟစ်ကြွေးသံ၊ မြန်မာပြည်ရဲ့ အသံဘုရင်မဖြစ်ခဲ့သူ
အသံကဝေမကြီးလို့ တင်စားကြတဲ့ အဆိုတော်ကြီး ဒေါ်မာမာအေးကို မေ့ကွက်ကိုရှာ သီချင်းအပါအဝင် ဒါဇင်နဲ့ချီတဲ့ သီချင်းကောင်းတွေနဲ့ လူသိများလှပါတယ်။ ၁၉၅၀ အစောပိုင်း ကနေ ၁၉၉၈ ထိ မြန်မာပြည် တေးလောကမှာ ကျင်လည်ခဲ့တဲ့ ဒေါ်မာမာအေးမှာ နာမည်ကြီး သီချင်းတွေက ဒါဇင်နဲ့ချီ များလှပါတယ်။ ပထမဆုံး နာမည်ကျော်ခဲ့တဲ့ သက်တန့်ပေါ်မှာ ကစားမယ်ကစပြီး တရေးချစ်ခွင့်မြင်ရနိုး ၊ မောင့်အချစ်မျှား၊ ချစ်သူ့နယ်မြေ၊ တနေ့တော့ မောင်ပြန်လာမည်၊ ရောင်နောက်ဆံထုံးပါ စတဲ့ ခေတ်သစ်ဂန္ထဝင်တေးတွေကို ဒေါ်မာမာအေး ဟစ်ကြွေးခဲ့ပါတယ်။
ဆိုင်းသံကြားက ကလေးအဆိုတော်
မာမာအေး ကြီးပြင်းခဲ့တဲ့ မြစ်ဝကျွန်းပေါ်ကျေးလက်
စိန်စိန်၊ တင်တင်မြ၊ ထား စတဲ့ သူနဲ့ ခေတ်ပြိုင် အမျိုးသမီးတေးသံရှင်တွေကြား မာမာအေးဆိုပြီး တင်ကျန်ရစ်ခဲ့တဲ့ အဆိုတော်ကြီးဟာ ၁၉၄၂၊ ဒုတိယကမ္ဘာစစ်ရဲ့ ဗုံးသံ၊ စက်သေနတ်သံတွေကြား မွေးဖွားလာခဲ့သူ ဖြစ်ပါတယ်။ မိဘနှစ်ပါးလုံးက ဇာတ်သဘင်လောကသားတွေ ဖြစ်ကြလို့ မာမာအေး မဖြစ်သေးတဲ့ မအေးမြင့် ဆိုင်းသံဗုံသံတွေကြားမှာ လူဖြစ်ခဲ့ပါတယ်။ သုံးနှစ်သမီးကတည်းက ခေတ်သစ်ရာဇဝင်ပြဇာတ်အဖွဲ့မှာ သူသီချင်းဆို ပြဇာတ်ကခဲ့ပါတယ်။ ရှစ်နှစ်သမီးမှာ ရေဒီယိုအသံလွှင့်အဆိုတော် ဖြစ်လာပြီး သန်းသန်းမြင့်၊ မြင့်မြင့်အေးနာမည်တွေကို သုံးခဲ့ပါတယ်။ ၁၃ နှစ်သမီးမှာတော့ သက်တန့်ပေါ်မှာ ကစားမယ် သီချင်းနဲ့ နိုင်ငံသိ အဆိုကျော် မာမာအေး ဖြစ်လာခဲ့ပါတယ်။ မာသီချင်း ခေတ်စားချိန်မှာ ဖခင်နာမည်ကို နောက်ကထည့်ပြီး မာမာအေး ဖြစ်လာခဲ့တာပါ။
လူမမည်ဘဝထဲက ဇာတ်သဘင်ဂီတနယ်မှာ ကြီးပြင်းခဲ့လို့ မာမာအေးရဲ့ ပညာရေးဟာ မဖြောင့်ဖြူးခဲ့ပါဘူး။ နိုင်ငံကျော်အဆိုတော်ဖြစ်ပေမယ့် အလယ်တန်းလောက်နဲ့ပဲ ပညာရေး စခန်းရပ်ခဲ့ရပါတယ်။ ဂီတပညာကိုတော့ ငယ်စဉ်ကတည်းက ရွှေတိုင်အေး၊ စောင်းဦးဘသန်း စတဲ့ ဆရာတွေဆီမှာ သင်ယူခဲ့ပြီး ပြဇာတ်ရုပ်ရှင်မင်းသမီးကြီး အကယ်ဒမီကြည်ကြည်ဌေးကိုတော့ သူ့ရဲ့ ကြားဆရာအဖြစ် မာမာအေးက သတ်မှတ်အတုယူခဲ့ပါတယ်။ မဟာဂီတသီချင်းကြီးတွေကိုလည်း ဒေါ်စောမြအေးကြည်၊ ဒေါ်အောင်ကြည် ၊ ဒေါ်ဒေလီညွန့်စတဲ့ ပညာရှင်ကြီးတွေဆီမှာ အပတ်တကုတ်သင်ယူခဲ့ပါတယ်။
မာမာအေး ဆရာ စောင်းဦးဘသန်း (ညာ)
အစောပိုင်းမှာ စစ်ရဲဂီတအဖွဲ့နဲ့ သီဆိုခဲ့ပေမယ့် ငြိမ်းချမ်းရေးလှုပ်ရှားမှုတွေမှာ ပါဝင်လာတဲ့ မာမာအေးကို စစ်တပ်ဘက်က ကန့်ကွက်ခဲ့ပါတယ်။ မာမာအေးကလည်း စန္ဒရားချစ်ဆွေ၊ မြတ်လေး စတဲ့ သူနဲ့ခင်တဲ့ ဂီတပညာရှင်တွေနဲ့အတူ ငြိမ်းချမ်းရေးနဲ့ ကျောင်းသားသီချင်းတွေကို သီဆိုပေးခဲ့ပါတယ်။
ရေဒီယို ဓာတ်ပြားအဆိုကျော်
၁၄ နှစ်သမီးအရွယ် ၁၉၅၆ မှာပဲ ပဒေသာကုမ္ပဏီနဲ့ သူ ဓာတ်ပြားစသွင်းခဲ့ပါတယ်။ တချပ်ကို ၁၂ ကျပ်နဲ့ ရောင်းတဲ့ ဓာတ်ပြားတပြားသွင်းခ ငွေငါးဆယ်ပဲ ရလို့ စျေးအနှိမ်ခံခဲ့ရပါတယ်။ ဒီကုမ္ပဏီမှာ အချပ် ၇ဝ ကျော် သွင်းပြီးမှ ၁၉၆၃ မှာ တိုးနိုင်ကုမ္ပဏီနဲ့ ချိတ်မိပြီး တချပ်ငါးရာ၊ ဘောနပ်စ် နှစ်သောင်း သီးသန့်ရခဲ့ပါတယ်။ နောက်ပိုင်းမှာတော့ သူ့ကို တချပ်ငါးထောင်ထိ ပေးပြီး ဓာတ်ပြားသွင်းကြပါတယ်။
နာမည်ကျော် နှစ်ကံပြိုင်ဖူးစာဓာတ်ပြား
တချိန်တည်းမှာပဲ ၁၉၆၁ ကနေ ၁၉၇၇ ထိ မြန်မာ့အသံမှာ စိတ်ဓာတ်စစ်ဆင်ရေးနှင့် လူမှုဆက်ဆံရေးတပ်ရဲ့ အရပ်သားအရာခံဗိုလ်ဘဝ၊ အရပ်သားဘဝတွေနဲ့ လက်ထောက်ထုတ်လွှင့်ရေးမှူးလုပ်ခဲ့သလို ဂီတကောင်စီမှာလည်း အမှုဆောင်နဲ့ ဂီတပဒေသာ မဂ္ဂဇင်းကော်မတီဝင် ဖြစ်ခဲ့ပါတယ်။ ၁၉၇၁ မှာတော့ သူကိုယ်တိုင် တေးသံရှင် ဓာတ်ပြားတိုက်ကို တည်ထောင်ခဲ့ပါတယ်။ ၁၉၇၆ မှာ အဆိုလေ့ကျင့်ရေးကျောင်း၊ ၁၉၇၇ မှာ မာမာအေး တေးဂီတလုပ်ငန်းတွေ လုပ်ခဲ့ပါတယ်။
ရုပ်ရှင်မင်းသမီးဘဝ မာမာအေး
ဂီတအပြင် ရုပ်ရှင်ဘက်ကိုလည်း သူထိတွေ့ခဲ့ပြီး ၁၉၇၂ က မြခြူသံဇာတ်ကားမှာ မြတ်လေး၊ တွံတေးသိန်းတန်၊ ကြည်ကြည်ဌေးတို့နဲ့အတူ သရုပ်ဆောင်ကာ နာမည်ကြီးခဲ့ပါတယ်။ ရှစ်ပတ်ရုံတင်တာနဲ့ ငွေတသိန်းခွဲဝင်တဲ့ ဇာတ်ကား ဖြစ်ပါတယ်။
ဂီတပဒေသာ မျက်နှာဖုံးရှင် မာမာအေး
မြန်မာပြည်ရဲ့ ဂီတဘုရင်မ
၁၉၆ဝ ကျော်ကနေ ၁၉၇ဝ ပြည့်လွန်နှစ်လယ်ပိုင်းတွေထိ မြန်မာပြည်မှာ တောရောမြို့ပါ နာမည်ကြီးခဲ့တဲ့ ကျားမ အဆိုတော်နှစ်ဦး ရှိခဲ့ရာမှာ တဦးက တွံတေးသိန်းတန်ဖြစ်ပြီး နောက်တဦးကတော့ မာမာအေး ဖြစ်ပါတယ်။ သူတို့နှစ်ဦး သီဆိုခဲ့တဲ့တေးတွေကလည်း တယောက်ကို ထောင်ချီ ရှိခဲ့ပါတယ်။
ဝင်းဦး၊ တင်တင်မြ၊ မောင်မောင်ကြီးစတဲ့ သူတို့နဲ့ ခေတ်ပြိုင် နာမည်ကြီးတွေ ရှိကြပေမယ့် သူတို့နှစ်ယောက်လိုတော့ လူထုကြားက အလွှာစုံ နေရာစုံက အားပေးအခံရဆုံး အဆိုတော်ကတော့ မရှိခဲ့ပါဘူး။ မာမာအေးဆိုခဲ့တဲ့ သီချင်းတွေ များလွန်းလို့ ဘယ်လောက်ရှိမှန်း သူကိုယ်တိုင်မသိပေမယ့် ၁၉၅၅ ကနေ ၁၉၇၅ ကြား တနှစ်ကို ရုပ်ရှင်ဇာတ်ကားငါးဆယ်အတွက် သုံးပုဒ်စီနှုန်းနဲ့ ရုပ်ရှင်တေးအပုဒ် သုံးထောင်လောက် သီဆိုဖူးတယ်လို့ သူကိုယ်တိုင်တွက်ပြခဲ့ဖူးပါတယ်။
မာမာအေးနဲ့ အမာခံ ပရိသတ်
ဒုတိယကမ္ဘာစစ်ပြီးခေတ် မြန်မာတေးလောကမှာ မေလှမြိုင်၊ တင်တင်မြ၊ မာမာအေး၊ ချိုပြုံး ကနေ ရီရီသန့်အထိ အမျိုးသားပရိသတ်က လေးလေးစားစား နှစ်သက်ကြတဲ့ အဆိုတော်တွေဖြစ်ကြောင်း စာရေးဆရာမဂျူးက မီဒီယာနှင့်ဂျင်ဒါ ဆောင်းပါးမှာ ရေးသားခဲ့ပါတယ်။ အမျိုးသမီးအဆိုတော်တွေရဲ့ ရင်ထဲကလာတဲ့အသံဟာ အမျိုးသမီးပရိသတ်တွေအတွက် ကိုယ်စားပြုဖွင့်ဟ ပေးသလို ရှိတယ်လို့လည်း ဂျူးက ဆိုပါတယ်။ ဒါကြောင့် မာမာအေးရဲ့ အချစ်သီချင်းတွေမှာ ၂ဝ ရာစုအလယ်ပိုင်း၊ စစ်အာဏာသိမ်း ဆိုရှယ်လစ်ခေတ်က ရိုးရာဆန်တဲ့ နှောင်ဖွဲ့မှုတွေကြားက မြန်မာအမျိုးသမီးတွေရဲ့ အသံကို ကြားရနိုင်ပါတယ်။ သူ့ရဲ့ အမျိုးသမီးပရိသတ်တွေထဲမှာလည်း ဗိုလ်ချုပ်ကြီးနေဝင်းကတော် ဒေါ်ခင်မေသန်းကနေ ကျေးလက်က လယ်သူမကြီးထိ ပါပါတယ်။
မောင့်အချစ်မျှားစူးမှ လဝန်းလေးနဲ့တူတဲ့မေ့ကိုလားကွယ်
ဓာတ်ပြားက ကက်ဆက်ခေတ်ထိ အောင်ပွဲခံခဲ့သူ
မာမာအေး သီဆိုအောင်မြင်ခဲ့တဲ့ သီချင်းတွေထဲမှာ အမျိုးအစားစုံလင်ပြီး မဟာဂီတကနေ ခေတ်ဟောင်း၊ ကာလပေါ်၊ ဘာသာရေး၊ အချစ်၊ ကျေးလက်အကြိုက်၊ ခေတ်ပေါ် စတီရီယိုတေးအထိ သူ သီဆိုခဲ့ပါတယ်။ မာမာအေး သီချင်းတွေ အောင်မြင်တဲ့ခေတ်ဟာ မြန်မာသံလို့ခေါ်တဲ့ တေးသံအမျိုးအစား ခေတ်ကောင်းတဲ့အချိန်ဖြစ်ပါတယ်။ ဒုတိယကမ္ဘာစစ်ပြီးနောက် ဗမာ့အသံကနေ နိုင်ငံခြားမိတ္တူသီချင်းတွေ မဝင်အောင် စိစစ်ပြီး တင်ဆက်ပေးခဲ့လို့ မြန်မာသံဂီတအမျိုးအစား အားကောင်းလာပါတယ်။
မာမာအေး ဓာတ်ပြားကြော်ငြာ
မာမာအေး သီဆိုသွားတဲ့အထဲ ယုံတမ်းစကား၊ ယုံရခက်ခက်၊ သီတာရေစင်၊ သည်လမ်းသည်စခန်း၊ နှင်းပျောက်တဲ့နွေ စတဲ့ ကိုသက်ဦးရေးတဲ့ အိမ်ထောင်ရေးနဲ့ ပတ်သက်တဲ့ အမျိုးသမီးခံစားချက်တေးတွေ နာမည်ကြီးသလိုပဲ စန္ဒရားချစ်ဆွေ၊ စန္ဒရားလှထွတ်တို့ရေးတဲ့ ချစ်အဓိပ္ပာယ်၊ ချစ်ပါရဲ့လား မေးစမ်းချင်၊ မချစ်လျှင်မလှ ချစ်လျှင်လှ၏ စတဲ့ တေးတွေကလည်း ကျော်ကြားခဲ့ ကျော်ကြားဆဲ ဖြစ်ပါတယ်။ သာချို၊ ရွှေကျောင်းပျော် စတဲ့ တေးတွေနဲ့ မာမာအေး အတွက် ကျေးလက်ပရိသတ်ကို အခိုင်အမာယူနိုင်ခဲ့တဲ့အပြင် စိန်နားကပ်ကြီးပန်ရမလို၊ ပျို့မောင်ဖုန်း စတဲ့ ဓာတ်ပြားတေးတွေကလည်း တောရောမြို့ပါ လူကြိုက်များခဲ့ပါတယ်။ စဉ်းစားကာ နေရအုန်းမယ်လို စတီရီယိုပုံစံတေးတွေထိ မာမာအေး သီဆိုခဲ့တာပါ။
မာမာအေးဟာ ကိုယ်ပိုင်တေးတွေအပြင် မကြည်အောင်၊ စိန်ပါတီနဲ့ မေရှင်စတဲ့ ခေတ်ဟောင်းအဆိုတော်ကြီးတွေရဲ့ ပြန်ဆိုတေးတွေနဲ့လည်း ကျော်ကြားခဲ့ပါတယ်။ မာမာအေးပြန်ဆိုတဲ့ သာသနာ့ ဒါယကာ၊ ပဉ္စင်းအမစတဲ့ ခေတ်ဟောင်း ဘာသာရေးသီချင်းတွေဟာ အလှူနဲ့ပွဲလမ်းသဘင်တွေမှာ အမြဲကြားနေကျ သီချင်းတွေ ဖြစ်ကြပါတယ်။
မြန်မာအမျိုးသမီးတွေရဲ့ အသံကို ထင်ဟပ်ခဲ့တဲ့ မကြည်အောင်
မာမာအေးကို ခင်တဲ့ ဗိုလ်မှူးကြီးကြည်မောင်
ဒေါ်မာမာအေးဟာ ဦးနု၊ ဗိုလ်ချုပ်ကြီးနေ၀င်းနဲ့ ဗိုလ်ချုပ်ခင်ညွန့်ခေတ်ထိ နေရာရ အရေးပေးခံခဲ့ရတဲ့ နိုင်ငံတော် အဆိုတော်တယောက် ဖြစ်ပါတယ်။ ငယ်စဥ် ဆယ်ကျော်သက်ကလေး စစ်ရဲတပ်အဆိုတော်ဘ၀ကတည်းက ရန်ကုန် နေပြည်တော်တိုင်းမှူး ဗိုလ်မှူးကြီး ကြည်မောင်အိမ်မှာ အနောက်တိုင်း ဂန္ထ၀င်တေးကြီးဘွဲ့ကြီး ဓာတ်ပြားတွေကို နားရည်၀ပြီး အနောက်တိုင်းအဆွဲအငင်အရှိုက်အဟဲတွေကို လေ့လာခဲ့ရပါတယ်။ ၁၉၆၂ နောက်ပိုင်းမှာလည်း လေတပ်ဦးစီးချုပ်နဲ့ ပြန်ကြားရေးတာ၀န်ခံ ဗိုလ်မှူးချုပ်သောင်းဒန် စပ်ဆိုတဲ့ တ၀က်မေတ္တာသီချင်းကို သူသီဆိုခဲ့ပါတယ်။
ဒီလို အထက်လွှာက နာမည်ကြီးခဲ့ပေမယ့် တဖက်ကလည်း ရန်ကုန်တော်လှန်ရေးပန်းခြံနေရာက ကပ္ပလီကွက်သစ်လို ရေရှား လျှပ်စစ်မီးမရှိတဲ့ ကျူးကျော်ရပ်ကွက်မှာ နေခဲ့ရတဲ့ ကလေးဘ၀ကို သူမမေ့ပါဘူး။ ဒါကြောင့် နိုင်ငံရဲ့ ငြိမ်းချမ်းရေး၊ သာယာ၀ပြောရေးကိစ္စတွေမှာ သူစိတ်၀င်တစား လေ့လာပြီး လက်၀ဲစာပေတွေ ဖတ်ရှုခဲ့ရာက မြတ်လေး၊ စန္ဒရားချစ်ဆွေ စတဲ့ ငြိမ်းချမ်းရေးလိုလားတဲ့ တေးသံရှင်တွေ၊ နိုင်ငံရေးသမားတွေ၊ တပ်ဦးကျောင်းသားတွေနဲ့ ရင်းနှီးပြီး သူတို့အလုပ်တွေမှာ ကူညီခဲ့ပါတယ်။ ဒီအတွက် သူအလုပ်လုပ်တဲ့ စစ်တပ်က ငြိုငြင်သတိပေးခဲ့ပါတယ်။
မြန်မာ့အသံမှာ အလုပ်လုပ်ခဲ့စဉ်က အနုပညာမပါတဲ့ ဝါဒဖြန့်သီချင်းတွေ ဆိုခိုင်းတာကိုလည်း သူ စိတ်ညစ်ခဲ့ပါတယ်။ ဒါကြောင့် ခေတ်မရွေးဘဲ ဆိုလို့ရတဲ့ သီချင်းမျိုးကိုပဲ ရေးပေးဖို့ သီချင်းရေးဆရာတွေကို သူအကြံပြုခဲ့ပါတယ်။
သမဂ္ဂသစ် ပြန်ပေါ်လာရေး တေးသံရှင်တွေ ကူညီခဲ့
၁၉၈၈ ဆန္ဒပြပွဲတွေမှာလည်း သူပါ၀င်ချင်လို့ ဒုတိယခင်ပွန်း လမ်းစဥ်ပါတီအမတ်ဟောင်း ဦးဇော်လင်းကို ခွင့်တောင်းပါတယ်။ ခွင့်မပြုတဲ့အတွက် အိမ်ထောင်အပြိုကွဲခံပြီး ဆန္ဒပြရာမှာ ပူးပေါင်းခဲ့သလို အောင်ပွဲဆက်ဆက်ခံဦးမည်၊ ခွပ်ဒေါင်းနဲ့အတူတိုက်စတဲ့ ကျောင်းသားသီချင်းတွေကို သမဂ္ဂပြန်လည်တည်ဆောက်ရေးအတွက် တခြားတေးသံရှင်တွေနဲ့အတူ ကူညီသီဆိုခဲ့ပါတယ်။ ၁၉၈၉ မှာတော့ အမျိုးသားဂီတပညာရှင်များအဖွဲ့ချုပ်ကို စန္ဒရားလှထွတ်နဲ့အတူ သူဖွဲ့စည်းခဲ့ပါတယ်။ နောက်ပိုင်း နဝတအစိုးရက ဒီအဖွဲ့ကို ဖျက်ပြီး မြန်မာနိုင်ငံဂီတအစည်းအရုံးတည်ထောင်ခိုင်းတဲ့အချိန်မှာ သူနုတ်ထွက်ခဲ့တယ်လို့ ဆိုပါတယ်။
အဝေးရောက်ဘဝမှာ ၁၅ နှစ်
လန်ဒန်ရောက် ဒေါ်အောင်ဆန်းစုကြည်၊ မာမာအေးနဲ့ ဇာဂနာ
၁၉၉၈ က ဗြိတိန်မှာ ဘာမင်ဟမ် ဘုန်းကြီးကျောင်းပွဲအတွက် သီချင်းလာဆိုပေးရင်း ဒေါ်မာမာအေး မြန်မာပြည် မပြန်နိုင်ဖြစ်ခဲ့ပါတယ်။ အမေရိကန်ကို ရွှေ့ပြောင်းနေထိုင်ရင်း ဆေးပညာသင်တန်းကို သူတက်ခဲ့သလို မြန်မာလှုပ်ရှားတက်ကြွသူတွေအတွက် ဂီတဘက်ဆိုင်ရာက သူ ကူညီခဲ့ပါတယ်။ ၂၀၀၇ ရွှေ၀ါရောင်တော်လှန်ရေးမှာတော့ မာမာအေးရဲ့ အသည်းနာ ကမ္ဘာမကြေသီချင်းက လေလှိုင်းကနေ မြန်မာပြည်ထဲ ရိုက်ခတ်ခဲ့ပါတယ်။ အ၀ေးက လှုပ်ရှားခဲ့တဲ့ သူ့အနုပညာနိုင်ငံရေးတွေကြောင့်လည်း ပြည်တွင်းမှာ ရုပ်သံကနေ သူ့သီချင်းတွေ မထုတ်လွှင့်တော့တာ၊ စာနယ်ဇင်းတွေမှာ သူ့အမည်ဖော်ပြလို့မရတာတွေ ဖြစ်ခဲ့ပါတယ်။
အမျိုးသမီးသတင်းထောက် တစ်ဦး ပြန်ပြောင်းပြောပြတဲ့ သွေးစွန်းခဲ့တဲ့ရွှေဝါရောင်
ဒီမိုကရေစီလှုပ်ရှားမှုကို သွေးသစ်လောင်းခဲ့တဲ့ ရွှေဝါရောင်
ပြည်တွင်းမှာ သူ့အနုပညာပန်းတွေ မပွင့်လန်းရတဲ့အတွက် ဘီဘီစီမြန်မာပိုင်းအစီအစဉ်ကနေ ဒေါ်မာမာအေးရဲ့ ပြောပြစရာတွေလည်း တပုံကြီးရှိသေးတယ် ကဏ္ဍကို နှစ်ချီ ထုတ်လွှင့်ခဲ့ပါတယ်။ ဒီအစီအစဉ်ကနေ သူ့ဘဝကိုယ်တွေ့ဖြစ်ရပ်တွေအပြင် ဂီတလောကက ပုဂ္ဂိုလ်ကျော်တွေအကြောင်းကို မြိုင်မြိုင် ဆိုင်ဆိုင် ထုတ်လွှင့်ပြောကြားခဲ့ပြီး မြန်မာ ခေတ်ဟောင်းနဲ့ ခေတ်ပေါ်ဂီတမှတ်တမ်းကြီးလို ဖြစ်ခဲ့ပါတယ်။
မာမာအေး ပြောပြစရာတွေ တပုံကြီးရှိသေးတယ်
၂၀၁၂ မြန်မာပြည်မှာ နိုင်ငံရေးတင်းမာမှုတွေ လျော့ကျပြီးနောက်ပိုင်း ၂၀၁၃ မှာ ဒေါ်မာမာအေး မြန်မာပြည်ကို ပြန်လာပြီး သူ့ပရိသတ်တွေအတွက် ဖျော်ဖြေပွဲတွေ လုပ်ပေးခဲ့ပါတယ်။ မြန်မာပြည်မှာ ရေရှည်ပြန်လာနေဖို့ သူရည်မှန်းခဲ့ပေမယ့် ၂၀၂၁ အာဏာသိမ်းမှုကြောင့် သူ့အိပ်မက်တွေ ပျက်ခဲ့ရပြီး အမေရိကန်မှာ ခေါင်းချခဲ့ရပါတယ်။
ဂန္ထဝင်မြန်မာသံတေးသံရှင် ဒေါ်မာမာအေးကွယ်လွန်
မြန်မာသံဂီတ အိပ်မက်
သီချင်းထောင်ချီဆိုခဲ့သူ
ဒေါ်မာမာအေး ကွယ်လွန်သွားပေမယ့် သူရည်မှန်းခဲ့တဲ့ မြန်မာသီချင်းဟောင်းတွေ ထိန်းသိမ်းရေး၊ မြန်မာသံဂီတ မပျောက်ကွယ်ရေး စတဲ့ အိပ်မက်တွေက ဆက်ရှင်သန်နေမှာ ဖြစ်ပါတယ်။ ဒေါ်မာမာအေးဟာ ဂီတမျိုးဆက်တွေကြား တံတားထိုးပေးခဲ့သူလို့ သူ့မိတ်ဆွေ ဂီတမြတ်နိုးသူ ဒေါက်တာလှဘူးက ပြောပါတယ်။ သူ့အရွယ်တန်း ပညာရှင်ကြီးတွေ လူငယ်တွေနဲ့ မထိတွေ့ဘဲ သီးသီးသန့်သန့် နေကြချိန်မှာ လူငယ်မျိုးဆက်သစ် ဂီတ၀ါသနာပါသူတွေကို ဒေါ်မာမာအေး ထွေးပွေ့ကူညီခဲ့ပါတယ်။ သူမရှိတော့ပေမယ့် သူ့ရဲ့ မြန်မာ့ဂီတအပေါ် ဖက်တွယ်စုံမက်မှု၊ ဂီတနဲ့ပတ်သက်ပြီး အကောင်းဆုံးကိုမှ အားထုတ်တင်ဆက်လိုမှုနဲ့ ဂီတအမြင် ပိုင်နိုင်မှုတွေကို နောက်မျိုးဆက်တွေ ဆက်ပြီး အားကျနေရမှာ ဖြစ်ပါတယ်။
ဒေါ်မာမာအေးဟာ သီချင်းဆိုဖို့ မွေးဖွားလာသူဖြစ်ပြီး သူ့ကြောင့် မြန်မာဂီတဟာ အဆွဲအငင် ခံစားချက်တွေပါတဲ့ ဆိုပုံဆိုပေါက် ပိုကောင်းတဲ့တေးတွေနဲ့ ပိုပြီး ခမ်းနားလာခဲ့ပါတယ်။ ဒါကြောင့် သူ့လိုအသံမျိုး၊ ဆိုပုံမျိုးဟာ မြန်မာဂီတမှာ ပြိုင်ဘက်မရှိ၊ ရှာမတွေ့နိုင်တဲ့ တယောက်တည်းသောအဆိုရှင်ဖြစ်တယ်လို့ ဂီတမြတ်နိုးသူတွေက ပြောစမှတ်ပြု ကျန်ရစ်ကြတာ ဖြစ်ပါတယ်။
ရေးသားသူ –BBC Burmese
မိုးနတ်မင်း သတင်းစုံ – Telegram Channel မှလည်း ပြည်တွင်းသတင်း၊ နိုင်ငံတကာသတင်း၊ ဆယ်လီသတင်းများအပြင် ကျန်းမာရေး၊ ဗေဒင်၊ ဗဟုသုတများကိုပါ နေ့စဉ်တင်ဆက်ပေးနေပါပြီ။ အသစ်အသစ်သော သတင်းတွေမလွတ်သွားရအောင် အောက်ပါ Link လေးကိုနှိပ်ပြီး အခုပဲ join ထားလိုက်ပါ။
မိုးနတ်မင်း ပရိသတ်ကြီးလည်း အခုသတင်းလေးကိုဖတ်ပြီး ထင်မြင်ချက်တွေကို ကွန်မန့်မှာရေးခဲ့ရင်း မိတ်ဆွေများသိအောင် သတင်းကို မျှဝေပေးခဲ့ပါဦး။
